‘అంధీ’ అంటూ హేళన చేశారు.. పరుగుతో సమాధానం చెప్పింది! - soldier wife eyes medal at tokyo paralympics
close
Published : 07/07/2021 19:41 IST

‘అంధీ’ అంటూ హేళన చేశారు.. పరుగుతో సమాధానం చెప్పింది!

Photo: Twitter

ఆ అమ్మాయి నెలలు నిండకుండానే జన్మించింది. అది కూడా కొసరంత కంటి చూపుతో..! దీనికి తోడు తనకు చెవులు కూడా పూర్తిగా ఏర్పడలేదు. ఇలా ఆ పసిపాప పరిస్థితి చూసి వైద్యులు కూడా చేతులెత్తేశారు. చివరకు ఏడు నెలల పాటు ఇంక్యుబేటర్‌లో ఉంచి చికిత్స అందిస్తే కానీ సాధారణ స్థితికి రాలేదామె. అలా చిన్నప్పుడే చావుతో పోరాడి గెలిచి నిలిచిన ఆ అమ్మాయి.. నేడు అదే పోరాట స్ఫూర్తితో ఒలింపిక్స్‌ బెర్తు దక్కించుకుంది. ఆమే.. దిల్లీకి చెందిన సిమ్రన్‌ శర్మ. తాజాగా టోక్యో పారాలింపిక్స్‌లో 100 మీటర్ల పరుగులో బెర్తు ఖరారు చేసుకొని.. ఈ ఘనత సాధించిన తొలి భారతీయ మహిళగా రికార్డు పుటల్లోకి ఎక్కింది.

భర్త ప్రోత్సాహంతో..!

వెన్ను తట్టి ప్రోత్సహిస్తే ఆకాశాన్నైనా అందుకుంటారు ఆడవారు. అందులోనూ కట్టుకున్న భర్త అండ లభిస్తే ఇక వారికి తిరుగనేది ఉండదు. సిమ్రన్‌ విషయంలో ఈ మాటలు మరోసారి నిజమయ్యాయి. ఎక్కువ దూరం చూడలేని సిమ్రన్‌ను పెద్ద మనసుతో మనువాడాడు ఆర్మీ జవాను నాయక్‌ గజేంద్ర సింగ్‌. భర్తగా బాధ్యతలు తీసుకున్న తర్వాత తన అర్ధాంగి అభిరుచిని తెలుసుకున్నాడు. ఈ క్రమంలోనే పారా అథ్లెట్‌గా తన భార్య కలను సాకారం చేసేందుకు కోచ్‌గా మారాడు. ఆమె అథ్లెటిక్‌ ట్రైనింగ్ కోసం ఇల్లు సైతం అమ్మాడు. అప్పులు కూడా చేశాడు.

‘అంధీ’ అని అవహేళన చేశారు!

ఇటీవల దిల్లీలోని జవహర్‌లాల్‌ నెహ్రూ స్టేడియంలో టోక్యో పారాలింపిక్స్ అర్హత పోటీలు జరిగాయి. ఈ పోటీల్లో 100 మీటర్ల దూరాన్ని 12 సెకన్లలో పూర్తి చేసింది సిమ్రన్‌. ఈ క్రమంలోనే పారాలింపిక్స్‌కు అర్హత సాధించి.. ఈ ఘనత దక్కించుకున్న తొలి భారతీయ మహిళగా చరిత్ర సృష్టించింది. ‘పారాలింపిక్స్ లాంటి ప్రతిష్ఠాత్మక క్రీడల్లో భారతదేశానికి ప్రాతినిథ్యం వహిస్తానని కలలో కూడా అనుకోలేదు. ఈ ప్రయాణంలో ఎన్నో అవహేళనలు, అవమానాలు ఎదుర్కొన్నాను. చాలామంది నన్ను ‘అంధీ (గుడ్డిది)’ అని పిలిచేవారు. నా తల్లిదండ్రుల ఆర్థిక పరిస్థితి అంతంత మాత్రమే. అందుకే అథ్లెటిక్స్‌లో ఆసక్తి ఉన్నప్పటికీ అందులో శిక్షణ పొందలేకపోయాను. అప్పుడే చీకటి నిండిన నా జీవితంలోకి వెలుగులా వచ్చారు మావారు. ఆయన ప్రోత్సాహం వల్లే నేను ఈ స్థాయికి చేరుకున్నాను’ అని అంటోందీ పారా అథ్లెట్.

పెళ్లైన మరుసటి రోజే..!

సిమ్రన్‌, గజేంద్ర సింగ్‌ 2017లో వివాహబంధంతో ఒక్కటయ్యారు. ‘జవహర్‌లాల్ నెహ్రూ స్టేడియంలో ప్రాక్టీస్‌ చేస్తున్న సమయంలో ఒకసారి గజేంద్ర సింగ్‌ను కలిశాను. ఆయన కూడా ఓ అథ్లెట్‌. క్రీడలపై మంచి అవగాహన ఉంది. ఈ క్రమంలోనే ఆట కోసం నేను పడుతున్న తాపత్రయాన్ని బాగా అర్థం చేసుకున్నారు. పెళ్లైన మరుసటి రోజే నన్ను జిమ్‌కు తీసుకెళ్లారు. ఇల్లు అమ్మి ఈ క్రీడలో నాకు శిక్షణ కూడా ఇప్పించారు. ట్రైనింగ్‌లో భాగంగా రోజూ ఆయనే నన్ను స్టేడియానికి తీసుకెళ్లేవారు. ఇలా సుమారు నాలుగేళ్ల పాటు మా జీవితాల్ని ఆటకు అంకితం చేశాం. ఈ కష్టానికి ప్రతిఫలమే పారాలింపిక్స్‌ బెర్తు. ఈ పోటీల్లో పతకం సాధించేందుకు నా శాయశక్తులా కృషి చేస్తాను’ అని అంటోంది సిమ్రన్.

తండ్రి వెంటిలేటర్‌పై ఉండగానే!

దిల్లీకి చెందిన ఓ మధ్య తరగతి కుటుంబంలో పుట్టింది సిమ్రన్‌. ముగ్గురు సంతానంలో ఆమె అందరి కంటే చిన్నవారు. ఈ క్రమంలో 2019లో తన తండ్రి వెంటిలేటర్‌పై ఉండగానే ప్రపంచ ఛాంపియన్‌షిప్‌ పోటీల్లో పాల్గొంది సిమ్రన్‌. ఫైనల్స్‌ వరకు వెళ్లి సత్తా చాటింది. ఆ పోటీలు ముగిసిన వెంటనే ఆమె తండ్రి కన్నుమూశారు. అదే ఏడాది చైనా గ్రాండ్‌ ప్రిక్స్‌ పోటీల్లో స్వర్ణ పతకం గెల్చుకుందీ సూపర్‌ వుమన్‌. ఇక ఈ ఏడాది ఫిబ్రవరిలో దుబాయి వేదికగా జరిగిన వరల్డ్‌ పారా గ్రాండ్‌ ప్రిక్స్‌లోనూ బంగారు పతకం సాధించింది.

అందుకే అప్పులు చేశాను!

ఈ క్రమంలో సిమ్రన్‌ను వెన్నుతట్టి ప్రోత్సహిస్తోన్న భర్త గజేంద్ర సింగ్‌ మాట్లాడుతూ- ‘నా భార్యకు దృష్టి లోపం ఉన్నప్పటికీ ఏ విషయాన్నైనా వెంటనే పసిగడుతుంది. ఆమెకు పరిశీలనా శక్తి ఎక్కువ. దేశం తరఫున పతకాలు గెలవాలన్న ఆకాంక్ష ఆమె అణువణువునా నిండి ఉంది. ఈ క్రమంలో సిమ్రన్‌ శిక్షణ కోసం ప్రభుత్వంతో పాటు ఇండియన్‌ ఆర్మీ మాకు సహాయ సహకారాలు అందిస్తున్నాయి. అయితే అవి సరిపోవడం లేదు. అందుకే ఇంటిని అమ్మేశాను. బ్యాంకు నుంచి రూ.3 లక్షల రుణం తీసుకోవడంతో పాటు మరికొందరు స్నేహితుల దగ్గర అప్పులు చేశాను. ప్రస్తుతానికి ఈ సమస్యలు పెద్దగా కనిపించచ్చు. కానీ ఒకసారి ఆమె పతకంతో తిరిగి వస్తే.. ఆ సంతోషం ముందు ఈ కష్టాలన్నీ చిన్నవైపోతాయి. ఈ సందర్భంగా నా సతీమణిలా ఆటల్లో రాణిస్తోన్న మహిళలందరికీ ఒక విషయం చెప్పాలనుకుంటున్నా.. ‘ఏ పరిస్థితుల్లోనూ వెనకడుగు వేయద్దు. ఆత్మవిశ్వాసం కోల్పోవద్దు. కష్టపడండి. మీపై మీరు నమ్మకం పెంచుకోండి’.. అని చెబుతున్నారు.

మరిన్ని

నారీ... వ్యాయామ దారి!

ఇంట్లో పనే ఎక్సర్‌సైజు... ఒక గృహిణి అభిప్రాయం. ఆఫీసుకెళ్లొచ్చే సరికే టైం అయిపోతుంది. మళ్లీ జిమ్‌కు వెళ్లే తీరిక ఎక్కడిది? ఒక ఉద్యోగిని ఆవేదన. జిమ్‌ కెళ్లినా అక్కడ మగవాళ్లతో పాటు చేయలేం... ఇదో యువతి సమస్య... ఆరోగ్యాన్ని కాపాడుకోవాలనే ఆలోచన ఉంటే మార్గాలు బోలెడు ఉన్నాయంటున్నారు...జీరోసైజ్‌ లేదా సన్నగా, నాజూగ్గా ఉండాల్సిన అవసరం సినీతారలు, మోడల్స్‌కు మాత్రమే. మేమెందుకు నోరు కట్టేసుకోవాలి, కసరత్తులంటూ చెమటోడ్చాలి అనే భావన చాలా మంది మహిళల్లో ఉండేది. గృహిణులకు ఇంటిపనే సరిపోతుందిలే’ అనే అపోహ ఉండేది. ఇప్పుడు మహిళలకూ ఉద్యోగ, ఉపాధి అవకాశాలు పెరగటంతో జీవనశైలిలో మార్పులు వచ్చాయి.

తరువాయి

చదువుల రాణి.. పసిడి కొల్లగొట్టింది..!

సాధారణంగా చదువులో ముందున్న వారు ఆటల్లో వెనకబడతారు.. అదే ఆటల్లో ముందున్న వారు చదువులో రాణించరు.. అంటుంటారు. కానీ చదువులో, ఆటల్లో.. రెండింట్లోనూ సత్తా చాటే వారు చాలా అరుదుగానే ఉంటారు. ఆస్ట్రియా సైక్లిస్ట్‌ అన్నా కిసెనోఫర్‌ కూడా అలాంటి మహిళే! వృత్తిరీత్యా గణిత విద్యావేత్త అయిన ఆమె.. అండర్‌ డాగ్‌గా టోక్యో ఒలింపిక్స్‌ బరిలోకి దిగింది. అందరి అంచనాల్ని తలకిందులు చేస్తూ ఫైనల్‌ ఫేవరెట్‌ను చిత్తు చేసి పసిడి పతకాన్ని కొల్లగొట్టింది. ఫలితంగా 125 ఏళ్లలో సైక్లింగ్‌ విభాగంలో ఒలింపిక్స్‌ పతకం గెలుచుకున్న తొలి ఆస్ట్రియా అథ్లెట్‌గా చరిత్ర సృష్టించింది. దీంతో ఆమె పేరు ప్రపంచమంతా మార్మోగిపోతోంది.

తరువాయి

సైకిల్‌ తొక్కితే రాళ్లు విసిరారు.. చంపేస్తామన్నారు!

అఫ్గానిస్థాన్‌కు చెందిన ఆమె చిన్నతనంలోనే సైకిల్‌ నేర్చుకుంది. అందులోనే జీవితాన్ని వెతుక్కోవాలనుకుంది. కానీ అక్కడి తాలిబన్లు, మత ఛాందసవాదులు ‘ఆడపిల్లలు సైకిల్‌ తొక్కడమేంటి?’ అంటూ ఆమె ఆశయానికి అడ్డుపడ్డారు. ధైర్యం చేసి సైకిల్‌తో రోడ్డుపై కొస్తే రాళ్లు విసిరారు. చంపేస్తామని బెదిరించారు. అందుకే ఉన్న వూరును విడిచిపెట్టి ప్రాణాలు అరచేతిలో పెట్టుకుని ఫ్రాన్స్‌కు వలస వెళ్లిపోయింది. అక్కడే తన సైక్లింగ్‌ లక్ష్యానికి మెరుగులు దిద్దుకుంది. ప్రతిష్ఠాత్మక ఒలింపిక్స్‌లో శరణార్థుల జట్టు తరఫున పాల్గొనే సువర్ణావకాశం సొంతం చేసుకుంది. ఆమే 24 ఏళ్ల మసోమా అలీ జాదా.

తరువాయి

సృజనాత్మక పరిష్కారానికి అరుదైన పురస్కారం!

యూరోపియన్‌ ఇన్వెంటర్‌ అవార్డ్‌.. వివిధ రంగాల్లో ఆవిష్కరణలు చేసి ఓ సరికొత్త ట్రెండ్‌ క్రియేట్‌ చేసిన వారికి ఏటా అందించే ప్రతిష్ఠాత్మక పురస్కారమిది! ఐరోపాతో పాటు ఇతర దేశాల వారు చేసిన అద్భుత ఆవిష్కరణల్ని గుర్తించి.. వాటి సృష్టికర్తలకు బహూకరించే ఈ పురస్కారం ఈసారి భారత సంతతికి చెందిన రసాయన శాస్త్రవేత్త సుమితా మిత్రాను వరించింది. ‘నాన్‌ యూరోపియన్‌ పేటెంట్‌ ఆఫీస్‌ కంట్రీస్‌’ విభాగం కింద యూరోపియన్‌ పేటెంట్‌ ఆఫీస్‌ (EPO) ఆమెకు ఇటీవలే ఈ అవార్డు అందించింది. దంత వైద్యంలో భాగంగా ఆమె చేసిన ఓ అసాధారణ ఆవిష్కరణతో ఎంతోమంది దంత సమస్యలకు పరిష్కారం దొరికినట్లయింది. ఈ నేపథ్యంలోనే ఈ అరుదైన అవార్డు అందుకున్న సందర్భంగా ఈ ఇండో-అమెరికన్‌ గురించి కొన్ని విశేషాలు మీకోసం..

తరువాయి

బ్యూటీ & ఫ్యాషన్

మరిన్ని

ఆరోగ్యమస్తు

మరిన్ని

అనుబంధం

మరిన్ని

యూత్‌ కార్నర్

మరిన్ని

మంచిమాట


'స్వీట్' హోం

మరిన్ని

వర్క్‌ & లైఫ్

మరిన్ని