వీటిని తొక్కతోనే తినాలట! - these fruits and vegetable peels are safe to eat
close
Published : 16/07/2021 17:20 IST

వీటిని తొక్కతోనే తినాలట!

యాపిల్‌ తినేముందు దాని తొక్కపై మైనం ఉంటుందని పొట్టు తొలగిస్తాం..

జామకాయ తొక్క వగరుగా ఉంటుందని లోపలి గుజ్జు మాత్రమే తింటాం..

కమలాపండుని కచ్చాపచ్చాగా నమిలేసి తొక్క ఊసేస్తాం..

ఇలా కొన్ని పండ్లు, కాయగూరల తొక్క తొలగించి తినడం మనలో చాలామందికి అలవాటే! ఇక ప్రస్తుతం కరోనా భయం, ఆరోగ్యంపై అతిశ్రద్ధ కారణంగా ఇది మితిమీరిపోయింది. అయితే ఈ అలవాటు సంపూర్ణ పోషకాలను మన శరీరానికి అందకుండా చేస్తుందని చెబుతున్నారు నిపుణులు. నిజానికి పండ్లు/కాయగూరల్లో ఉండే పోషకాల్లో సుమారు 25-30 శాతం దాకా ఈ తొక్కలోనే ఉంటాయట! అందుకే చేజేతులా ఈ పోషకాల్ని పడేయకుండా కనీసం ఇప్పట్నుంచైనా ఆయా పండ్లు/కాయగూరల్ని తొక్కతోనే తినమంటున్నారు. మరి, ఇంతకీ ఏయే పండ్లు/కాయగూరల్ని తొక్కతో తినాలి? అలా తినడం వల్ల కలిగే ప్రయోజనాలేంటి? తెలుసుకుందాం రండి..

పొట్టుతోనే ఎందుకు..?!

తొక్క తొలగించిన పండ్లు, కాయగూరలతో పోల్చితే తొలగించని వాటిలో విటమిన్లు, ఖనిజాలు, మొక్కల ఆధారిత సమ్మేళనాలు పుష్కలంగా లభిస్తాయంటున్నారు నిపుణులు. ఉదాహరణకు.. తొక్క చెక్కేసిన యాపిల్‌ కంటే తొక్కతో కూడిన యాపిల్‌లో విటమిన్‌ ‘కె’ - 332 శాతం, విటమిన్‌ ‘ఎ’ - 142 శాతం, విటమిన్‌ ‘సి’ - 115 శాతం, క్యాల్షియం - 20 శాతం, పొటాషియం - 19 శాతం అధికంగా ఉంటాయట! అదే బంగాళాదుంపను తొక్కతో సహా ఉడికించడం వల్ల విటమిన్‌ ‘సి’ - 175 శాతం, పొటాషియం - 115 శాతం, ఫోలేట్‌ - 111 శాతం, మెగ్నీషియం-ఫాస్ఫరస్‌ 110 శాతం ఎక్కువగా శరీరానికి అందుతాయట! అంతేకాదు.. వీటి తొక్కలో పీచు, యాంటీ ఆక్సిడెంట్లు సైతం అధికంగానే ఉంటాయంటున్నారు నిపుణులు. పీచు కడుపు నిండిన భావన కలిగేలా చేసి ఆకలిని అదుపులో ఉంచుతుంది.. తద్వారా బరువు తగ్గచ్చు.

ఇక యాంటీ ఆక్సిడెంట్లు శరీరంలోని ఫ్రీరాడికల్స్‌తో పోరాడి వివిధ అనారోగ్యాలు/ఇన్ఫెక్షన్ల బారిన పడకుండా మనల్ని కాపాడతాయి. అందుకే ఇలా శరీరానికి సంపూర్ణ పోషకాలు అందాలన్నా, ఆరోగ్య ప్రయోజనాలు పొందాలన్నా పండ్లు/కాయగూరల్ని తొక్కతో పాటే తీసుకోవాలని చెబుతున్నారు.

 

ఏవేవి తొక్కతో తినాలి?!

* యాంటీ ఆక్సిడెంట్లు, ఫైటోన్యూట్రియంట్స్‌ నిండి ఉన్న యాపిల్స్‌ని తొక్కతో పాటే తీసుకోవడం వల్ల అల్జీమర్స్‌ సమస్యతో పోరాడే శక్తిని శరీరానికి అందించచ్చు. ముఖ్యంగా యాపిల్‌ తొక్కలో ఉండే Triterpenoids అనే సమ్మేళనాలు క్యాన్సర్‌ ముప్పును చాలా వరకు తగ్గిస్తాయని పలు అధ్యయనాల్లో తేలింది.

* పియర్‌ పండ్ల (బేరి పండ్లు)లో ఉండే ఫైబర్‌లో సగానికి సగం దాని తొక్కలోనే ఉంటుందంటున్నారు నిపుణులు. అలాగే ఇందులోని యాంటీ ఆక్సిడెంట్లు, యాంటీ ఇన్‌ఫ్లమేటరీ ఫైటోన్యూట్రియంట్లు శరీరానికి అందాలంటే తొక్కతో పాటే ఈ పండును తినాల్సి ఉంటుంది.

* మానసిక ఒత్తిళ్లను దూరం చేసే పండ్లలో ప్లమ్స్‌ ముందుంటాయి. వీటి తొక్కలో క్లోరోజెనికామ్లం అనే యాంటీ ఆక్సిడెంట్‌, విటమిన్‌ ‘సి’ పుష్కలంగా ఉంటాయి. ఇవి మలబద్ధకం, ఇతర జీర్ణ సంబంధిత సమస్యలను దూరం చేయడంలో కీలక పాత్ర పోషిస్తాయి.

* కేవలం కివీ పండ్ల గుజ్జును తినడం కంటే వీటిని తొక్కతో పాటే తీసుకుంటే మూడు రెట్లు ఫైబర్‌ని అధికంగా శరీరానికి అందించినట్లే అని చెబుతున్నారు నిపుణులు. ఇక ఈ తొక్కలో విటమిన్‌ ‘సి’ కూడా పుష్కలంగా లభిస్తుంది.

* కొవ్వు కణాల ఉత్పత్తిని అణచివేయడానికి, శరీరంలో పేరుకుపోయిన అనవసర కొవ్వు నిల్వల్ని కరిగించడానికి మామిడి పండు తొక్కలో ప్రత్యేక గుణాలుంటాయట! ఇక దీని తొక్కలో ఉండే కెరోటినాయిడ్స్‌, పాలీఫినోల్స్‌, ఒమేగా- 3, 6తో పాటు పాలీఅన్‌శ్యాచురేటెడ్‌ ఫ్యాటీ ఆమ్లాలు.. క్యాన్సర్‌, డయాబెటిస్‌, గుండె సంబంధిత సమస్యలన్నింటితో పోరాడతాయి. కాబట్టి పండ్లైనా, పచ్చి మామిడికాయ అయినా, ఆవకాయ తయారీలోనైనా.. పొట్టుతోనే దీన్ని తీసుకోవడం అత్యుత్తమం అంటున్నారు నిపుణులు.

* టొమాటోలను ఉడికించిన తర్వాత దాని తొక్కను వేరు చేసి గుజ్జును మాత్రమే తీసుకోవడం మనలో చాలామందికి అలవాటు. కానీ దాని తొక్కలో Naringenin అనే ఫ్లేవనాయిడ్‌ ఉంటుందట! ఇది శరీరంలో వాపును తగ్గించి వివిధ రకాల అనారోగ్యాల బారిన పడకుండా మనల్ని కాపాడుతుందని ఓ అధ్యయనంలో తేలింది.

* బంగాళాదుంపలు, చిలగడ దుంప, క్యారట్‌, బీట్‌రూట్‌.. వంటి దుంపల తొక్కలో ఫైబర్‌, ఐరన్‌, విటమిన్‌ ‘సి’, పొటాషియం, ఫోలేట్‌.. అధికంగా ఉంటాయి. ఇవన్నీ శరీరానికి అవసరమే కాబట్టి వీటిని తొక్కతో పాటే వండుకొని తీసుకోవాల్సి ఉంటుంది.

*చర్మ ఆరోగ్యానికి ఉపయోగపడే సిలికా, జీర్ణక్రియను మెరుగుపరిచే ఫైబర్‌ కీరాదోసె పొట్టులో పుష్కలంగా ఉంటాయట! అందుకే దీన్ని పొట్టుతో తీసుకోవడమే మేలంటున్నారు నిపుణులు.

 

వీటి తొక్క చెక్కేయాలి.. కానీ..!

నిమ్మ, బత్తాయి, కమలాఫలం.. వంటి పండ్ల తొక్కల్లో యాంటీ ఆక్సిడెంట్లు నిండి ఉంటాయి. అయితే వీటి తొక్క దళసరిగా ఉంటుంది కాబట్టి నేరుగా తినలేం.. త్వరగా జీర్ణమవదు కూడా! అలాగని ఈ తొక్కల్ని వృథాగా పడేయకుండా వాటిని ఎండబెట్టుకొని పొడి చేసుకొని వంటకాల్లో ఉపయోగించడం వల్ల పోషకాలు పూర్తిగా శరీరానికి అందుతాయి. అలాగే పుచ్చకాయ, తర్బూజా, గుమ్మడి.. తొక్కల్ని ఉడికించుకొని జామ్‌ తయారుచేసుకోవచ్చు.

అయితే ఆయా పండ్లు, కాయగూరల్ని తొక్కతో తీసుకునే ముందు వాటిని బాగా శుభ్రం చేయడం మాత్రం మర్చిపోవద్దు. ఈ క్రమంలో సబ్బునీటితో రుద్ది.. కుళాయి నుంచి నేరుగా వచ్చే నీటితో వాటిని శుభ్రం చేయచ్చు.. లేదంటే మార్కెట్లో దొరికే వెజిటబుల్‌/ఫ్రూట్‌ క్లీనర్స్‌ని సైతం ఉపయోగించచ్చు.

మరిన్ని

ఇంట్లో పదే పదే తాకే వాటిని ఇలా శుభ్రం చేయాల్సిందే!

ప్రస్తుత ప్రతికూల పరిస్థితుల్లో రోజూ మనం ఇంట్లో ఉన్నా, బయటికి వెళ్లొచ్చినా వ్యక్తిగత శుభ్రత పాటించడం, మనతో పాటు తెచ్చిన వస్తువుల్ని శానిటైజ్‌ చేయడం.. వంటివి కచ్చితంగా పాటిస్తున్నాం.. మరి, మనం ఇంట్లో పదే పదే తాకే వస్తువుల సంగతేంటి? మనం బయటికెళ్లినా అవి ఇంట్లోనే ఉంటున్నాయి కదా.. అంటారా? అయినా సరే.. వాటిని రోజూ శుభ్రం చేయాల్సిందే అంటున్నారు నిపుణులు. తద్వారా వాటిపై చేరే వైరస్‌, బ్యాక్టీరియా, క్రిములు ఒకరి నుంచి మరొకరికి అంటుకోకుండా జాగ్రత్తపడచ్చు. ఇంతకీ మనం ఇంట్లో తరచూ తాకే ప్రదేశాలు, వస్తువులేంటి? వాటిని ఎలా శానిటైజ్‌ చేయాలి? రండి తెలుసుకుందాం..!

తరువాయి

అందుకే టవల్స్ విషయంలోనూ శుభ్రంగా ఉండాల్సిందే!

ఉదయం నిద్ర లేచింది మొదలు.. రాత్రి నిద్రపోయే వరకు రోజులో ఎన్నోసార్లు ముఖాన్ని, చేతుల్ని కడుక్కుంటూ ఉంటాం. ఇలా కడిగిన ప్రతిసారీ కచ్చితంగా టవల్‌తో తుడుచుకోవాల్సిందే. ఇలా మనకు తెలియకుండానే రోజులో చాలాసార్లు టవల్‌ను వాడుతూనే ఉంటాం. మరి, మీరు నిత్యం ఉపయోగించే ఈ టవళ్లు బ్యాక్టీరియాలకు మంచి ఆవాసాలనే విషయం మీకు తెలుసా? కరోనా విలయ తాండవం చేస్తున్న నేపథ్యంలో - ప్రతి రోజూ మీరు ఉపయోగించే టవల్ విషయంలో ఎంతవరకు జాగ్రత్త వహిస్తున్నారు? ఇంతకీ టవళ్లను ఎప్పటికప్పుడు శుభ్రం చేసుకోకపోతే కలిగే నష్టాలేంటి..? వీటిని అధిగమించడానికి ఎలాంటి జాగ్రత్తలు తీసుకోవాలి?.. రండి తెలుసుకుందాం..

తరువాయి

మాడ్యులర్ కిచెన్ ఎలా ఉండాలంటే..

కొత్త ట్రెండ్స్ కేవలం ఫ్యాషన్‌కు మాత్రమే పరిమితం అనుకుంటే పొరపాటే. మనం కొత్తగా సిద్ధమవ్వడమే కాదు.. మన ఇంటినీ కొంగొత్త ఇంటీరియర్స్‌తో సరికొత్తగా మార్చేయవచ్చు. అందులోనూ.. ప్రస్తుతం మహిళలందరూ మారుతున్న ట్రెండ్స్‌కు అనుగుణంగా తమ ఇంటిని ట్రెండీగా, స్త్టెలిష్‌గా తీర్చిదిద్దుకోవాలని భావిస్తున్నారు కూడా.. ఈ నేపథ్యంలో చాలామంది మాడ్యులర్ కిచెన్స్‌కు ఓటేస్తున్నారు. అయితే వీటి నిర్మాణ క్రమంలో కొన్ని ముఖ్యమైన అంశాలు దృష్టిలో పెట్టుకుంటేనే వంటగది సౌకర్యవంతంగా నిర్మించుకోవడానికి అవకాశం ఉంటుందంటున్నారు ఇంటీరియర్ నిపుణులు. మరి, ఆ అంశాలేంటో మనమూ తెలుసుకుందాం రండి..

తరువాయి

కరోనా వేళ నగల్ని కూడా ఇలా శానిటైజ్ చేయాల్సిందేనట!

కరోనా కేసులు క్రమంగా తగ్గుతున్నంత మాత్రాన వైరస్‌ పీడ విరగడైంది అనుకోవడానికి లేదు.. ఎందుకంటే ఈ మాయదారి మహమ్మారి ఎప్పుడెలా విరుచుకుపడుతుందో ఎవరికీ అంతు చిక్కట్లేదు. అందుకే కొవిడ్‌ తగ్గుముఖం పట్టినా, టీకా వేసుకున్నా కనీస జాగ్రత్తలు పాటించాల్సిందే అని నిపుణులు పదే పదే చెబుతున్నారు. ఇక బయటి నుంచి తెచ్చిన ప్రతి వస్తువునూ శానిటైజ్‌ చేయాల్సిందే అంటున్నారు. మనం రోజూ ధరించే వివిధ రకాల ఆభరణాలూ ఇందుకు మినహాయింపు కాదంటున్నారు. ఎందుకంటే కరోనా వైరస్‌ లోహాలపై మూడు గంటల నుంచి మూడు రోజుల దాకా జీవించి ఉంటుందని సెంటర్స్‌ ఫర్‌ డిసీజ్‌ కంట్రోల్‌ అండ్‌ ప్రివెన్షన్‌ (సీడీసీ) సంస్థ చెబుతోంది. ఈ నేపథ్యంలో మనం రోజూ ధరించే ఆభరణాలను ఎలా శానిటైజ్‌ చేయాలో తెలుసుకుందాం రండి..

తరువాయి

బ్యూటీ & ఫ్యాషన్

మరిన్ని

ఆరోగ్యమస్తు

మరిన్ని

అనుబంధం

మరిన్ని

యూత్‌ కార్నర్

మరిన్ని

మంచిమాట


వర్క్‌ & లైఫ్

మరిన్ని

సూపర్‌ విమెన్

మరిన్ని