అమ్మ ఉన్నా అనాథలా పెరిగా..! - meet aisha nazia the only indian woman selected for the fifa master programme 2021
close
Updated : 23/07/2021 19:57 IST

అమ్మ ఉన్నా అనాథలా పెరిగా..!

Photo: Instagram

ఆమెకు ఐదేళ్లున్నప్పుడే తల్లిదండ్రులు విడిపోయారు. తల్లి రెండో పెళ్లి చేసుకోవడంతో సొంత ఊరికి దూరంగా అనాథాశ్రమంలో పెరగాల్సి వచ్చింది. అయినా పట్టుదలతో చదివి మంచి ఉద్యోగం సంపాదించింది. అదనంగా ఫుట్‌బాల్‌పై అమితమైన ప్రేమను పెంచుకుంది. మైదానంలో దిగి ఆడకపోయినా అందులోనే కెరీర్‌ను వెతుక్కుంది. ఆ ఆసక్తితోనే ప్రతిష్ఠాత్మక ‘ఫిఫా మాస్టర్‌ ప్రోగ్రామ్‌ - 2021’కు ఎంపికైంది. ప్రపంచవ్యాప్తంగా మొత్తం 30 మంది దీనికి ఎంపిక కాగా.. అందులో ఆమె ఒక్కర్తే భారతీయురాలు కావడం విశేషం. ఆమే.. కేరళకు చెందిన 26 ఏళ్ల ఐషా నజియా.

ఏకైక భారతీయురాలిగా!

దేశంలో ఫుట్‌బాల్‌కు బాగా ఆదరణ ఉన్న ప్రాంతాల్లో కేరళలోని కోజికోడ్‌ కూడా ఒకటి. కోల్‌కతా తర్వాత ఫుట్‌బాల్‌కు ఇక్కడే ఎక్కువ క్రేజ్‌ ఉంది. అందుకే కోజికోడ్‌ను ‘సెకండ్‌ మక్కా ఆఫ్‌ ఇండియన్‌ ఫుట్‌బాల్‌’ అని కూడా పిలుస్తారు. అదే ప్రాంతానికి చెందిన ఐషా కూడా ఫుట్‌బాల్‌పై ప్రేమ పెంచుకుంది. మంచి జీతమొచ్చే ఇంజినీర్‌ ఉద్యోగాన్ని వదిలేసి ఆ ఆటలోనే కెరీర్‌ను వెతుక్కుంది. ‘స్పోర్ట్స్‌ మేనేజ్‌మెంట్‌ ప్రొఫెషనల్‌’గా తన ప్రతిభేంటో నిరూపించుకుంది. ఈ క్రమంలోనే ప్రతిష్ఠాత్మక ‘ఫిఫా మాస్టర్‌ ప్రోగ్రామ్‌ - 2021’ కోర్సుకు అర్హత సాధించింది. ఈ కోర్సు కోసం ప్రపంచవ్యాప్తంగా సుమారు 700మందికి పైగా దరఖాస్తు చేసుకుంటే తుదిగా 30 మంది ఎంపికయ్యారు. అందులో ఏకైక భారతీయురాలు ఐషా నజియానే!

అలాంటి వారి కోసం నిరీక్షించాను!

ఒకవైపు చదువు, మరోవైపు ఫుట్‌బాల్‌.. ఇలా రెండింటిలో సత్తా చాటుతోన్న నజియా జీవితం పూలపాన్పేమీ కాదు. ఆమె జీవితంలోనూ కన్నీటి సుడులున్నాయి. తల్లిదండ్రులున్నా అనాథాశ్రమంలో పెరిగిన ఐషా.. ఒకానొక సమయంలో తనను ఎవరైనా దత్తత తీసుకుంటే బాగుండేదనుకుందట! ‘నాకు ఐదేళ్లున్నప్పుడే అమ్మానాన్న విడాకులు తీసుకున్నారు. అమ్మ మళ్లీ పెళ్లి చేసుకుంది. ఇంట్లో సవతి తండ్రి.. ప్రేమగా పలకరించని అమ్మతో నిత్యం నాకు అగ్ని పరీక్షే ఎదురయ్యేది. చివరకు చెన్నైలోని ఓ అనాథాశ్రమానికి అనుబంధంగా నడిచే పాఠశాలలో నన్ను చేర్పించారు. మొదట్లో రోజూ ఏడ్చేదాన్ని. మంచి తల్లిదండ్రులెవరైనా వచ్చి నన్ను దత్తత తీసుకుంటారేమోనని ఆశగా ఎదురుచూసేదాన్ని. కానీ అలాంటిదేమీ జరగలేదు. ఆ సమయంలో ఒక నన్‌ చెప్పిన మాటలు జీవితంపై నాకు మళ్లీ ఆశలు చిగురించేలా చేశాయి. ‘జీవితంలో ఉన్నత స్థానానికి చేరుకోవాలంటే కొన్ని కష్టాలను ఎదుర్కోక తప్పదు’ అని ఆమె చెప్పిన మాటలు నా మెదడులో బలంగా నాటుకుపోయాయి. బాగా చదువుకుంటే ఈ కష్టాలన్నింటినీ అధిగమించవచ్చని అర్థం చేసుకున్నాను’ అని ఓ సందర్భంలో చెప్పుకొచ్చింది ఐషా.

చదువే లోకంగా ముందుకు!

చదువే లోకంగా ముందుకు సాగిన ఐషా ప్రతి తరగతిలోనూ టాపర్‌గానే నిలిచింది. ఆమె ప్రతిభను మెచ్చుకుంటూ కేరళ ప్రభుత్వం 8లక్షల రూపాయల స్కాలర్‌షిప్‌ను కూడా మంజూరు చేసింది. ఈ డబ్బుతోనే కొల్లామ్‌లోని టీకేఎమ్‌ కళాశాలలో మెకానికల్‌ ఇంజినీరింగ్‌ కోర్సును అభ్యసించింది. ఈ కాలేజీలో చేరేటప్పటికి నజియా వయసు 18 ఏళ్లు. కోర్సు చేస్తున్నప్పుడే కొందరు స్నేహితులు ఆమెకు పరిచయమయ్యారు. కాలక్రమేణా వాళ్లే తన కుటుంబ సభ్యుల్లా కలిసిపోయారు.

‘వర్క్‌ ఫోర్స్‌ మేనేజర్‌’గా!

కోర్సు పూర్తయిన వెంటనే కొచ్చిలోని ‘ఇండియన్ ఆయిల్‌-అదానీ గ్యాస్‌’ కంపెనీలో మెకానికల్‌ ఇంజినీర్‌గా కెరీర్‌ ప్రారంభించింది ఐషా. ఇదే సమయంలో టీవీలో ఎక్కువగా ఫుట్‌బాల్‌ మ్యాచ్‌లు చూస్తూ గడిపిన ఆమె క్రమంగా ఆ ఆటపై ఆసక్తి పెంచుకుంది. ఉద్యోగం చేస్తూనే అందులో ఏదైనా కొత్త కెరీర్‌ను వెతుక్కోవాలనుకుంది. ‘2017లో ఫిఫా అండర్-17 ఫుట్‌బాల్‌ ప్రపంచకప్‌ పోటీలకు భారత్‌ ఆతిథ్యమిచ్చింది. ఈ మెగా ఈవెంట్‌లో నేను భాగమవ్వాలనుకున్నాను. ఈవెంట్‌ మేనేజ్‌మెంట్‌ బృందంలో పనిచేయడానికి దరఖాస్తు పంపించాను. నాకు స్పోర్ట్స్‌ మేనేజ్‌మెంట్‌ డిగ్రీ లేకపోవడంతో అవకాశం వస్తుందన్న ఆశ లేదు. అయితే మెకానికల్‌ ఇంజినీరింగ్‌ చదివేటప్పుడు విశ్లేషణాత్మక శక్తి, సమస్యలను పరిష్కరించే లక్షణాలను అలవర్చుకున్నాను. దీంతో ఇంటర్వ్యూను విజయవంతంగా పూర్తి చేశాను. ‘వర్క్‌ ఫోర్స్‌ మేనేజర్‌’గా అవకాశం వచ్చింది. అప్పుడు నా వయసు 23 ఏళ్లు. ఆ మెగా ఈవెంట్‌ మేనేజ్‌మెంట్‌ బృందంలో నేను అత్యంత పిన్న వయస్కురాలిని’.

ఉద్యోగం వదిలేసి!

‘వర్క్‌ ఫోర్స్‌ మేనేజర్‌’ అనేది ఒక ‘చీఫ్‌ ఆఫ్‌ స్టాఫ్‌’ రోల్‌ లాంటిది. వివిధ శాఖల్లో పనిచేసే ఉద్యోగుల్ని సమన్వయం చేసుకొని నిర్వర్తించాల్సిన బాధ్యత అది. కొంచెం కష్టమైనా సమర్థంగా పనిచేశాను. ఆ అనుభవంతోనే నేషనల్‌ బాస్కెట్‌ బాల్‌ అసోసియేషన్‌(NBA)లో పాలుపంచుకున్నాను. 200మంది అమెరికన్లున్న టీంతో కలిసి పనిచేశా. ఇది నాకు మరింత ఆత్మవిశ్వాసాన్నిచ్చింది. దాంతో ఇంజినీర్‌గా ఉద్యోగాన్ని వదిలేసి పూర్తిగా స్పోర్ట్స్‌ మేనేజ్‌మెంట్‌పైనే దృష్టి సారించాను. అయితే ఆదాయం కోసం బెంగళూరులోని కొన్ని స్టార్టప్‌ కంపెనీల్లో పార్ట్‌ టైం ఉద్యోగాలు చేశాను. వారు కూడా నా ఆసక్తిని అర్థం చేసుకుని ఏవైనా స్పోర్ట్స్‌ ఈవెంట్లుంటే వెంటనే నన్ను అక్కడకు పంపించేవారు.’

వందల సార్లు పిచ్‌ దగ్గరకు వెళ్లాలి!

‘సాధారణంగా మెకానికల్‌ ఇంజినీరింగ్‌, స్పో్ర్ట్స్‌ మేనేజ్‌మెంట్‌ రంగాల్లో మహిళల ప్రాతినిథ్యం పెద్దగా కనిపించదు. ఇక్కడ డెస్కుకు పరిమితమై చేసే ఉద్యోగాలేమీ ఉండవు. చాలా వరకు ఫీల్డ్‌ వర్కే ఉంటుంది. అయితే నేను ఈ రెండింటినే కెరీర్‌గా ఎంచుకున్నాను. స్పోర్ట్స్‌ మేనేజ్‌మెంట్‌ రంగంలో ఉంటే నిరంతరం ఎండలోనే విధులు నిర్వర్తించాల్సి ఉంటుంది. రోజుకు కొన్ని వందల సార్లు మైదానంలోకి వెళ్లి పిచ్‌ను పరిశీలించాలి. ఇంకా శారీరక శ్రమతో కూడిన ఎన్నో బాధ్యతలు నిర్వర్తించాల్సి ఉంటుంది’ అని చెబుతోందీ టీనేజ్‌ గర్ల్‌.

అందుకే ఈ ‘క్రౌడ్‌ ఫండింగ్‌’!

ఆరేళ్ల క్రితం మొదటిసారిగా ‘ఫిఫా మాస్టర్‌ ప్రోగ్రామ్‌’ గురించి తెలుసుకుంది ఐషా. అప్పుడే ఈ కోర్సును పూర్తి చేయాలని మనసులో గట్టిగా అనుకుంది. ఇప్పుడు అది నెరవేరే సమయం ఆసన్నమైంది. ‘ఇంటర్నేషనల్‌ సెంటర్‌ ఫర్‌ స్పోర్ట్స్‌ స్టడీస్‌ అందించే ఈ కోర్సులో భాగంగా ఆటల్లో మేనేజ్‌మెంట్‌, లా, హ్యుమానిటీస్‌.. వంటి అంశాల్లో నైపుణ్యాల్ని నేర్పిస్తారు. ఇందులో చేరడానికి ఆసక్తిగా ఎదురుచూస్తున్నాను. కోర్సులో భాగంగా ఫిఫా, ఐఓసీ, ఫార్ములా వన్‌ హెడ్‌క్వార్టర్స్‌తో పాటు మొత్తం 80 ప్రదేశాలకు ఫీల్డ్‌ ట్రిప్స్‌ కోసం మేం వెళ్లాల్సి ఉంటుంది. కోర్సు పూర్తయిన తర్వాత ఫిఫా ముగ్గురిని ఎంపిక చేసుకుని ఉద్యోగం కూడా కల్పిస్తుంది. అందుకే ఎప్పుడెప్పుడు ఈ కోర్సులో చేరదామా? అనిపిస్తుంది. ఇది మొత్తం ఏడాది కోర్సు. దీనికి అయ్యే ఖర్చులో సగం స్కాలర్‌షిప్‌గా వస్తుంది. మిగతాది అంటే సుమారు 28 లక్షల రూపాయలు మనం చెల్లించాల్సి ఉంటుంది. డబ్బు కోసం పలు ఆర్గనైజేషన్లు, సంస్థల చుట్టూ తిరిగాను. కానీ ఫలితం లేకపోయింది. బ్యాంకు లోన్‌ కోసం ప్రయత్నించాను. కానీ నా పేరిట ఆస్తులేమీ లేకపోవడంతో అక్కడా నిరాశే ఎదురైంది. అందుకే చేసేదేమీ లేక క్రౌడ్‌ ఫండింగ్‌ మార్గాన్ని ఎంచుకున్నాను. ‘లింక్డ్ ఇన్‌’ లో నా వివరాలు షేర్‌ చేస్తే సుమారు 38 వేల మంది చూశారు. కానీ వంద రూపాయలకు మించి రాలేదు. అయితే కోర్సు ప్రారంభం కావడానికి చాలా సమయముంది. ఆలోపు డబ్బు సమకూరుతుందని ఆశిస్తున్నాను’ అని చెప్పుకొచ్చింది ఐషా.

మరి, ఐషా కోర్సుకయ్యే డబ్బు త్వరలోనే సమకూరాలని, తన జీవిత లక్ష్యం నెరవేరాలని మనమూ కోరుకుందాం!!

ఆల్‌ ది బెస్ట్‌ ఐషా!!

మరిన్ని

ఇంటి పేరుతో కాదు... ఇది నా స్వయంకృషి...!

నాన్న ప్రముఖ నటుడు దగ్గుబాటి వెంకటేశ్‌. ఇక తాత, పెదనాన్న, అన్న... ఇలా ఆ ఇంట్లో వాళ్ల పేర్లు చెప్పక్కర్లేదు. వారి పేర్లు ఉపయోగించుకుంటే బోలెడు గుర్తింపు. కానీ ఆమె మాత్రం... తన అభిరుచి, సృజనాత్మకత, శ్రమలనే పెట్టుబడిగా గుర్తింపు సాధించాలనుకుంది. తనే వెంకటేశ్‌ పెద్ద కుమార్తె ఆశ్రిత. తన లక్ష్యం దిశగా కృషి చేస్తూ... ఇన్‌స్టాగ్రాం, యూట్యూబ్‌ల్లో లక్షల్లో అభిమానుల్ని సంపాదించుకుంది. ఇటీవల ఇన్‌స్టాగ్రాంలో ఎక్కువ సంపాదిస్తున్న సెలబ్రిటీల జాబితాను హోపర్‌డాట్‌కాం సంస్థ విడుదల చేసింది. అందులో ఆశ్రిత అంతర్జాతీయంగా 377, ఆసియాలో 27వ ర్యాంకులు సాధించింది. ఈ సందర్భంగా వసుంధర ఆమెతో ముచ్చటించింది.

తరువాయి

‘స్పెల్లింగ్స్‌’ చెప్పి సెన్సేషనయ్యారు!

పిల్లల్లో ఇంగ్లిష్‌ నైపుణ్యాలను పరీక్షించడానికి అమెరికాలో ఏటా నేషనల్‌ స్పెల్లింగ్‌-బీ పోటీలు నిర్వహిస్తోన్న సంగతి తెలిసిందే. ఎంతో ప్రతిష్ఠాత్మకంగా జరిగే ఈ పోటీల్లో వేలాదిమంది చిన్నారులు పాల్గొంటారు. తల్లిదండ్రులు కూడా తమ పిల్లలను ఈ పోటీలకు అన్ని రకాలుగా సిద్ధం చేస్తూ ప్రోత్సహిస్తుంటారు. ఇక ఈసారి నిర్వహించిన స్పెల్లింగ్‌-బీ పోటీల్లో లూసియానాకు చెందిన 14 ఏళ్ల జైలా అవంత్‌ గార్డే విజేతగా నిలిచింది. దీంతో 93 ఏళ్ల ఈ కంటెస్ట్‌ చరిత్రలో ఈ ట్రోఫీ నెగ్గిన మొదటి ఆఫ్రికన్‌ అమెరికన్‌గా, రెండో నల్లజాతీయురాలిగా చరిత్ర సృష్టించిందీ యంగ్‌ గర్ల్‌.

తరువాయి

కథ చెబుతాను... ఊ కొడతారా..!

రాత్రయిందంటే చాలు.. బామ్మ చెప్పే నీతికథలు వింటూ నిద్రలోకి జారుకోవడం మనందరికీ చిన్ననాటి ఓ మధుర జ్ఞాపకం! అప్పుడంటే చాలావరకు ఉమ్మడి కుటుంబాలు కాబట్టి ఇది వర్కవుట్‌ అయింది.. ఇప్పుడు వృత్తి ఉద్యోగాల రీత్యా చాలామంది ఇంట్లో పెద్దవాళ్లు, కన్న వాళ్ల నుంచి దూరంగా వచ్చేస్తున్నారు. దీంతో పిల్లలు వాళ్ల గ్రాండ్‌పేరెంట్స్‌ని, వాళ్లు చెప్పే బోలెడన్ని కథల్ని మిస్సవుతున్నారు. ఇలాంటి అనుభవమే తన చెల్లెలికీ ఎదురైందంటోంది 18 ఏళ్ల ప్రియల్ జైన్‌. అది చూసి ఆలోచనలో పడిపోయిన ఆమె.. నీతి కథలు చెప్పే ఓ ప్లాట్‌ఫామ్‌కు శ్రీకారం చుట్టింది. చిన్నారులకు బామ్మ దగ్గర లేని లోటుని తన వెబ్‌సైట్ తీరుస్తుందంటోన్న ఈ యంగ్‌ ఆంత్రప్రెన్యూర్‌ కథేంటో మనమూ తెలుసుకుందాం రండి..

తరువాయి

చిన్నప్పటి కల.. ఇలా సాధించేసింది!

ఆడవారు అనుకుంటే ఏదైనా సాధిస్తారు... వారికి కావల్సిందల్లా కాసింత ప్రోత్సాహం. ఎవరి సహకారం ఉన్నా, లేకున్నా తల్లిదండ్రులు, తోడబుట్టిన వారి సహకారం మాత్రం ఉంటే చాలు... అమ్మాయిలకు అసలు తిరుగుండదు. అన్నింటా విజయాలే సాధిస్తారు. పలువురికి ఆదర్శంగా నిలుస్తారు. అందుకు తాజా ఉదాహరణే 24 ఏళ్ల మావ్యా సూదన్‌. జమ్మూకశ్మీర్‌లోని ఓ మారుమూల గ్రామానికి చెందిన ఈ యువతి ఇటీవల ఇండియన్‌ ఎయిర్‌ ఫోర్స్‌ ఫైటర్‌ పైలట్‌గా నియమితురాలైంది. ఈ నేపథ్యంలో దేశం మొత్తంమీద ఈ అవకాశం దక్కించుకున్న 12 వ మహిళగా, మొదటి కశ్మీరీ మహిళగా గుర్తింపు పొందిందీ యంగ్‌ సెన్సేషన్.

తరువాయి

బ్యూటీ & ఫ్యాషన్

మరిన్ని

ఆరోగ్యమస్తు

మరిన్ని

అనుబంధం

మరిన్ని

మంచిమాట


'స్వీట్' హోం

మరిన్ని

వర్క్‌ & లైఫ్

మరిన్ని

సూపర్‌ విమెన్

మరిన్ని