ఈ పెళ్లి కూతురి యుద్ధ విన్యాసాలు చూశారా? - tamilnadu bride entertains guests with her martial arts skills during wedding
close
Updated : 04/07/2021 15:38 IST
Facebook Share Twitter Share WhatsApp Share Telegram Share Link Share

ఈ పెళ్లి కూతురి యుద్ధ విన్యాసాలు చూశారా?

Photo: Screengrab

‘పోలీసులు, చట్టాలున్నా ప్రస్తుత పరిస్థితుల్లో మహిళలు తమను తాము రక్షించుకోవడం ఎంతో ముఖ్యం. అందుకోసం మార్షల్ ఆర్ట్స్‌ లాంటి ఆత్మరక్షణ విద్యల్లో ఆరితేరడం అవసరం. అప్పుడే అనుకోకుండా వచ్చిన ఆపదను అమ్మాయిలు ధైర్యంగా ఎదుర్కోగలుగుతారు..’ అంటోంది ఓ యువతి. ఆత్మరక్షణ విద్యల ప్రాధాన్యం తెలియజేసేందుకు తన వివాహ వేడుకనే వేదికగా చేసుకుంది. ఇందులో భాగంగా పెళ్లి దుస్తుల్లోనే కత్తిసాము, కర్రసాము వంటి ప్రదర్శనలు నిర్వహించి సోషల్‌ మీడియాలో వైరల్‌గా మారింది.

పెళ్లి దుస్తుల్లో మార్షల్‌ ఆర్ట్స్!

సాధారణంగా పెళ్లంటే ఆటలు, పాటలు, బంధువులు, స్నేహితుల సందడి, విందు భోజనాలు, ఫొటోషూట్లు.. ఇలా ఎన్నో కార్యక్రమాలు ఉంటాయి. అయితే తమిళనాడులోని తిరుకోళూరు గ్రామానికి చెందిన 22 ఏళ్ల నిషా మాత్రం తన పెళ్లితో సమాజానికి ఓ సందేశం ఇవ్వాలనుకుంది. ఈ క్రమంలో తనకు తెలిసిన ‘సిలంబం’, ‘సురుల్‌ వాల్‌ వీచు’, ‘ఆది మురై’, ‘కలరిపయట్టు’.. వంటి సంప్రదాయ యుద్ధ విద్యలన్నింటినీ పెళ్లి వేడుకలో భాగంగా ప్రదర్శించింది. సంప్రదాయ చీరకట్టులో నిషా ప్రదర్శించిన విన్యాసాలకు అతిథులందరూ ఈలలు వేస్తూ, చప్పట్లు కొడుతూ ఆమెను అభినందించారు. వధువు ఉత్సాహాన్ని చూసి ఆమె స్నేహితులు కూడా ఈ ప్రదర్శనలో పాలుపంచుకోవడం విశేషం.

పదునైన కత్తులు తిప్పుతూ..

పెళ్లికూతురుగా ముస్తాబవ్వడమంటే.. హెయిర్‌ స్టైల్స్‌, మేకప్‌, వస్త్రధారణ, ఆభరణాలు, పూలు.. ఇలా ఎన్నో జాగ్రత్తలు తీసుకుంటారు వధువులు. అదేవిధంగా పెళ్లి తంతు పూర్తయ్యే వరకు తాజాగా, అందంగా కనిపించాలని కూడా కోరుకుంటారు. కానీ ఇవేవీ ఆలోచించలేదు నిషా. సంప్రదాయ సిల్కు చీర, మెడలో భారీ పూలదండలు, ఒంటినిండా ఆభరణాలతోనే మార్షల్‌ ఆర్ట్స్‌ విన్యాసాలు చేసింది. ముఖ్యంగా ‘సురుల్‌ వాల్‌ వీచు’ అనే యుద్ధ విద్యలో భాగంగా పదునైన కత్తులతో ఆమె చేసిన ప్రదర్శన అక్కడున్న వారందరినీ కట్టిపడేసింది.

అవగాహన కోసమే!

బీకాంలో డిగ్రీ పూర్తి చేసిన నిషా ఎప్పటికైనా పోలీస్‌ అవ్వాలనుకుంటోందట! అందుకోసమే మూడేళ్ల క్రితం నుంచే మార్షల్‌ ఆర్ట్స్‌లో శిక్షణ కూడా తీసుకుంటోంది. తల్లి మణి, తండ్రి పెరుమాల్‌ కూడా ఆమెను ఈ దిశగా ప్రోత్సహిస్తున్నారు. ఈ క్రమంలోనే జిల్లాస్థాయి, రాష్ట్రస్థాయి మార్షల్‌ ఆర్ట్స్‌ పోటీల్లోనూ సత్తా చాటి బహుమతులు కూడా గెలుచుకుందీ నవ వధువు. ‘నేను ఎప్పుడైనా టీషర్ట్‌, ట్రాక్‌ సూట్‌ ధరించే మార్షల్‌ ఆర్ట్స్‌ చేసేదాన్ని. అయితే ఇలా పెళ్లికూతురు అలంకరణలో వీటిని చేయడం ఎంతో కష్టంతో కూడుకున్న పని. మహిళలకు ఆత్మరక్షణ విద్యలపై అవగాహన కల్పించడానికే ఈ ప్రదర్శన నిర్వహించాను.’

అమ్మ ప్రోత్సాహంతోనే!

‘మా అమ్మ అందించిన ప్రోత్సాహంతోనే నేను మార్షల్‌ ఆర్ట్స్‌లో నైపుణ్యం సాధించాను. ఆమె ఇప్పుడు తన స్టూడెంట్స్‌కు కూడా యుద్ధ విద్యల్లో శిక్షణ ఇస్తోంది. పెళ్లి వేడుకలో నాతో పాటు ప్రదర్శనలో పాల్గొన్న వారిలో ఆమె దగ్గర శిక్షణ పొందుతోన్న విద్యార్థులు కూడా ఉన్నారు. ఇక నాతో పాటు మరో 80 మందికి యుద్ధ విద్యల్లో ఉచితంగా శిక్షణ అందిస్తోన్న నా కోచ్‌కి నేను ఎప్పటికీ రుణపడి ఉంటాను. గతేడాది జిల్లా స్థాయి సిలంబం పోటీల్లో మొదటి బహుమతి, రాష్ట్రస్థాయి పోటీల్లో మూడో స్థానంలో నిలిచాను..’ అని చెప్పుకొచ్చిందీ కొత్త పెళ్లి కూతురు.

అలాంటివి మళ్లీ జరగకూడదనే!

ఇక నిషా భర్త రాజ్‌కుమార్‌ మాట్లాడుతూ.. ‘పొల్లాచ్చి లాంటి హత్యాచార ఘటనలు మళ్లీ జరగకూడదని కోరుకుంటున్నాను. అమ్మాయిలు ఆత్మరక్షణ విద్యలు నేర్చుకోవాల్సిన అవసరాన్ని ఈ ఘటన చాటి చెప్పింది. అందుకే మా వివాహ వేడుకలో సాంస్కృతిక కార్యక్రమాలకు బదులు ఏదైనా సందేశమిచ్చే ప్రోగ్రాంలకు చోటిద్దామనుకున్నాం. అందులోనూ నా సతీమణి మార్షల్‌ ఆర్ట్స్‌లో నిష్ణాతురాలు కావడంతో ఆత్మరక్షణ విద్యలకు అవగాహన కల్పిద్దామని ఇద్దరం అనుకున్నాం. విజయవంతంగా అమలు చేశాం’ అంటూ తన భార్యామణిలో ఉన్న నైపుణ్యాల్ని ప్రశంసించాడాయన!

ఈ సందర్భంగా పెళ్లికూతురు అలంకరణలో నిషా చేసిన విన్యాసాలు సోషల్‌ మీడియాలో వైరలవడంతో నెటిజన్లు ఫిదా అవుతున్నారు. మంచి ఉద్దేశంతో ఆమె చేసిన మార్షల్‌ ఆర్ట్స్‌ ప్రదర్శనపై ప్రశంసల వర్షం కురిపిస్తున్నారు.


మరిన్ని

ఇంటి పేరుతో కాదు... ఇది నా స్వయంకృషి...!

నాన్న ప్రముఖ నటుడు దగ్గుబాటి వెంకటేశ్‌. ఇక తాత, పెదనాన్న, అన్న... ఇలా ఆ ఇంట్లో వాళ్ల పేర్లు చెప్పక్కర్లేదు. వారి పేర్లు ఉపయోగించుకుంటే బోలెడు గుర్తింపు. కానీ ఆమె మాత్రం... తన అభిరుచి, సృజనాత్మకత, శ్రమలనే పెట్టుబడిగా గుర్తింపు సాధించాలనుకుంది. తనే వెంకటేశ్‌ పెద్ద కుమార్తె ఆశ్రిత. తన లక్ష్యం దిశగా కృషి చేస్తూ... ఇన్‌స్టాగ్రాం, యూట్యూబ్‌ల్లో లక్షల్లో అభిమానుల్ని సంపాదించుకుంది. ఇటీవల ఇన్‌స్టాగ్రాంలో ఎక్కువ సంపాదిస్తున్న సెలబ్రిటీల జాబితాను హోపర్‌డాట్‌కాం సంస్థ విడుదల చేసింది. అందులో ఆశ్రిత అంతర్జాతీయంగా 377, ఆసియాలో 27వ ర్యాంకులు సాధించింది. ఈ సందర్భంగా వసుంధర ఆమెతో ముచ్చటించింది.

‘స్పెల్లింగ్స్‌’ చెప్పి సెన్సేషనయ్యారు!

పిల్లల్లో ఇంగ్లిష్‌ నైపుణ్యాలను పరీక్షించడానికి అమెరికాలో ఏటా నేషనల్‌ స్పెల్లింగ్‌-బీ పోటీలు నిర్వహిస్తోన్న సంగతి తెలిసిందే. ఎంతో ప్రతిష్ఠాత్మకంగా జరిగే ఈ పోటీల్లో వేలాదిమంది చిన్నారులు పాల్గొంటారు. తల్లిదండ్రులు కూడా తమ పిల్లలను ఈ పోటీలకు అన్ని రకాలుగా సిద్ధం చేస్తూ ప్రోత్సహిస్తుంటారు. ఇక ఈసారి నిర్వహించిన స్పెల్లింగ్‌-బీ పోటీల్లో లూసియానాకు చెందిన 14 ఏళ్ల జైలా అవంత్‌ గార్డే విజేతగా నిలిచింది. దీంతో 93 ఏళ్ల ఈ కంటెస్ట్‌ చరిత్రలో ఈ ట్రోఫీ నెగ్గిన మొదటి ఆఫ్రికన్‌ అమెరికన్‌గా, రెండో నల్లజాతీయురాలిగా చరిత్ర సృష్టించిందీ యంగ్‌ గర్ల్‌.

కథ చెబుతాను... ఊ కొడతారా..!

రాత్రయిందంటే చాలు.. బామ్మ చెప్పే నీతికథలు వింటూ నిద్రలోకి జారుకోవడం మనందరికీ చిన్ననాటి ఓ మధుర జ్ఞాపకం! అప్పుడంటే చాలావరకు ఉమ్మడి కుటుంబాలు కాబట్టి ఇది వర్కవుట్‌ అయింది.. ఇప్పుడు వృత్తి ఉద్యోగాల రీత్యా చాలామంది ఇంట్లో పెద్దవాళ్లు, కన్న వాళ్ల నుంచి దూరంగా వచ్చేస్తున్నారు. దీంతో పిల్లలు వాళ్ల గ్రాండ్‌పేరెంట్స్‌ని, వాళ్లు చెప్పే బోలెడన్ని కథల్ని మిస్సవుతున్నారు. ఇలాంటి అనుభవమే తన చెల్లెలికీ ఎదురైందంటోంది 18 ఏళ్ల ప్రియల్ జైన్‌. అది చూసి ఆలోచనలో పడిపోయిన ఆమె.. నీతి కథలు చెప్పే ఓ ప్లాట్‌ఫామ్‌కు శ్రీకారం చుట్టింది. చిన్నారులకు బామ్మ దగ్గర లేని లోటుని తన వెబ్‌సైట్ తీరుస్తుందంటోన్న ఈ యంగ్‌ ఆంత్రప్రెన్యూర్‌ కథేంటో మనమూ తెలుసుకుందాం రండి..

చిన్నప్పటి కల.. ఇలా సాధించేసింది!

ఆడవారు అనుకుంటే ఏదైనా సాధిస్తారు... వారికి కావల్సిందల్లా కాసింత ప్రోత్సాహం. ఎవరి సహకారం ఉన్నా, లేకున్నా తల్లిదండ్రులు, తోడబుట్టిన వారి సహకారం మాత్రం ఉంటే చాలు... అమ్మాయిలకు అసలు తిరుగుండదు. అన్నింటా విజయాలే సాధిస్తారు. పలువురికి ఆదర్శంగా నిలుస్తారు. అందుకు తాజా ఉదాహరణే 24 ఏళ్ల మావ్యా సూదన్‌. జమ్మూకశ్మీర్‌లోని ఓ మారుమూల గ్రామానికి చెందిన ఈ యువతి ఇటీవల ఇండియన్‌ ఎయిర్‌ ఫోర్స్‌ ఫైటర్‌ పైలట్‌గా నియమితురాలైంది. ఈ నేపథ్యంలో దేశం మొత్తంమీద ఈ అవకాశం దక్కించుకున్న 12 వ మహిళగా, మొదటి కశ్మీరీ మహిళగా గుర్తింపు పొందిందీ యంగ్‌ సెన్సేషన్.

ఆరోగ్యమస్తు

మరిన్ని

అనుబంధం

మరిన్ని

'స్వీట్' హోం

మరిన్ని

వర్క్ & లైఫ్

మరిన్ని

సూపర్ విమెన్

మరిన్ని

బ్యూటీ & ఫ్యాషన్

మరిన్ని