ఈ బ్రేస్‌లెట్‌ మందులేసుకోవాలని గుర్తు చేస్తుంది! - this teen innovation helps elderly people remind medicine on time in telugu
close
Updated : 06/07/2021 18:55 IST
Facebook Share Twitter Share WhatsApp Share Telegram Share Link Share

ఈ బ్రేస్‌లెట్‌ మందులేసుకోవాలని గుర్తు చేస్తుంది!

Image for Representation

ఇంట్లో ఉండే పెద్ద వాళ్లు ఏదో ఒక అనారోగ్యంతో దీర్ఘకాలం పాటు మందులు వాడడం సహజమే! అయితే ఈ క్రమంలో కొంతమంది వేళకు మందులేసుకోవడం మర్చిపోతుంటారు.. అలాంటప్పుడు ఇంట్లో ఉండే వారే ఆ విషయం గుర్తుపెట్టుకొని మరీ వారికి మందులిస్తారు. ఇలా వాళ్లతో ఎవరైనా ఉంటే సరే..! మరి, ఎవరూ లేకపోతే? మతిమరుపుతో పదే పదే ఇలా మందులేసుకోవడం మానేస్తే ఆ వయసులో వారి ఆరోగ్యానికే నష్టం. ఇదే విషయం 12 ఏళ్ల ఆస్తా మెహతాను ఆలోచనలో పడేసింది. ‘మెడీబ్రేస్‌’ అనే ఓ సరికొత్త పరికరాన్ని తయారుచేసేందుకు తనను పురికొల్పింది. ఇలా తాను తయారుచేసిన ఈ మెడిసిన్‌ రిమైండర్‌ మందులేసుకోవాలన్న విషయాన్ని పెద్దవారికి వేళకు గుర్తు చేస్తుందని చెబుతోందీ అమ్మాయి.

ఆస్తా మెహతా.. ముంబయికి చెందిన ఈ పన్నెండేళ్ల అమ్మాయి ప్రస్తుతం అక్కడి క్యాథెడ్రల్‌ అండ్‌ జాన్‌ కానన్‌ మిడిల్‌ స్కూల్‌లో ఏడో తరగతి చదువుతోంది. వ్యాపార కుటుంబంలో పుట్టి పెరిగిన తనపై తన ఇంట్లో వాళ్ల ఆలోచనలు బాగానే ప్రభావం చూపాయట! ఈ క్రమంలో కుటుంబ సభ్యులు రోజూ వ్యాపారానికి సంబంధించిన విషయాల గురించి మాట్లాడుకోవడం, వారు చేసే సృజనాత్మక ఆలోచనల్ని దగ్గర్నుంచి గమనించిన తను కూడా ఏదైనా కొత్తగా చేయాలని ఆలోచించేదట! అలా ఒకరోజు తాత గారి విషయంలో ఎదురైన ఓ అనుభవం తాను ‘మెడిబ్రేస్‌’ అనే సరికొత్త పరికరం తయారుచేయడానికి ఊతమిచ్చిందంటోంది ఆస్తా.

తాతయ్య మతిమరుపుతో...

‘వయసు పైబడుతుంటే ఏదో ఒక దీర్ఘకాలిక అనారోగ్యం వేధిస్తుంటుంది. దీంతో ఏళ్ల పాటు మందులు వాడాల్సిన అవసరం ఏర్పడుతుంది. అయితే చాలామంది ఈ వయసులో వేళకు మందులు వేసుకోవడం మర్చిపోతుంటారు. మా తాతగారి విషయంలో ఓసారి ఇలాగే జరిగింది. ఓ రోజు తాతయ్య మందులు వేసుకున్నారో లేదోనని ఆరా తీస్తే.. లేదు మర్చిపోయానని సమాధానమిచ్చారు.. అయితే అప్పటికే తాను మెడిసిన్‌ వేసుకునే సమయం దాటిపోవడంతో ఆ రోజు మాత్ర వేసుకోలేకపోయారు. అప్పుడే నా మనసులో ఓ ఆలోచన మెదిలింది. వృద్ధుల్లో ఉన్న ఈ సమస్యను దూరం చేయడానికి వేళకు మందులు వేసుకోవాలన్న విషయం వారికి గుర్తు చేసే పరికరం ఒకటి తయారుచేయాలనుకున్నా. దాని ప్రతిరూపమే ఈ మెడీబ్రేస్’ అని చెబుతోందీ అమ్మాయి.

అమ్మానాన్నల ప్రోత్సాహంతో..!

స్వయానా వ్యాపార కుటుంబం నుంచి వచ్చిన ఆస్తా.. తన తల్లిదండ్రులు, తాతయ్య ప్రోత్సాహంతో ఈ పరికరాన్ని తయారుచేశానంటోంది. ‘మాది వ్యాపార కుటుంబం. అందుకే రోజూ మా ఇంట్లో ఇలాంటి విషయాలే చర్చకు వచ్చేవి! అలాగే అమ్మానాన్న వారికొచ్చిన కొత్త కొత్త ఐడియాలు ఒకరితో ఒకరు పంచుకునేవారు. అవి విని నా మనసూ క్రియేటివ్‌గా ఆలోచించడం మొదలుపెట్టింది. మొదట నా ఐడియాను అమ్మానాన్నలతో చెప్పినప్పుడు వారు ప్రోత్సహించడమే కాదు.. కొంత డబ్బును నా చేతికిచ్చారు. ఇక ఇదే ఐడియాను మా ‘యంగ్‌ ఆంత్రప్రెన్యూర్స్‌ అకాడమీ (YEA) క్లాస్‌’లోనూ పంచుకున్నా. ఇలా అమ్మానాన్నల ప్రోత్సాహం, YEA మెంటార్స్‌ సహకారంతో మెడీబ్రేస్‌ తయారుచేశా..’ అంటోంది ఆస్తా.

వాచీలాగా ధరిస్తే సరి!

సిలికాన్‌, మెటల్‌.. ఈ రెండు మెటీరియల్స్‌తో రెండు రకాల మెడీబ్రేస్‌లను తయారుచేసింది ఆస్తా. అచ్చం చేతి గడియారాన్ని పోలి ఉండే ఈ పరికరాన్ని వాచీ లాగా ధరించాల్సి ఉంటుంది. ‘వయసుతో సంబంధం లేకుండా బీపీ, మధుమేహం, గుండె సంబంధిత సమస్యలు.. వంటి అనారోగ్యాలతో బాధపడే వారు నానాటికీ పెరిగిపోతున్నారు. అయితే యుక్త వయసులో ఉన్న వారైతే ఫోన్లోనే రిమైండర్‌ పెట్టుకోవచ్చు. వృద్ధులకు అలాంటి ఆప్షన్‌ ఉండచ్చు.. ఉండకపోవచ్చు..! అలాంటి వారికి నేను తయారుచేసిన మెడీబ్రేస్‌ చక్కగా ఉపయోగపడుతుంది. చేతి గడియారాన్ని పోలి ఉండే ఈ బ్రేస్‌లెట్‌లో డయల్‌ స్థానంలో చిన్న బాక్స్ లాగా ఉంటుంది. ఆ రోజు వేసుకోవాల్సిన మాత్రలు అందులో వేసుకొని.. టైమ్‌ సెట్‌ చేసుకుంటే ఆ సమయానికి మందులు వేసుకోవాలని అదే గుర్తు చేస్తుంది. ఇక మాత్రలు మన చెంతే ఉంటాయి కాబట్టి వెంటనే తీసి వేసుకోవచ్చు.. అయితే ఇలాంటి మెడిసిన్‌ రిమైండర్స్‌ మార్కెట్లో ఉన్నప్పటికీ మెడీబ్రేస్‌ ప్రత్యేకతే వేరు..! ఎందుకంటే ఇందులో రిమైండర్‌తో పాటు మందులు భద్రపరచుకోవడానికి బాక్స్‌ కూడా ఉంది..’ అంటూ తాను తయారుచేసిన పరికరం గురించి చెబుతోందీ యంగ్‌ ఆంత్రప్రెన్యూర్.

ఈ క్రమంలో ముందుగా కొన్ని నమూనాల్ని తయారుచేసి, కొంతమందితో పరీక్షించిన తర్వాతే తుదిగా సిలికాన్‌, మెటల్‌ మెడీబ్రేస్‌లను ఎంపిక చేసి వాటి నమూనాను తయారీదారులకు అప్పగించానని చెబుతోంది ఆస్తా. తన ఉత్పత్తిని దేశవ్యాప్తంగా ఎంతోమందికి చేరువ చేయాలని ఉవ్విళ్లూరుతోంది. అంతేకాదు.. ఈ పరికరం కోసం ప్రస్తుతం తనకు కొన్ని కంపెనీల నుంచి ఆర్డర్లు కూడా వచ్చాయంటోందీ యూత్‌ ఐకాన్‌. ఇలా ప్రజల అవసరార్థం మరెన్నో సరికొత్త పరికరాల్ని రూపొందించి.. వాటిని వారికి చేరువ చేయడమే తన లక్ష్యమంటోందీ అమ్మాయి. మరి, తన కల నెరవేరాలని మనమూ కోరుకుందాం..!

ఆల్‌ ది బెస్ట్‌ ఆస్తా!


మరిన్ని

ఇంటి పేరుతో కాదు... ఇది నా స్వయంకృషి...!

నాన్న ప్రముఖ నటుడు దగ్గుబాటి వెంకటేశ్‌. ఇక తాత, పెదనాన్న, అన్న... ఇలా ఆ ఇంట్లో వాళ్ల పేర్లు చెప్పక్కర్లేదు. వారి పేర్లు ఉపయోగించుకుంటే బోలెడు గుర్తింపు. కానీ ఆమె మాత్రం... తన అభిరుచి, సృజనాత్మకత, శ్రమలనే పెట్టుబడిగా గుర్తింపు సాధించాలనుకుంది. తనే వెంకటేశ్‌ పెద్ద కుమార్తె ఆశ్రిత. తన లక్ష్యం దిశగా కృషి చేస్తూ... ఇన్‌స్టాగ్రాం, యూట్యూబ్‌ల్లో లక్షల్లో అభిమానుల్ని సంపాదించుకుంది. ఇటీవల ఇన్‌స్టాగ్రాంలో ఎక్కువ సంపాదిస్తున్న సెలబ్రిటీల జాబితాను హోపర్‌డాట్‌కాం సంస్థ విడుదల చేసింది. అందులో ఆశ్రిత అంతర్జాతీయంగా 377, ఆసియాలో 27వ ర్యాంకులు సాధించింది. ఈ సందర్భంగా వసుంధర ఆమెతో ముచ్చటించింది.

‘స్పెల్లింగ్స్‌’ చెప్పి సెన్సేషనయ్యారు!

పిల్లల్లో ఇంగ్లిష్‌ నైపుణ్యాలను పరీక్షించడానికి అమెరికాలో ఏటా నేషనల్‌ స్పెల్లింగ్‌-బీ పోటీలు నిర్వహిస్తోన్న సంగతి తెలిసిందే. ఎంతో ప్రతిష్ఠాత్మకంగా జరిగే ఈ పోటీల్లో వేలాదిమంది చిన్నారులు పాల్గొంటారు. తల్లిదండ్రులు కూడా తమ పిల్లలను ఈ పోటీలకు అన్ని రకాలుగా సిద్ధం చేస్తూ ప్రోత్సహిస్తుంటారు. ఇక ఈసారి నిర్వహించిన స్పెల్లింగ్‌-బీ పోటీల్లో లూసియానాకు చెందిన 14 ఏళ్ల జైలా అవంత్‌ గార్డే విజేతగా నిలిచింది. దీంతో 93 ఏళ్ల ఈ కంటెస్ట్‌ చరిత్రలో ఈ ట్రోఫీ నెగ్గిన మొదటి ఆఫ్రికన్‌ అమెరికన్‌గా, రెండో నల్లజాతీయురాలిగా చరిత్ర సృష్టించిందీ యంగ్‌ గర్ల్‌.

కథ చెబుతాను... ఊ కొడతారా..!

రాత్రయిందంటే చాలు.. బామ్మ చెప్పే నీతికథలు వింటూ నిద్రలోకి జారుకోవడం మనందరికీ చిన్ననాటి ఓ మధుర జ్ఞాపకం! అప్పుడంటే చాలావరకు ఉమ్మడి కుటుంబాలు కాబట్టి ఇది వర్కవుట్‌ అయింది.. ఇప్పుడు వృత్తి ఉద్యోగాల రీత్యా చాలామంది ఇంట్లో పెద్దవాళ్లు, కన్న వాళ్ల నుంచి దూరంగా వచ్చేస్తున్నారు. దీంతో పిల్లలు వాళ్ల గ్రాండ్‌పేరెంట్స్‌ని, వాళ్లు చెప్పే బోలెడన్ని కథల్ని మిస్సవుతున్నారు. ఇలాంటి అనుభవమే తన చెల్లెలికీ ఎదురైందంటోంది 18 ఏళ్ల ప్రియల్ జైన్‌. అది చూసి ఆలోచనలో పడిపోయిన ఆమె.. నీతి కథలు చెప్పే ఓ ప్లాట్‌ఫామ్‌కు శ్రీకారం చుట్టింది. చిన్నారులకు బామ్మ దగ్గర లేని లోటుని తన వెబ్‌సైట్ తీరుస్తుందంటోన్న ఈ యంగ్‌ ఆంత్రప్రెన్యూర్‌ కథేంటో మనమూ తెలుసుకుందాం రండి..

చిన్నప్పటి కల.. ఇలా సాధించేసింది!

ఆడవారు అనుకుంటే ఏదైనా సాధిస్తారు... వారికి కావల్సిందల్లా కాసింత ప్రోత్సాహం. ఎవరి సహకారం ఉన్నా, లేకున్నా తల్లిదండ్రులు, తోడబుట్టిన వారి సహకారం మాత్రం ఉంటే చాలు... అమ్మాయిలకు అసలు తిరుగుండదు. అన్నింటా విజయాలే సాధిస్తారు. పలువురికి ఆదర్శంగా నిలుస్తారు. అందుకు తాజా ఉదాహరణే 24 ఏళ్ల మావ్యా సూదన్‌. జమ్మూకశ్మీర్‌లోని ఓ మారుమూల గ్రామానికి చెందిన ఈ యువతి ఇటీవల ఇండియన్‌ ఎయిర్‌ ఫోర్స్‌ ఫైటర్‌ పైలట్‌గా నియమితురాలైంది. ఈ నేపథ్యంలో దేశం మొత్తంమీద ఈ అవకాశం దక్కించుకున్న 12 వ మహిళగా, మొదటి కశ్మీరీ మహిళగా గుర్తింపు పొందిందీ యంగ్‌ సెన్సేషన్.

ఆరోగ్యమస్తు

మరిన్ని

అనుబంధం

మరిన్ని

'స్వీట్' హోం

మరిన్ని

వర్క్ & లైఫ్

మరిన్ని

సూపర్ విమెన్

మరిన్ని

బ్యూటీ & ఫ్యాషన్

మరిన్ని