నిజ జీవితంలో అమ్మలు అలా ఉండరు..! - young director nischhal sharma made a short film celebrating housewives
close
Published : 12/08/2021 17:12 IST

నిజ జీవితంలో అమ్మలు అలా ఉండరు..!

(Photo: Instagram)

సాధారణంగా సినిమాలు, సీరియల్స్‌లో అమ్మ/గృహిణి పాత్రలెలా ఉంటాయి.. కాలు మీద కాలేసుకొని కూర్చొని ఇంటి పనులన్నీ పని మనుషులతో చేయించుకుంటూ లేదంటే పని మనిషికి ఇంటిపనుల్లో అడపాదడపా సహాయపడుతూ కనిపిస్తారు. అలాగే పురుషులు భార్యను ప్రేమించే భర్తగా, తల్లిని ప్రేమించే కొడుకుగా కనిపిస్తారు. కానీ నిజ జీవితంలో అమ్మ పాత్ర ఇందుకు పూర్తి భిన్నంగా ఉంటుందంటోంది యువ దర్శకురాలు నిశ్చల్‌ శర్మ. ఉదయం లేచింది మొదలు రాత్రి పడుకునే దాకా క్షణం కూడా తీరిక లేకుండా, తనకంటూ కాస్త సమయం కేటాయించుకునే వీల్లేకుండా, ఎన్నో బాధ్యతల్ని భుజాన మోస్తూ మహిళలు తమ రోజుల్ని అతి భారంగా గడిపేస్తుంటారు. అలాంటి గృహిణుల బిజీ లైఫ్స్టైల్‌ని తెర మీద చూపేందుకు ‘రిమి’ పేరుతో ఓ లఘుచిత్రాన్ని రూపొందించిందామె. మహిళల రోజువారీ జీవితాన్ని కళ్లకు కట్టినట్లు చూపించిన ఈ షార్ట్‌ఫిల్మ్‌ ఇప్పటికే ఇండియన్‌ ఫిల్మ్‌ ఫెస్టివల్‌లో ప్రదర్శితమైంది. IFFSA, RIFFA.. వంటి చిత్రోత్సవాల్లో ప్రదర్శించడానికి సిద్ధమవుతోంది. మరి, విమర్శకుల ప్రశంసలందుకుంటోన్న తన లఘుచిత్రం గురించి నిశ్చల్‌ ఏమంటుందో తెలుసుకుందాం రండి..

నిశ్చల్‌ శర్మ.. హైదరాబాద్‌లో పుట్టి పెరిగిన ఆమె ప్రస్తుతం లండన్‌లోని మెట్‌ఫిల్మ్‌ స్కూల్లో ఫిల్మ్‌ డైరెక్షన్‌ విభాగంలో మాస్టర్స్‌ చదువుతోంది. చుట్టూ జరుగుతోన్న సామాజిక అంశాల్ని క్షుణ్ణంగా పరిశీలించడం చిన్ననాటి నుంచే అలవాటు చేసుకున్న ఆమె.. అవే విషయాల్ని కళ్లకు కట్టినట్లుగా తెర మీద చూపించాలని కలలు కనేది. అందుకే 14 ఏళ్ల ప్రాయం నుంచే లఘుచిత్రాలు రూపొందించడం మొదలుపెట్టిందామె. ఎలాగైనా ఈ సమాజంలోని వివక్షను పారదోలాలని, మనుషుల ఆలోచనల్లో మార్పు తేవాలని కంకణం కట్టుకున్న ఆమె.. ఈ విషయాన్ని అందరికీ చేరవేయాలంటే సినిమాలే అందుకు సరైన వేదిక అంటోంది.

సమాజమే నా కథలకు స్ఫూర్తి!

మన చుట్టూ నిత్యం ఎన్నో విషయాలు జరుగుతుంటాయి. వాటిలో కొన్ని మనకు తెలిసినా.. తెలియనివి మరెన్నో ఉంటాయి. అలాంటి అరుదైన విషయాలను, వాటిలోని నిజానిజాల్ని అందరికీ తెలియజెప్పి.. ఈ సమాజంలో మార్పు తీసుకురావడమే లక్ష్యంగా ముందుకు సాగుతున్నానంటోంది 22 ఏళ్ల నిశ్చల్‌. అందుకే తన లఘుచిత్రాలకు కావాల్సిన కథల్ని సమాజం నుంచే సేకరిస్తున్నానంటోంది.

‘సామాజిక అంశాలపై రూపొందించే సినిమాలు ఎంతోమందిని ప్రభావితం చేస్తాయి. అలాంటి కథలు నా దగ్గర బోలెడన్ని ఉన్నాయి. లండన్‌లోని సెక్స్‌ వర్కర్లపై ఓ సినిమా తీయాలన్న ఆలోచన ఉంది. అయితే అంతలోనే లాక్‌డౌన్‌ విధించడంతో గతేడాదే ఇండియాకు తిరిగొచ్చా..’ అంటోంది.

అమ్మను చూశాకే ఆ ఆలోచన!

ఇంటికొచ్చినా సినిమాల ఆలోచన మానలేదంటోంది నిశ్చల్‌. ఈ క్రమంలో ‘రిమి’ షార్ట్‌ఫిల్మ్‌ రూపొందించడానికి తన తల్లే కారణమంటోంది. ‘గతేడాది లాక్‌డౌన్‌ సమయంలో ఇంటికొచ్చినప్పట్నుంచి అమ్మ చేసే రోజువారీ పనుల్ని దగ్గర్నుంచి గమనిస్తుండేదాన్ని. క్షణం తీరిక లేకుండా ఇంటి పనుల్లో, మమ్మల్ని చూసుకోవడంలోనే తను నిమగ్నమైపోయేది. ఇలా ఎంతోమంది గృహిణులు, మహిళలు తమ కుటుంబం కోసం ఎన్నో త్యాగాలు చేస్తున్నారన్న విషయం నాకు అవగతమైంది. అయితే చాలా సినిమాల్లో అమ్మ పాత్రను కల్పితంగా చూపిస్తుంటారు. కానీ నేను మాత్రం ఆమె నిజ జీవితాన్ని తెరకెక్కించాలనుకున్నా. దానికి ప్రతిరూపమే ఈ ‘రిమి’ లఘుచిత్రం..’ అంటూ తన ఆలోచన గురించి చెప్పుకొచ్చింది నిశ్చల్‌. తన స్నేహితులే ప్రొడక్షన్‌ టీమ్‌గా ఈ షార్ట్‌ఫిల్మ్‌ను తెరకెక్కించిందామె.

అసలేంటీ కథ?

13 నిమిషాల నిడివి గల ఈ లఘుచిత్రంలో ఇంటి పనుల రీత్యా ఓ మహిళ బిజీ లైఫ్‌స్టైల్, కుటుంబం కోసం తాను చేసే త్యాగాలను కళ్లకు కట్టినట్లుగా చూపించారు. అయితే అదే సమయంలో ఓ మహిళగా తనకంటూ కొన్ని ఆలోచనలు, కోరికలు ఉంటాయన్న విషయాన్ని కూడా తెరమీదకు తెచ్చింది నిశ్చల్‌. ఈ క్రమంలో రియా అనే ఓ సెల్ఫ్‌ లవ్‌ అమ్మాయి పాత్రను పరిచయం చేసి.. ఆమె స్ఫూర్తితో రిమి తన మనసు లోతుల్లో ఉండే ఇష్టాల్ని, అభిరుచుల్ని తెలుసుకునేలా చేస్తుంది. ఇక అప్పట్నుంచి తనను తాను ప్రేమించుకోవడం, తనకంటూ కాస్త సమయం కేటాయించుకోవడం, తన అభిరుచుల్ని నెరవేర్చుకోవడం.. వంటివన్నీ చేస్తుంటుంది రిమి. ఇలా మహిళలకు ఇల్లే లోకం కాదని, వాళ్లూ తమకు ప్రైవసీ కావాలని కోరుకుంటారని తన లఘుచిత్రంతో చెప్పకనే చెప్పింది నిశ్చల్‌. అంతేకాదు.. ఈ విషయాన్ని ప్రతి ఒక్కరూ అర్థం చేసుకొని.. తద్వారా సమాజంలోని మహిళల్లో మార్పు తీసుకురావాలని కోరుకుంటోందామె. అప్పుడే మహిళలపై ఉన్న వివక్ష, చిన్న చూపు చూడడం.. వంటివి కాస్తైనా తగ్గుముఖం పట్టే అవకాశం ఉందంటోందీ హైదరాబాదీ.

అంతర్జాతీయ గుర్తింపు!

ఇందులో రిమిగా దీపా కిరణ్‌, రియాగా మాన్సీ నటించారు. లాక్‌డౌన్‌లోనే అన్ని జాగ్రత్తలు తీసుకుంటూ చిత్రీకరణ పూర్తి చేసుకున్న ఈ షార్ట్‌ఫిల్మ్‌.. ఈ ఏడాది జర్మనీలోని Stuttgart సిటీ వేదికగా నిర్వహించిన ‘ఇండియన్‌ ఫిల్మ్‌ ఫెస్టివల్‌’లో ప్రదర్శితమైంది. ఇక IFFSA (టొరంటో), RIFFA వంటి చిత్రోత్సవాల్లోనూ ప్రదర్శనకు సిద్ధమవుతోంది. అంతేకాదు.. ఈ ఏడాది జరిగిన ‘దాదాసాహెబ్‌ ఫాల్కే ఫిల్మ్‌ ఫెస్టివల్‌’లో భాగంగా ‘ఉత్తమ స్క్రీన్‌ప్లే’ అవార్డును కూడా అందుకుందీ షార్ట్‌ఫిల్మ్‌. యువ దర్శకురాలిగా గతంలో పలు లఘుచిత్రాలు, యాడ్స్‌ రూపొందించింది నిశ్చల్‌. సైబర్‌ బుల్లీయింగ్‌ నేపథ్యంలో తెరకెక్కిన ‘అహన’, ఛాయ్‌ లవర్స్‌ కోసం ‘అంకుల్‌, దో ఛాయ్‌’, ‘స్కార్స్‌’ పేరుతో గృహ హింసపై రూపొందించిన విజువల్‌ పోయెమ్‌, ‘జెనెసిస్‌’ అనే యాడ్‌ ఫిల్మ్‌.. వంటివి ఆమె డైరెక్షన్‌ ఖాతాలో ఉన్నాయి.

తన దర్శకత్వ ప్రతిభతో అంతర్జాతీయ గుర్తింపు సంపాదించిన నిశ్చల్‌.. ‘ఆడవాళ్ల జీవితాలను కొందరు పురుష దర్శకులు ఇప్పటికే తెరమీదకు తెచ్చినప్పటికీ.. ఇలాంటి కథ ఓ మహిళ నుంచి వచ్చినప్పుడే అది ఎక్కువ మందికి చేరగలుగుతుందని నేను నమ్ముతాను’ అంటోంది.

మరి, నిశ్చల్‌ చెప్పినట్లు.. మహిళలు తమకంటూ ఓ వ్యక్తిగత జీవితం ఉండాలని కోరుకోవడంలో తప్పులేదు. దీనిపై మీరేమంటారు? అతివలు కుటుంబ బాధ్యతల్ని నిర్వర్తిస్తూనే.. తమ కోసం కాస్త సమయం కేటాయించుకోవాలంటే ఏం చేయాలి? ఈ క్రమంలో కుటుంబ సభ్యుల సహకారం/ప్రోత్సాహం ఎంత వరకు ఉండాలి? ఇలాంటి స్వీయ ప్రేమ వల్ల వారికి ఎలాంటి ప్రయోజనాలు చేకూరతాయి? మీ అమూల్యమైన అభిప్రాయాలను, సూచనలను మాతో పంచుకోండి! ఈ విషయంలో ఇతర మహిళల్లో స్ఫూర్తి రగిలించండి!



మరిన్ని

ఇంటి పేరుతో కాదు... ఇది నా స్వయంకృషి...!

నాన్న ప్రముఖ నటుడు దగ్గుబాటి వెంకటేశ్‌. ఇక తాత, పెదనాన్న, అన్న... ఇలా ఆ ఇంట్లో వాళ్ల పేర్లు చెప్పక్కర్లేదు. వారి పేర్లు ఉపయోగించుకుంటే బోలెడు గుర్తింపు. కానీ ఆమె మాత్రం... తన అభిరుచి, సృజనాత్మకత, శ్రమలనే పెట్టుబడిగా గుర్తింపు సాధించాలనుకుంది. తనే వెంకటేశ్‌ పెద్ద కుమార్తె ఆశ్రిత. తన లక్ష్యం దిశగా కృషి చేస్తూ... ఇన్‌స్టాగ్రాం, యూట్యూబ్‌ల్లో లక్షల్లో అభిమానుల్ని సంపాదించుకుంది. ఇటీవల ఇన్‌స్టాగ్రాంలో ఎక్కువ సంపాదిస్తున్న సెలబ్రిటీల జాబితాను హోపర్‌డాట్‌కాం సంస్థ విడుదల చేసింది. అందులో ఆశ్రిత అంతర్జాతీయంగా 377, ఆసియాలో 27వ ర్యాంకులు సాధించింది. ఈ సందర్భంగా వసుంధర ఆమెతో ముచ్చటించింది.

తరువాయి

‘స్పెల్లింగ్స్‌’ చెప్పి సెన్సేషనయ్యారు!

పిల్లల్లో ఇంగ్లిష్‌ నైపుణ్యాలను పరీక్షించడానికి అమెరికాలో ఏటా నేషనల్‌ స్పెల్లింగ్‌-బీ పోటీలు నిర్వహిస్తోన్న సంగతి తెలిసిందే. ఎంతో ప్రతిష్ఠాత్మకంగా జరిగే ఈ పోటీల్లో వేలాదిమంది చిన్నారులు పాల్గొంటారు. తల్లిదండ్రులు కూడా తమ పిల్లలను ఈ పోటీలకు అన్ని రకాలుగా సిద్ధం చేస్తూ ప్రోత్సహిస్తుంటారు. ఇక ఈసారి నిర్వహించిన స్పెల్లింగ్‌-బీ పోటీల్లో లూసియానాకు చెందిన 14 ఏళ్ల జైలా అవంత్‌ గార్డే విజేతగా నిలిచింది. దీంతో 93 ఏళ్ల ఈ కంటెస్ట్‌ చరిత్రలో ఈ ట్రోఫీ నెగ్గిన మొదటి ఆఫ్రికన్‌ అమెరికన్‌గా, రెండో నల్లజాతీయురాలిగా చరిత్ర సృష్టించిందీ యంగ్‌ గర్ల్‌.

తరువాయి

కథ చెబుతాను... ఊ కొడతారా..!

రాత్రయిందంటే చాలు.. బామ్మ చెప్పే నీతికథలు వింటూ నిద్రలోకి జారుకోవడం మనందరికీ చిన్ననాటి ఓ మధుర జ్ఞాపకం! అప్పుడంటే చాలావరకు ఉమ్మడి కుటుంబాలు కాబట్టి ఇది వర్కవుట్‌ అయింది.. ఇప్పుడు వృత్తి ఉద్యోగాల రీత్యా చాలామంది ఇంట్లో పెద్దవాళ్లు, కన్న వాళ్ల నుంచి దూరంగా వచ్చేస్తున్నారు. దీంతో పిల్లలు వాళ్ల గ్రాండ్‌పేరెంట్స్‌ని, వాళ్లు చెప్పే బోలెడన్ని కథల్ని మిస్సవుతున్నారు. ఇలాంటి అనుభవమే తన చెల్లెలికీ ఎదురైందంటోంది 18 ఏళ్ల ప్రియల్ జైన్‌. అది చూసి ఆలోచనలో పడిపోయిన ఆమె.. నీతి కథలు చెప్పే ఓ ప్లాట్‌ఫామ్‌కు శ్రీకారం చుట్టింది. చిన్నారులకు బామ్మ దగ్గర లేని లోటుని తన వెబ్‌సైట్ తీరుస్తుందంటోన్న ఈ యంగ్‌ ఆంత్రప్రెన్యూర్‌ కథేంటో మనమూ తెలుసుకుందాం రండి..

తరువాయి

చిన్నప్పటి కల.. ఇలా సాధించేసింది!

ఆడవారు అనుకుంటే ఏదైనా సాధిస్తారు... వారికి కావల్సిందల్లా కాసింత ప్రోత్సాహం. ఎవరి సహకారం ఉన్నా, లేకున్నా తల్లిదండ్రులు, తోడబుట్టిన వారి సహకారం మాత్రం ఉంటే చాలు... అమ్మాయిలకు అసలు తిరుగుండదు. అన్నింటా విజయాలే సాధిస్తారు. పలువురికి ఆదర్శంగా నిలుస్తారు. అందుకు తాజా ఉదాహరణే 24 ఏళ్ల మావ్యా సూదన్‌. జమ్మూకశ్మీర్‌లోని ఓ మారుమూల గ్రామానికి చెందిన ఈ యువతి ఇటీవల ఇండియన్‌ ఎయిర్‌ ఫోర్స్‌ ఫైటర్‌ పైలట్‌గా నియమితురాలైంది. ఈ నేపథ్యంలో దేశం మొత్తంమీద ఈ అవకాశం దక్కించుకున్న 12 వ మహిళగా, మొదటి కశ్మీరీ మహిళగా గుర్తింపు పొందిందీ యంగ్‌ సెన్సేషన్.

తరువాయి

బ్యూటీ & ఫ్యాషన్

మరిన్ని

ఆరోగ్యమస్తు

మరిన్ని

అనుబంధం

మరిన్ని

మంచిమాట


'స్వీట్' హోం

మరిన్ని

వర్క్‌ & లైఫ్

మరిన్ని

సూపర్‌ విమెన్

మరిన్ని