ఈ అందాల కిరీటం అమ్మకు అంకితం! - vaidehi dongre from michigan crowned miss india usa
close
Updated : 20/07/2021 19:36 IST
Facebook Share Twitter Share WhatsApp Share Telegram Share Link Share

ఈ అందాల కిరీటం అమ్మకు అంకితం!

Photo: Instagram

మిస్‌ ఇండియా యూఎస్ఏ... అందాల పోటీలకు సంబంధించి ప్రతిష్ఠాత్మకంగా పరిగణించే టైటిల్స్‌లో ఇది కూడా ఒకటి. అమెరికా వేదికగా జరిగే ఈ పోటీలకు సుమారు 40 ఏళ్ల ఘనమైన చరిత్ర ఉంది. అందుకే ఈ పోటీల్లో పాల్గొనాలని, విజేతగా నిలవాలని భారతీయ సంతతికి చెందిన అమ్మాయిలందరూ ఉవ్విళ్లూరుతుంటారు. అయితే ఈ అందాల కిరీటం అందుకోవాలంటే అమ్మాయిలకు అందంతో పాటు అపార ప్రతిభ, ఆత్మవిశ్వాసం ఉండాలి. ఇవన్నీ సమపాళ్లలో ఉన్నాయి కాబట్టే తాజాగా జరిగిన మిస్‌ ఇండియా యూఎస్ఏ-2021 టైటిల్‌ను గెల్చుకుంది 25 ఏళ్ల వైదేహీ డోంగ్రే.

1980లో తొలిసారిగా ‘మిస్‌ ఇండియా యూఎస్‌ఏ’ పోటీలు జరిగాయి. అప్పటి నుంచి ఏటేటా ఈ అందాల పోటీలకు ఆదరణ పెరుగుతూ వస్తోంది. అలా ఈ ఏడాది కిరీటం కోసం అమెరికాలోని 30 రాష్ట్రాల నుంచి 61 మంది అందగత్తెలు పోటీపడ్డారు. మిస్‌ ఇండియా యూఎస్‌ఏ, మిసెస్‌ ఇండియా యూఎస్‌ఏ, మిస్‌ టీన్‌ యూఎస్‌ఏ అనే మూడు విభాగాల్లో ఈ పోటీలు నిర్వహించారు. ఈ మూడు విభాగాల్లో విజేతగా నిలిచేవారు ముంబయిలో జరిగే ‘మిస్‌ ఇండియా వరల్డ్‌ వైడ్‌’ పోటీలకు అర్హత సాధిస్తారు.

‘మిస్‌ ట్యాలెంటెడ్‌’ కూడా!

అలా ఈ ఏడాది మిస్‌ ఇండియా యూఎస్‌ఏ పోటీలకు వేదికగా నిలిచింది మిషిగన్. 1997 మిస్‌ వరల్డ్‌ డయనా హెడెన్‌ ఈ పోటీలకు ముఖ్య అతిథిగా, న్యాయనిర్ణేతగా వ్యవహరించింది. ఈ క్రమంలోనే మిషిగన్‌కు చెందిన వైదేహి మిస్ ఇండియా యూఎస్‌ఏ- 2021 టైటిల్‌ గెల్చుకుందని హెడెన్‌ ప్రకటించింది. దీంతో పాటు భారతీయ శాస్త్రీయ నృత్యమైన కథక్‌లో అద్భుతమైన ప్రదర్శనకు గాను ‘మిస్‌ ట్యాలెంటెడ్‌’ పురస్కారాన్ని కూడా వైదేహి సొంతం చేసుకుంది. ‘ఈ ప్రతిష్ఠాత్మక పోటీల్లో విజేతగా నిలిచినందుకు ఎంతో సంతోషంగా ఉంది. ఈ గుర్తింపుతో మహిళల ఆర్థిక స్వాతంత్ర్యం, అక్షరాస్యత కోసం కృషి చేస్తాను’ అని ఈ సందర్భంగా చెప్పుకొచ్చిందీ ముద్దుగుమ్మ.

నాపై నాకు నమ్మకాన్ని పెంచింది!

యూనివర్సిటీ ఆఫ్ మిషిగన్‌లో గ్రాడ్యుయేషన్‌ పూర్తి చేసిన వైదేహి ప్రస్తుతం ఓ సంస్థలో బిజినెస్‌ డెవలప్‌మెంట్‌ మేనేజర్‌గా విధులు నిర్వర్తిస్తోంది. ఈ క్రమంలో ప్రతిష్ఠాత్మక అందాల పోటీల్లో విజేతగా నిలవడంపై స్పందిస్తూ ‘ఈ అందాల కిరీటం గెల్చుకుంటానని ఊహించలేదు. ఎందుకంటే కరోనా కారణంగా చాలామందిలాగే నేనూ నా జీవితంలో అత్యంత గడ్డు పరిస్థితులను ఎదుర్కొన్నాను. కరోనా ప్రభావంతో గతేడాది ఫిబ్రవరి నుంచి ఇంట్లోనే ఉంటున్నాను. సుమారు ఏడాది విరామం తర్వాత నా పనిపై దృష్టి పెట్టాను. వివిధ సవాళ్లను ఎదుర్కోవడం ద్వారా ఎలా ఉన్నతి సాధించవచ్చో ఈ పోటీల వల్ల తెలుసుకోగలిగాను. ఈ పోటీల్లో పాల్గొనడం, విజేతగా నిలవడం నాపై నాకు నమ్మకాన్ని పెంచింది. భవిష్యత్‌లో మరిన్ని గొప్ప విజయాలు సాధించేందుకు స్ఫూర్తినిచ్చింది.’

అమ్మకు అంకితం!

‘నేను ఇండియాలో పుట్టాను. అమెరికాలో పెరిగాను. అమెరికాలో స్థిరపడిన నాలాంటి ఎందరో అమ్మాయిలు తమ శక్తి సామర్థ్యాలు, ప్రతిభను నిరూపించుకోవడానికి ఈ అందాల పోటీలు ఒక వేదికగా నిలుస్తున్నాయి. ఇక ఈ కిరీటం గెల్చుకోవడంలో నాకు సహకరించిన వారందరికీ ధన్యవాదాలు తెలుపుకొంటున్నాను. ఈ ప్రయాణంలో నిత్యం నా వెన్నంటే ఉండి ప్రోత్సహించిన అమ్మకు ఈ అందాల కిరీటాన్ని అంకితం చేస్తున్నాను’ అని చెప్పుకొచ్చిందీ అందాల తార.

బ్రెయిన్‌ ట్యూమర్‌తో బాధపడుతూ!

ఇదే పోటీల్లో జార్జియా రాష్ట్రానికి చెందిన అర్షి లలనీ మొదటి రన్నరప్‌గా నిలిచింది. బ్రెయిన్‌ ట్యూమర్‌తో బాధపడుతున్న ఆమె కిరీటం కోసం ఫైనల్‌ రౌండ్‌ వరకు గట్టిగా పోరాడింది. ఈ క్రమంలో టైటిల్‌ గెలవకపోయినా తన ఆత్మవిశ్వాసంతో అతిథులందరి మన్ననలు అందుకుంది.
ఈ సందర్భంగా మిస్‌ ఇండియా యూఎస్‌ఏ పోటీల్లో సత్తా చాటిన వైదేహి, అర్షి లలనీ సోషల్‌ మీడియా ఫొటోలపై ఓ లుక్కేద్దాం రండి.















మరిన్ని

ఇంటి పేరుతో కాదు... ఇది నా స్వయంకృషి...!

నాన్న ప్రముఖ నటుడు దగ్గుబాటి వెంకటేశ్‌. ఇక తాత, పెదనాన్న, అన్న... ఇలా ఆ ఇంట్లో వాళ్ల పేర్లు చెప్పక్కర్లేదు. వారి పేర్లు ఉపయోగించుకుంటే బోలెడు గుర్తింపు. కానీ ఆమె మాత్రం... తన అభిరుచి, సృజనాత్మకత, శ్రమలనే పెట్టుబడిగా గుర్తింపు సాధించాలనుకుంది. తనే వెంకటేశ్‌ పెద్ద కుమార్తె ఆశ్రిత. తన లక్ష్యం దిశగా కృషి చేస్తూ... ఇన్‌స్టాగ్రాం, యూట్యూబ్‌ల్లో లక్షల్లో అభిమానుల్ని సంపాదించుకుంది. ఇటీవల ఇన్‌స్టాగ్రాంలో ఎక్కువ సంపాదిస్తున్న సెలబ్రిటీల జాబితాను హోపర్‌డాట్‌కాం సంస్థ విడుదల చేసింది. అందులో ఆశ్రిత అంతర్జాతీయంగా 377, ఆసియాలో 27వ ర్యాంకులు సాధించింది. ఈ సందర్భంగా వసుంధర ఆమెతో ముచ్చటించింది.

‘స్పెల్లింగ్స్‌’ చెప్పి సెన్సేషనయ్యారు!

పిల్లల్లో ఇంగ్లిష్‌ నైపుణ్యాలను పరీక్షించడానికి అమెరికాలో ఏటా నేషనల్‌ స్పెల్లింగ్‌-బీ పోటీలు నిర్వహిస్తోన్న సంగతి తెలిసిందే. ఎంతో ప్రతిష్ఠాత్మకంగా జరిగే ఈ పోటీల్లో వేలాదిమంది చిన్నారులు పాల్గొంటారు. తల్లిదండ్రులు కూడా తమ పిల్లలను ఈ పోటీలకు అన్ని రకాలుగా సిద్ధం చేస్తూ ప్రోత్సహిస్తుంటారు. ఇక ఈసారి నిర్వహించిన స్పెల్లింగ్‌-బీ పోటీల్లో లూసియానాకు చెందిన 14 ఏళ్ల జైలా అవంత్‌ గార్డే విజేతగా నిలిచింది. దీంతో 93 ఏళ్ల ఈ కంటెస్ట్‌ చరిత్రలో ఈ ట్రోఫీ నెగ్గిన మొదటి ఆఫ్రికన్‌ అమెరికన్‌గా, రెండో నల్లజాతీయురాలిగా చరిత్ర సృష్టించిందీ యంగ్‌ గర్ల్‌.

కథ చెబుతాను... ఊ కొడతారా..!

రాత్రయిందంటే చాలు.. బామ్మ చెప్పే నీతికథలు వింటూ నిద్రలోకి జారుకోవడం మనందరికీ చిన్ననాటి ఓ మధుర జ్ఞాపకం! అప్పుడంటే చాలావరకు ఉమ్మడి కుటుంబాలు కాబట్టి ఇది వర్కవుట్‌ అయింది.. ఇప్పుడు వృత్తి ఉద్యోగాల రీత్యా చాలామంది ఇంట్లో పెద్దవాళ్లు, కన్న వాళ్ల నుంచి దూరంగా వచ్చేస్తున్నారు. దీంతో పిల్లలు వాళ్ల గ్రాండ్‌పేరెంట్స్‌ని, వాళ్లు చెప్పే బోలెడన్ని కథల్ని మిస్సవుతున్నారు. ఇలాంటి అనుభవమే తన చెల్లెలికీ ఎదురైందంటోంది 18 ఏళ్ల ప్రియల్ జైన్‌. అది చూసి ఆలోచనలో పడిపోయిన ఆమె.. నీతి కథలు చెప్పే ఓ ప్లాట్‌ఫామ్‌కు శ్రీకారం చుట్టింది. చిన్నారులకు బామ్మ దగ్గర లేని లోటుని తన వెబ్‌సైట్ తీరుస్తుందంటోన్న ఈ యంగ్‌ ఆంత్రప్రెన్యూర్‌ కథేంటో మనమూ తెలుసుకుందాం రండి..

చిన్నప్పటి కల.. ఇలా సాధించేసింది!

ఆడవారు అనుకుంటే ఏదైనా సాధిస్తారు... వారికి కావల్సిందల్లా కాసింత ప్రోత్సాహం. ఎవరి సహకారం ఉన్నా, లేకున్నా తల్లిదండ్రులు, తోడబుట్టిన వారి సహకారం మాత్రం ఉంటే చాలు... అమ్మాయిలకు అసలు తిరుగుండదు. అన్నింటా విజయాలే సాధిస్తారు. పలువురికి ఆదర్శంగా నిలుస్తారు. అందుకు తాజా ఉదాహరణే 24 ఏళ్ల మావ్యా సూదన్‌. జమ్మూకశ్మీర్‌లోని ఓ మారుమూల గ్రామానికి చెందిన ఈ యువతి ఇటీవల ఇండియన్‌ ఎయిర్‌ ఫోర్స్‌ ఫైటర్‌ పైలట్‌గా నియమితురాలైంది. ఈ నేపథ్యంలో దేశం మొత్తంమీద ఈ అవకాశం దక్కించుకున్న 12 వ మహిళగా, మొదటి కశ్మీరీ మహిళగా గుర్తింపు పొందిందీ యంగ్‌ సెన్సేషన్.

ఆరోగ్యమస్తు

మరిన్ని

అనుబంధం

మరిన్ని

'స్వీట్' హోం

మరిన్ని

వర్క్ & లైఫ్

మరిన్ని

సూపర్ విమెన్

మరిన్ని

బ్యూటీ & ఫ్యాషన్

మరిన్ని