‘ఆడపిల్లవి.. నీకెందుకు మెకానికల్‌ ఇంజినీరింగ్‌?’ అన్నారు! - meet sanjal gavande engineer from mumbai who built jeff bezos spacecraft
close
Updated : 20/07/2021 18:21 IST
Facebook Share Twitter Share WhatsApp Share Telegram Share Link Share

‘ఆడపిల్లవి.. నీకెందుకు మెకానికల్‌ ఇంజినీరింగ్‌?’ అన్నారు!

Photo: Facebook

ఇటీవల ‘వర్జిన్‌ గెలాక్టిక్‌’ రూపొందించిన ‘వీఎస్‌ఎస్ యూనిటీ-22’ వ్యోమనౌక ద్వారా అంతరిక్షంలోకి వెళ్లి వచ్చింది తెలుగమ్మాయి బండ్ల శిరీష. ఇప్పుడు దీనికి పోటీగా అపర కుబేరుడు జెఫ్‌ బెజోస్‌ ఈనెల 20న అంతరిక్షయానం చేయనున్నారు. తన ‘బ్లూ ఆరిజిన్‌’ సంస్థకు చెందిన ఓ రాకెట్‌ ద్వారా అంతరిక్ష యాత్రకు బయలుదేరనున్నారు. అయితే ‘వర్జిన్‌ గెలాక్టిక్‌’లో శిరీష కీలక పాత్ర పోషించినట్లే.. బ్లూ ఆరిజిన్‌ స్పేస్‌ రాకెట్‌ వెనుక ఓ భారతీయ సంతతి మహిళ కృషి దాగుంది. ఆమే.. 30 ఏళ్ల సంజల్‌ గవాండే.

‘ఆడపిల్లవి’ అంటూ చిన్న చూపు చూశారు!

ముంబయికి చెందిన సంజల్‌ ఇంజినీరింగ్‌లో ‘మెకానికల్‌’ సబ్జెక్టును ఎంచుకున్నప్పుడు ‘ఆడపిల్లవి.. నీకెందుకు ఈ సబ్జెక్ట్‌?!’ అని చాలామంది వెనక్కి లాగేందుకు ప్రయత్నించారు. తల్లిదండ్రులు కూడా ‘నీకెందుకే తల్లీ’ అని నచ్చజెప్పే ప్రయత్నం చేశారు. కానీ సంజల్‌ మాత్రం తన మనసు చెప్పిన మాటే విన్నది. ఆ ఆసక్తితోనే అంతరిక్ష రంగంలో కూడా అద్భుతాలు సృష్టించాలనుకుంది. ‘బ్లూ ఆరిజిన్‌’ సంస్థలో సిస్టమ్‌ ఇంజినీర్‌గా ఉద్యోగం సంపాదించింది. ఇప్పుడు ఆ సంస్థ అధినేత జెఫ్‌ బెజోస్‌ ప్రతిష్ఠాత్మకంగా చేపట్టిన అంతరిక్ష యాత్రలోనూ ప్రముఖ పాత్ర పోషించిందీ సూపర్‌ వుమన్‌. ఇందులో భాగంగా ‘న్యూ షెపర్డ్‌’ రాకెట్‌ నిర్మాణంలో ఇంజినీర్‌గా కీలక బాధ్యతలు నిర్వర్తించింది సంజల్‌.

అంతరిక్షంపై ఆసక్తితో!

ముంబయిలోని కల్యాణ్‌ ప్రాంతంలో పుట్టి పెరిగింది సంజల్‌. తల్లి సురేఖ MTNL లో పనిచేసి ఉద్యోగ విరమణ పొందారు. తండ్రి అశోక్‌ మున్సిపల్‌ కార్పొరేషన్‌ అధికారిగా విధులు నిర్వర్తించి రిటైర్ అయ్యారు. కల్యాణ్‌లోనే పన్నెండో తరగతి వరకు చదివిన సంజల్‌ ముంబయి యూనివర్సిటీలో మెకానికల్‌ ఇంజినీరింగ్‌ పూర్తి చేసింది. 2011 తర్వాత అమెరికాకు వెళ్లిపోయింది. అక్కడి మిచిగాన్ టెక్నాలజీ యూనివర్సిటీ నుంచి మాస్టర్స్‌లో పట్టా అందుకుంది. చదువు పూర్తైన వెంటనే విస్కాన్సిన్‌లోని మెర్క్యురీ మెరైన్‌ సంస్థలో ఉద్యోగం సంపాదించింది. అక్కడ మూడేళ్ల పాటు పనిచేసిన తర్వాత క్యాలిఫోర్నియాలో టొయోటా రేసింగ్‌ డెవలప్‌మెంట్‌ సంస్థలో చేరింది. అక్కడ పనిచేస్తుండగానే అంతరిక్షయానంపై ఆసక్తి పెంచుకుంది సంజల్‌. ఈ క్రమంలో పైలట్‌గా శిక్షణ తీసుకోవడమే కాకుండా లైసెన్స్‌ కూడా సంపాదించింది.

‘నాసా’లో నిరాశే ఎదురైనా!

అంతరిక్ష రంగంలో పనిచేయాలనే సంకల్పంతో ప్రతిష్ఠాత్మక ‘నాసా’లో ఇంజినీర్‌ ఉద్యోగానికి దరఖాస్తు చేసుకుంది సంజల్‌. కానీ కొన్ని వ్యక్తిగత కారణాలతో ఆ ఉద్యోగానికి అర్హత సాధించలేకపోయింది. అయితే నిరాశ పడకుండా జెఫ్‌ బెజోస్‌కు చెందిన బ్లూ ఆరిజిన్‌ సంస్థలో సిస్టమ్స్‌ ఇంజినీర్‌గా అవకాశం దక్కించుకుంది. తాజాగా ఆ సంస్థ చేపట్టిన రోదసీ యాత్రలోనూ భాగస్వామురాలైందామె. బెజోస్‌తో పాటు మరో ముగ్గురు ప్రయాణించనున్న ‘న్యూ షెపర్డ్‌’ రాకెట్‌ నిర్మాణంలో ఇంజినీర్‌గా కీలక పాత్ర పోషించిందీ ముంబయి లేడీ. ‘అంతరిక్ష రంగంలో పనిచేయాలన్నది నా చిన్ననాటి కల. అది సాకారమవుతున్నందుకు ఎంతో సంతోషంగా ఉంది. బ్లూ ఆరిజిన్‌ సంస్థ చేపట్టిన ప్రయోగంలో భాగమైనందుకు గర్వపడుతున్నాను’ అని ఈ సందర్భంగా చెప్పుకొచ్చిందీ యువ ఇంజినీర్‌.

మమ్మల్ని గర్వపడేలా చేసింది!

ఈ సందర్భంగా సంజల్‌ తల్లి సురేఖ మాట్లాడుతూ.. ‘చిన్నప్పటి నుంచి నా కూతురు నెమ్మదస్తురాలు.. కానీ చదువులో మాత్రం చాలా చురుగ్గా ఉండేది. తనకు డ్రాయింగ్‌పై ఆసక్తి ఎక్కువ. ఈ క్రమంలో ఎన్నో బహుమతులు కూడా గెలుచుకుంది. ఈ నైపుణ్యాలే తను మెకానికల్‌ ఇంజినీరింగ్‌ సబ్జెక్టు ఎంచుకున్నప్పుడు కూడా ఉపయోగపడ్డాయి. అయితే ఆ సమయంలో ‘అమ్మాయిలకు మెకానికల్‌ ఇంజినీరింగ్‌ ఎందుక’ని చాలామంది తనను నిరుత్సాహ పరిచారు. ‘ఈ రంగంలో ఉండే శ్రమను భరించగలిగే శక్తి నా కూతురుకు ఉందా?’ అని నేను కూడా చాలాసార్లు ఆలోచించాను. అయినా మా అమ్మాయి ధైర్యంగా ముందుకు అడుగేసింది. ఏరోస్పేస్‌ రాకెట్లు డిజైన్‌ చేయాలన్నది తన చిరకాల కోరిక. ‘న్యూ షెపర్డ్‌’ రాకెట్‌తో ఆ కలను సాకారం చేసుకుంది. మా కుటుంబ సభ్యులందరినీ గర్వపడేలా చేసింది’ అంటూ పుత్రికోత్సాహంతో ఉప్పొంగిపోతున్నారామె.


మరిన్ని

ఇంటి పేరుతో కాదు... ఇది నా స్వయంకృషి...!

నాన్న ప్రముఖ నటుడు దగ్గుబాటి వెంకటేశ్‌. ఇక తాత, పెదనాన్న, అన్న... ఇలా ఆ ఇంట్లో వాళ్ల పేర్లు చెప్పక్కర్లేదు. వారి పేర్లు ఉపయోగించుకుంటే బోలెడు గుర్తింపు. కానీ ఆమె మాత్రం... తన అభిరుచి, సృజనాత్మకత, శ్రమలనే పెట్టుబడిగా గుర్తింపు సాధించాలనుకుంది. తనే వెంకటేశ్‌ పెద్ద కుమార్తె ఆశ్రిత. తన లక్ష్యం దిశగా కృషి చేస్తూ... ఇన్‌స్టాగ్రాం, యూట్యూబ్‌ల్లో లక్షల్లో అభిమానుల్ని సంపాదించుకుంది. ఇటీవల ఇన్‌స్టాగ్రాంలో ఎక్కువ సంపాదిస్తున్న సెలబ్రిటీల జాబితాను హోపర్‌డాట్‌కాం సంస్థ విడుదల చేసింది. అందులో ఆశ్రిత అంతర్జాతీయంగా 377, ఆసియాలో 27వ ర్యాంకులు సాధించింది. ఈ సందర్భంగా వసుంధర ఆమెతో ముచ్చటించింది.

‘స్పెల్లింగ్స్‌’ చెప్పి సెన్సేషనయ్యారు!

పిల్లల్లో ఇంగ్లిష్‌ నైపుణ్యాలను పరీక్షించడానికి అమెరికాలో ఏటా నేషనల్‌ స్పెల్లింగ్‌-బీ పోటీలు నిర్వహిస్తోన్న సంగతి తెలిసిందే. ఎంతో ప్రతిష్ఠాత్మకంగా జరిగే ఈ పోటీల్లో వేలాదిమంది చిన్నారులు పాల్గొంటారు. తల్లిదండ్రులు కూడా తమ పిల్లలను ఈ పోటీలకు అన్ని రకాలుగా సిద్ధం చేస్తూ ప్రోత్సహిస్తుంటారు. ఇక ఈసారి నిర్వహించిన స్పెల్లింగ్‌-బీ పోటీల్లో లూసియానాకు చెందిన 14 ఏళ్ల జైలా అవంత్‌ గార్డే విజేతగా నిలిచింది. దీంతో 93 ఏళ్ల ఈ కంటెస్ట్‌ చరిత్రలో ఈ ట్రోఫీ నెగ్గిన మొదటి ఆఫ్రికన్‌ అమెరికన్‌గా, రెండో నల్లజాతీయురాలిగా చరిత్ర సృష్టించిందీ యంగ్‌ గర్ల్‌.

కథ చెబుతాను... ఊ కొడతారా..!

రాత్రయిందంటే చాలు.. బామ్మ చెప్పే నీతికథలు వింటూ నిద్రలోకి జారుకోవడం మనందరికీ చిన్ననాటి ఓ మధుర జ్ఞాపకం! అప్పుడంటే చాలావరకు ఉమ్మడి కుటుంబాలు కాబట్టి ఇది వర్కవుట్‌ అయింది.. ఇప్పుడు వృత్తి ఉద్యోగాల రీత్యా చాలామంది ఇంట్లో పెద్దవాళ్లు, కన్న వాళ్ల నుంచి దూరంగా వచ్చేస్తున్నారు. దీంతో పిల్లలు వాళ్ల గ్రాండ్‌పేరెంట్స్‌ని, వాళ్లు చెప్పే బోలెడన్ని కథల్ని మిస్సవుతున్నారు. ఇలాంటి అనుభవమే తన చెల్లెలికీ ఎదురైందంటోంది 18 ఏళ్ల ప్రియల్ జైన్‌. అది చూసి ఆలోచనలో పడిపోయిన ఆమె.. నీతి కథలు చెప్పే ఓ ప్లాట్‌ఫామ్‌కు శ్రీకారం చుట్టింది. చిన్నారులకు బామ్మ దగ్గర లేని లోటుని తన వెబ్‌సైట్ తీరుస్తుందంటోన్న ఈ యంగ్‌ ఆంత్రప్రెన్యూర్‌ కథేంటో మనమూ తెలుసుకుందాం రండి..

చిన్నప్పటి కల.. ఇలా సాధించేసింది!

ఆడవారు అనుకుంటే ఏదైనా సాధిస్తారు... వారికి కావల్సిందల్లా కాసింత ప్రోత్సాహం. ఎవరి సహకారం ఉన్నా, లేకున్నా తల్లిదండ్రులు, తోడబుట్టిన వారి సహకారం మాత్రం ఉంటే చాలు... అమ్మాయిలకు అసలు తిరుగుండదు. అన్నింటా విజయాలే సాధిస్తారు. పలువురికి ఆదర్శంగా నిలుస్తారు. అందుకు తాజా ఉదాహరణే 24 ఏళ్ల మావ్యా సూదన్‌. జమ్మూకశ్మీర్‌లోని ఓ మారుమూల గ్రామానికి చెందిన ఈ యువతి ఇటీవల ఇండియన్‌ ఎయిర్‌ ఫోర్స్‌ ఫైటర్‌ పైలట్‌గా నియమితురాలైంది. ఈ నేపథ్యంలో దేశం మొత్తంమీద ఈ అవకాశం దక్కించుకున్న 12 వ మహిళగా, మొదటి కశ్మీరీ మహిళగా గుర్తింపు పొందిందీ యంగ్‌ సెన్సేషన్.

ఆరోగ్యమస్తు

మరిన్ని

అనుబంధం

మరిన్ని

'స్వీట్' హోం

మరిన్ని

వర్క్ & లైఫ్

మరిన్ని

సూపర్ విమెన్

మరిన్ని

బ్యూటీ & ఫ్యాషన్

మరిన్ని