'ఆకాశమంత' సంతోషమిద్దాం..! - things to do your father feels most happy on fathers day
close
Updated : 19/06/2021 18:53 IST
Facebook Share Twitter Share WhatsApp Share Telegram Share Link Share

'ఆకాశమంత' సంతోషమిద్దాం..!

మన జీవితాన్ని నిలబెడతాడనే గట్టి 'నమ్మకం'..
ఆపదలో వెన్నంటే ఉంటాడనే 'ధైర్యం'..
అడగకుండానే అవసరం తీరుస్తాడనే 'భరోసా'..
తప్పు చేస్తే దండిస్తాడన్న 'భయం'..
హద్దుల్లో ఉండేలా చేసే 'క్రమశిక్షణ'..
ఇవన్నీ కలిస్తే 'నాన్న'.

పిల్లల అవసరాలను తీర్చి వారిని ప్రయోజకులుగా చేయడమే తన కర్తవ్యంగా భావిస్తాడు తండ్రి. పిల్లల్ని సంతోషంగా ఉంచడానికి ఎంత కష్టమైనా ఓర్చుకుంటాడు. తాను పడుతున్న ఇబ్బందులు తన కంటిపాపలకు తెలియకూడదనుకుంటాడు. ఎంతటి ఆపద ఎదురైనా కుంగిపోకుండా ధైర్యంగా నిలబడతాడు. జీవితంలో ఆయన చూసినన్ని ఒడిదొడుకులు ఇంకెవరూ చూసి ఉండకపోవచ్చు. అందుకే నాన్నే మనకి హీరో..! అలాంటి నాన్నని గౌరవించడానికే ఏటా జూన్ మూడో ఆదివారాన్ని ‘అంతర్జాతీయ పితృ దినోత్సవం’గా జరుపుకొంటున్నాం. ఈ క్రమంలో ఆ రోజున నాన్నకు ఆకాశమంత సంతోషాన్ని కలిగించాలంటే ఏం చేయాలో తెలుసుకుందామా..
ఇష్టమైన వ్యాపకంతో..
పొద్దున్నే లేచి కాఫీ / టీ తాగుతూ పేపర్ చదవడం.. జాగింగ్‌కి వెళ్లడం.. పొలంలో పనులు చేయడానికి ఉపక్రమించడం.. ఇలా ఉదయాన్నే లేచి ఏదో ఒకటి చేయడం నాన్నకి అలవాటుగా ఉండచ్చు. ఆ సమయంలో మీరు వారితో గడిపే కొన్ని క్షణాలైనా సరే రోజంతా వారిలో ఉత్సాహాన్ని నింపుతాయి. అందుకే ఉదయాన్నే నాన్న చేతికి పేపర్ అందించి, మీ చేతులతో చక్కటి కాఫీ లేదా టీ తయారు చేసివ్వండి. నాన్న జాగింగ్‌కి వెళ్తుంటే షూ అందించి మీరు కూడా ఆయనతో పాటు తోడు వెళ్లండి. లేదా పొలం పనుల్లో నాన్నకి సాయం చేయండి. ఈ సమయంలో మీరు నాన్నతో ఎన్నో విషయాలు పంచుకోవచ్చు. అంతే.. నా కూతురు ఇంత ఎదిగిపోయిందా? అని నాన్న మురిసిపోతారంటే నమ్మండి..!


చెప్పకుండానే..
ఏ తండ్రీ తాను చేస్తున్న పనిలో పిల్లల సాయాన్ని కోరుకోడు. కానీ వారు బాధ్యత తెలుసుకోవాలనే ఉద్దేశంతో 'ఆ పని చూడు.. ఈ పని చెయ్' అని చెబుతూ ఉంటారు. రోజూ నాన్న చెబితేనే గానీ ఆ పని చేసే అలవాటు చాలామందికి ఉండదు. కానీ ఆ రోజు నాన్నను పూర్తిగా సంతోషంగా చూడటమే మీ బాధ్యత. అందుకే నాన్న చెప్పక ముందే అటువంటి పనులన్నీ పూర్తి చేసేయండి. దీంతో ఆయన మిమ్మల్ని మెచ్చుకోకుండా ఉండలేరు. ఇంకా నాన్న మనసు గాల్లో తేలేలా చేయాలంటే.. ఈ రోజు స్వయంగా మీరే వంట చేసి నాన్నకు వడ్డించండి. దీంతో నా కూతురు ఎంత పెద్దదయిపోయిందో అని తెగ ఆనందపడిపోతారు. మీకు వంట సరిగ్గా రాకపోతే మాత్రం అమ్మ సాయం తీసుకోవడం మరచిపోకండేం.!
నచ్చిన పని చేస్తూ..
నాన్నకి ఎన్ని బహుమతులు ఇచ్చినా కలగని ఆనందం.. మీరు వారికి నచ్చిన పని చేస్తే కలుగుతుంది. మిమ్మల్ని ఏ విషయంలో ఆయన ఎక్కువగా ప్రోత్సహిస్తారో ఆ పని మీరు ఆ రోజు చేయండి. నాన్న కళ్లలో కనిపించే సంతోషం మీకు ఎంతో తృప్తినిస్తుంది. అప్పటి వరకు మీకు ఆ పని మీద ఇష్టం లేకపోయినా సరే దాని మీద ప్రేమ కలుగుతుంది.


కుటుంబంతో సరదాగా..
పని ఒత్తిడి వల్ల నాన్న కుటుంబంతో సరిగ్గా సమయం గడపలేకపోవచ్చు. తన భార్యాపిల్లలకు ఏ విషయంలోనూ లోటు చేయకూడదనే ఆలోచనతో నిరంతరం కష్టపడుతూ ఉండచ్చు. అందుకే వారికి ఆ రోజు కాస్త విశ్రాంతి కల్పించండి. కుటుంబ సభ్యులందరితో కలసి రోజంతా సరదాగా గడిపేలా ప్లాన్ చేయండి. నాన్నకు నచ్చిన సినిమాలు చూపించడమో, పాటలు వినిపించడమో చేయండి. నాన్నతో కలిసి ఆడుకోండి. మీ చిన్నప్పుడు మీరంతా కలిసి దిగిన ఫొటోలను చూపించి వాటి గురించి నాన్ననే వివరించమని చెప్పండి. 'చాల్లే..' అని ముద్దుగా కసురుకున్నా, తన కుటుంబంతో గడిపిన అప్పటి తియ్యటి జ్ఞాపకాల గురించి, మీ చిన్నప్పటి ముచ్చట్ల గురించి సంతోషంగా చెప్పడం మొదలుపెడతారు. అంతేకాదు.. తనను, కుటుంబాన్ని సంతోషంగా ఉంచాలన్న మీ తపన చూసి నాన్న గర్వంతో ఉప్పొంగిపోతారు.
భరోసానివ్వండి..
వీటన్నింటికంటే నాన్నకి ఎక్కువ సంతోషాన్నిచ్చేదేంటో తెలుసా? అన్ని విషయాల్లోనూ మనం బాధ్యతగా మెలగడమే. బాగా చదువుకుంటూ, కెరీర్లో ముందుకెడుతూ; ఈ పాటికే పెళ్లైపోతే మన పిల్లల్ని, కుటుంబాన్ని చక్కగా చూసుకుంటూ మనం బాధ్యతగా ఉండగలిగితే అంతకు మించిన ఆనందం ఆయనకు ఇంకొకటి ఉండదు.

తన తర్వాత కూడా తన కుటుంబం సంతోషంగా ఉండాలనే ఉద్దేశంతోనే నాన్న తన శక్తికి మించి కష్టపడతాడు. మనం కూడా ఆయన బాధ్యతల్లో పాలుపంచుకుంటుంటే అది చూసి ఆయన నిశ్చింతగా ఉంటారు. అందుకే మీ వంతుగా మీ కుటుంబానికి ఏం చేయాలనుకుంటున్నారో.. నాన్నకు వివరించండి. కుటుంబం మీద ప్రేమ, వారి భవిష్యత్తు గురించి మీ ఆలోచనలు విని ఆయనకు ప్రపంచాన్నే జయించినంత ఆనందం కలుగుతుంది.

నాన్న విషయంలో మీరు చేయాలనుకున్న పనులను పూర్తి చేసిన తర్వాతే పితృ దినోత్సవ శుభాకాంక్షలు తెలపండి. ఎందుకంటే పొద్దున్నే లేచి 'హ్యాపీ ఫాదర్స్ డే నాన్నా' అని చెప్పిన సందర్భంలో కంటే.. ఇవన్నీ చేశాక చెబితే కలిగే సంతోషం వంద రెట్లు ఎక్కువగా ఉంటుంది. మరి, ఆ ఆనందాన్ని నాన్నకు తప్పకుండా అందిస్తారు కదూ..!

ఈ క్రమంలో- మీ జీవితంలో, మీ ఉన్నతిలో మీ నాన్న పోషించిన పాత్ర గురించి; ఆయనతో మీకున్న అనుబంధం గురించి మాతో పంచుకోండి.. అలాగే మీ తండ్రీకూతుళ్ల అనుబంధానికి అద్దం పట్టే అందమైన ఫొటోల్ని contactus@vasundhara.net కు మెయిల్‌ చేయండి. ‘ఈనాడు వసుంధర’ వెబ్‌సైట్‌లో ప్రచురిస్తాం.
హ్యాపీ ఫాదర్స్‌ డే!

 

అభిప్రాయాలను పంచుకోవడానికి ఇక్కడ క్లిక్‌ చేయండి  


మరిన్ని

ఇంటి పేరుతో కాదు... ఇది నా స్వయంకృషి...!

నాన్న ప్రముఖ నటుడు దగ్గుబాటి వెంకటేశ్‌. ఇక తాత, పెదనాన్న, అన్న... ఇలా ఆ ఇంట్లో వాళ్ల పేర్లు చెప్పక్కర్లేదు. వారి పేర్లు ఉపయోగించుకుంటే బోలెడు గుర్తింపు. కానీ ఆమె మాత్రం... తన అభిరుచి, సృజనాత్మకత, శ్రమలనే పెట్టుబడిగా గుర్తింపు సాధించాలనుకుంది. తనే వెంకటేశ్‌ పెద్ద కుమార్తె ఆశ్రిత. తన లక్ష్యం దిశగా కృషి చేస్తూ... ఇన్‌స్టాగ్రాం, యూట్యూబ్‌ల్లో లక్షల్లో అభిమానుల్ని సంపాదించుకుంది. ఇటీవల ఇన్‌స్టాగ్రాంలో ఎక్కువ సంపాదిస్తున్న సెలబ్రిటీల జాబితాను హోపర్‌డాట్‌కాం సంస్థ విడుదల చేసింది. అందులో ఆశ్రిత అంతర్జాతీయంగా 377, ఆసియాలో 27వ ర్యాంకులు సాధించింది. ఈ సందర్భంగా వసుంధర ఆమెతో ముచ్చటించింది.

‘స్పెల్లింగ్స్‌’ చెప్పి సెన్సేషనయ్యారు!

పిల్లల్లో ఇంగ్లిష్‌ నైపుణ్యాలను పరీక్షించడానికి అమెరికాలో ఏటా నేషనల్‌ స్పెల్లింగ్‌-బీ పోటీలు నిర్వహిస్తోన్న సంగతి తెలిసిందే. ఎంతో ప్రతిష్ఠాత్మకంగా జరిగే ఈ పోటీల్లో వేలాదిమంది చిన్నారులు పాల్గొంటారు. తల్లిదండ్రులు కూడా తమ పిల్లలను ఈ పోటీలకు అన్ని రకాలుగా సిద్ధం చేస్తూ ప్రోత్సహిస్తుంటారు. ఇక ఈసారి నిర్వహించిన స్పెల్లింగ్‌-బీ పోటీల్లో లూసియానాకు చెందిన 14 ఏళ్ల జైలా అవంత్‌ గార్డే విజేతగా నిలిచింది. దీంతో 93 ఏళ్ల ఈ కంటెస్ట్‌ చరిత్రలో ఈ ట్రోఫీ నెగ్గిన మొదటి ఆఫ్రికన్‌ అమెరికన్‌గా, రెండో నల్లజాతీయురాలిగా చరిత్ర సృష్టించిందీ యంగ్‌ గర్ల్‌.

కథ చెబుతాను... ఊ కొడతారా..!

రాత్రయిందంటే చాలు.. బామ్మ చెప్పే నీతికథలు వింటూ నిద్రలోకి జారుకోవడం మనందరికీ చిన్ననాటి ఓ మధుర జ్ఞాపకం! అప్పుడంటే చాలావరకు ఉమ్మడి కుటుంబాలు కాబట్టి ఇది వర్కవుట్‌ అయింది.. ఇప్పుడు వృత్తి ఉద్యోగాల రీత్యా చాలామంది ఇంట్లో పెద్దవాళ్లు, కన్న వాళ్ల నుంచి దూరంగా వచ్చేస్తున్నారు. దీంతో పిల్లలు వాళ్ల గ్రాండ్‌పేరెంట్స్‌ని, వాళ్లు చెప్పే బోలెడన్ని కథల్ని మిస్సవుతున్నారు. ఇలాంటి అనుభవమే తన చెల్లెలికీ ఎదురైందంటోంది 18 ఏళ్ల ప్రియల్ జైన్‌. అది చూసి ఆలోచనలో పడిపోయిన ఆమె.. నీతి కథలు చెప్పే ఓ ప్లాట్‌ఫామ్‌కు శ్రీకారం చుట్టింది. చిన్నారులకు బామ్మ దగ్గర లేని లోటుని తన వెబ్‌సైట్ తీరుస్తుందంటోన్న ఈ యంగ్‌ ఆంత్రప్రెన్యూర్‌ కథేంటో మనమూ తెలుసుకుందాం రండి..

చిన్నప్పటి కల.. ఇలా సాధించేసింది!

ఆడవారు అనుకుంటే ఏదైనా సాధిస్తారు... వారికి కావల్సిందల్లా కాసింత ప్రోత్సాహం. ఎవరి సహకారం ఉన్నా, లేకున్నా తల్లిదండ్రులు, తోడబుట్టిన వారి సహకారం మాత్రం ఉంటే చాలు... అమ్మాయిలకు అసలు తిరుగుండదు. అన్నింటా విజయాలే సాధిస్తారు. పలువురికి ఆదర్శంగా నిలుస్తారు. అందుకు తాజా ఉదాహరణే 24 ఏళ్ల మావ్యా సూదన్‌. జమ్మూకశ్మీర్‌లోని ఓ మారుమూల గ్రామానికి చెందిన ఈ యువతి ఇటీవల ఇండియన్‌ ఎయిర్‌ ఫోర్స్‌ ఫైటర్‌ పైలట్‌గా నియమితురాలైంది. ఈ నేపథ్యంలో దేశం మొత్తంమీద ఈ అవకాశం దక్కించుకున్న 12 వ మహిళగా, మొదటి కశ్మీరీ మహిళగా గుర్తింపు పొందిందీ యంగ్‌ సెన్సేషన్.

ఆరోగ్యమస్తు

మరిన్ని

అనుబంధం

మరిన్ని

'స్వీట్' హోం

మరిన్ని

వర్క్ & లైఫ్

మరిన్ని

సూపర్ విమెన్

మరిన్ని

బ్యూటీ & ఫ్యాషన్

మరిన్ని