కెరీర్లో ఎదగాలంటే ఇలా చేయండి! - work habits that can boost your professional life in telugu
close
Published : 17/09/2021 15:29 IST

కెరీర్లో ఎదగాలంటే ఇలా చేయండి!

ఉద్యోగంలో చేరామంటే అందులో ఎదగడానికే కష్టపడుతుంటాం.. వచ్చిన అవకాశాల్ని అందిపుచ్చుకుంటూ, మనల్ని మనం నిరూపించుకుంటూ కెరీర్‌ గ్రాఫ్‌ని క్రమంగా పెంచుకుంటూ పోతాం. అయితే ఈ క్రమంలో మనం పనిచేసే చోట కొన్ని అలవాట్లనూ అలవర్చుకోవాలంటున్నారు కార్పొరేట్‌ నిపుణులు. తద్వారా మన పనితనమే కాదు.. నడవడికా మన ఎదుగుదలలో కీలక భాగమవుతుందంటున్నారు. మరి, ఇంతకీ ఏంటా అలవాట్లు? తెలుసుకుందాం రండి..

విమర్శే ప్రశంస!

పనిచేసే చోట మన పనిని బట్టి ప్రశంసలే కాదు.. అప్పుడప్పుడూ విమర్శలూ ఎదుర్కోవాల్సి రావచ్చు. అది సహోద్యోగులతో కావచ్చు.. లేదంటే బాస్‌తో కావచ్చు! నిజానికి మన పైఅధికారులు ఇలా మన పని గురించి విమర్శించడం, తప్పొప్పులు చెప్పడం.. వంటివి చేశారంటే అది మన ఎదుగుదల కోసమే అని గుర్తుంచుకోండి..! ఈ క్రమంలో వాళ్లు మాటలన్నారని బాధపడడం కాకుండా.. వాళ్లు సూచించిన మార్పులు చేర్పులు చేసుకుంటే కెరీర్‌లో మరింత ముందుకు దూసుకెళ్లచ్చు. అంతేకాదు.. ఇలా ప్రతి విషయాన్నీ సానుకూల దృక్పథంతో తీసుకుంటే ఒత్తిడి ఎదురుకాకుండా.. దాని ప్రభావం మనం చేసే పనిపై పడకుండా జాగ్రత్తపడచ్చు.

అడగడంలో తప్పు లేదు!

ఆఫీస్‌ అన్నాక ఒకే పనికి పరిమితమవుతానంటే కుదరదు. అత్యవసర పరిస్థితుల్లో సహోద్యోగులు రానప్పుడు ఆ పని భారం మన మీద పడచ్చు. ఒక్కోసారి మన పనితనాన్ని గమనించడానికి పైఅధికారులు మనకు కొత్త పనులు పురమాయించచ్చు. ఇలాంటి సమయంలో చాలామంది ‘ఈ పని నాకు కొత్త.. నేను చేయలేనేమో!’ అన్న సందిగ్ధంలో పడిపోతారు. కొందరేమో.. పనిలో ఏవైనా సందేహాలున్నప్పుడు నివృత్తి చేసుకోవడానికి తోటి ఉద్యోగులను అడిగితే.. ‘ఇది కూడా తెలియదా?’ అనుకుంటారేమోనని వెనకడుగు వేస్తుంటారు. అయితే ఇలా మొహమాట పడి తప్పులు చేసే బదులు ముందే మీ సందేహాన్ని నివృత్తి చేసుకోవడం మంచిదంటున్నారు నిపుణులు. అందుకే అది చిన్న పనైనా, పెద్ద పనైనా.. అందులో ఎలాంటి సందేహమున్నా సరే.. దాని గురించి తెలిసిన వారిని ప్రశ్నించడం అలవాటు చేసుకోవాలంటున్నారు. తద్వారా మనకు తెలియని ఎన్నో విషయాలు నేర్చుకోవచ్చు. కెరీర్‌ అభివృద్ధికి ఇదీ ఓ కీలక మెట్టే!

అలా అనకండి!

ఆఫీస్‌లో కొంతమంది ఉద్యోగులు మా పనితనం ఇంతే అంటూ గిరిగీసుక్కూర్చుంటారు. అత్యవసర పరిస్థితుల్లో ఓ పని అదనంగా చేయాల్సి వచ్చినా ‘ఇది నా పని కాదు’ అంటూ నిర్మొహమాటంగా చెప్పేస్తుంటారు. కెరీర్‌లో ఎదగాలనుకునే వారి లక్షణం ఇది కానే కాదంటున్నారు నిపుణులు. ఏ పనైనా, తన సొంతం చేసుకొని.. ఆస్వాదిస్తూ చేసినప్పుడే చక్కటి ఉత్పాదకతను అందించచ్చు. ఫలితంగా మన నైపుణ్యాలూ మరింత మెరుగుపడతాయి. కెరీర్‌ అభివృద్ధికి ఇంతకంటే ఇంకేం కావాలి చెప్పండి! అందుకే పని ప్రదేశంలో ‘ఇది నాది కాదు’ అన్న ధోరణిని మార్చుకొని ప్రతిదీ తమ సొంతం చేసుకోవడం అలవాటు చేసుకోవాలి.

కాస్త వెచ్చిస్తే పోయేదేముంది!

పనిలో చక్కటి సమయపాలన పాటించడం ఉత్తమ ఉద్యోగి లక్షణం. అలాగని రోజూ ఆఫీస్‌ సమయం అయిపోగానే కచ్చితంగా అదే టైమ్‌కి వెళ్తానంటే కుదరకపోవచ్చు. ఎందుకంటే కొన్నిసార్లు ఇతర పనుల వల్ల అదనంగా సమయం కేటాయించాల్సి రావచ్చు. దానికి అనుగుణంగా మన ప్రణాళికను మార్చుకొని.. పని పూర్తి చేసి వెళ్లడం ఒక పద్ధతి. ఒకవేళ అది అత్యవసరంగా చేయాల్సిన పని కాకపోతే.. మరుసటి రోజు దాని ప్రభావం ఇతర పనులపై పడకుండా ఉండాలంటే.. ఇంకాస్త సమయం కేటాయించాల్సి రావచ్చు. ఇలా అవసరమున్నప్పుడల్లా ఆఫీస్‌ పని కోసం అదనంగా సమయం వెచ్చించడంలో తప్పేం లేదంటున్నారు నిపుణులు. అందుకే దృష్టంతా సమయం అయిపోతుందన్న దానిపై పెట్టకుండా.. చేసే పనిపై పెడితే మెరుగైన అవుట్‌పుట్‌ను అందించచ్చు.

ఇవి కూడా!

* ఆఫీస్‌ రాజకీయాలు, కొలీగ్స్‌పై రూమర్స్‌, చాడీలు చెప్పుకోవడం.. పని ప్రదేశంలో ఇలాంటి ప్రతికూల వాతావరణం కూడా ఉంటుంది. కాబట్టి దీనికి ప్రభావితం కాకుండా మీ పనేదో మీరు చూసుకోవడం మంచిది.

* పని విషయంలో ఒకరిపై కంప్లైంట్‌ ఇచ్చే బదులు మీరే దాన్ని ఎలా పరిష్కరించాలో ఆలోచించే మార్గం చూడడం ఉత్తమం. తద్వారా ఉద్యోగులందరి మధ్య సానుకూల వాతావరణం నెలకొంటుంది. ఇదీ మీ కెరీర్‌కి ప్లస్‌ పాయింటే!

* కెరీర్‌లో దూసుకెళ్లాలంటే మన పనితనమే కాదు.. డ్రస్సింగూ ముఖ్యమేనంటున్నారు నిపుణులు. అందుకే ఫ్యాషన్లను పాటించినప్పటికీ పద్ధతిగా, ప్రొఫెషనల్‌గా దుస్తులు ధరించడం అలవాటు చేసుకోవాలి.

* పని పూర్తవ్వాలని ఆదరాబాదరాగా ముగించేయడం కాకుండా.. చేసిన పనిని ఒకటికి రెండుసార్లు చెక్‌ చేసుకోవడం అలవాటుగా మార్చుకోమంటున్నారు నిపుణులు. తద్వారా చేసిన పనిలో దొర్లిన తప్పుల్ని చాలావరకు సరిదిద్దుకోవచ్చు.

కెరీర్‌లో దూసుకెళ్లాలంటే ఒక ఉద్యోగికి ఉండాల్సిన అలవాట్లేంటో తెలుసుకున్నారు కదా! మరి, మీ సక్సెస్‌ సీక్రెట్స్‌ ఏంటి? మాతో పంచుకోండి!



మరిన్ని

వీటితో పిల్లలకు పాలివ్వడం ఎంతో సులువు!

పసి పిల్లలకు ఆరు నెలలు అంతకుమించి ఏడాది వరకు తల్లిపాలు పట్టడం తప్పనిసరి అంటూ నిపుణులు చెప్పడం మనకు తెలిసిందే. అయితే ఇటు కుటుంబంతో పాటు అటు వృత్తి ఉద్యోగాలకూ సమప్రాధాన్యమిచ్చే అమ్మలున్న ఈ రోజుల్లో ఏడాది వరకు బిడ్డకు తానే నేరుగా పాలివ్వడం అంటే అది కాస్త కష్టమనే చెప్పుకోవాలి. అలాగని బిడ్డలను అలా వదిలేసి తల్లులూ తమ వృత్తిపై దృష్టి పెట్టలేరు. అందుకే అటు నేటి తల్లుల బ్రెస్ట్‌ఫీడింగ్ పనిని సులభతరం చేస్తూ, ఇటు పిల్లలకు తల్లిపాలు అందుబాటులో ఉండేలా చేసేందుకు వివిధ రకాల బ్రెస్ట్‌ఫీడింగ్ గ్యాడ్జెట్లు ప్రస్తుతం మార్కెట్లోకొచ్చేశాయి.

తరువాయి

సైజ్‌ జీరో కాదు.. ఆరోగ్యం ముఖ్యం!

‘మనసులో కలిగే ఆలోచనల్నే శరీరం ప్రతిబింబిస్తుంది..’ అంటోంది ఫిట్‌నెస్‌ ఫ్రీక్‌ అంకితా కొన్వర్‌. సైజ్‌ జీరో గురించి ఆలోచిస్తూ బాధపడితే మరింత బరువు పెరుగుతామని, అదే ఆరోగ్యంపై దృష్టి పెడితే శరీరం, మనసు రెండూ మన అధీనంలో ఉంటాయని చెబుతోంది. ఆరోగ్యం, ఫిట్‌నెస్‌పై ఎక్కువ శ్రద్ధ పెడుతూ.. ఆ చిట్కాల్ని సోషల్‌ మీడియాలో పంచుకుంటూ అందరిలో స్ఫూర్తి నింపే ఈ మిసెస్‌ సోమన్‌.. తాజాగా బాడీ పాజిటివిటీ గురించి ఇన్‌స్టాలో మరో స్ఫూర్తిదాయక పోస్ట్‌ పెట్టింది. సైజ్‌ జీరో కంటే ఆరోగ్యమే ముఖ్యమంటూ ఆమె షేర్‌ చేసిన పోస్ట్‌ ప్రస్తుతం సామాజిక మాధ్యమాల్లో వైరల్‌గా మారింది.

తరువాయి

ఆఫీసులో కోపం కట్టలు తెంచుకుంటోందా? ఇలా చేసి చూడండి..!

ఉద్యోగినులకు ఇటు ఇంటి పనులు, అటు ఆఫీస్‌ ఒత్తిళ్లు సర్వసాధారణమే అయినా.. కొంతమంది వీటిని అదుపు చేసుకోలేక ఒక్కోసారి పని ప్రదేశంలోనే ఎదుటివారిపై విరుచుకుపడుతుంటారు. దీన్నే ‘వర్క్‌ప్లేస్‌ బర్నవుట్’గా పేర్కొంటున్నారు నిపుణులు. నిజానికి ఇలాంటి దీర్ఘకాలిక ఒత్తిడి ఆరోగ్యానికే కాదు.. కెరీర్ పైనా ప్రతికూల ప్రభావం చూపే అవకాశాలు ఎక్కువగానే ఉన్నాయంటున్నారు. అందుకే దీన్ని ఆదిలోనే గుర్తించి మేనేజ్‌ చేసుకోగలిగితే దీనివల్ల కెరీర్‌పై మచ్చ పడకుండా జాగ్రత్తపడచ్చంటున్నారు. మరి, అదెలాగో తెలుసుకుందాం రండి..

తరువాయి

బ్యూటీ & ఫ్యాషన్

మరిన్ని

ఆరోగ్యమస్తు

మరిన్ని

అనుబంధం

మరిన్ని

యూత్‌ కార్నర్

మరిన్ని

మంచిమాట


'స్వీట్' హోం

మరిన్ని

సూపర్‌ విమెన్

మరిన్ని