గాల్లో శివంగిలా

భారత నౌకదళంలో మొదటి మహిళా పైలట్‌ ఎగిరే విమానాలు, హెలికాప్టర్లు ఎంతోమందికి ఆశ్చర్యం కలిగిస్తాయి. ఆమెకూ అంతే. గాల్లో చక్కర్లు కొట్టిన గాలిమోటార్‌ ఆమెకూ ఎగరాలన్న కోరికను పెంచింది. లక్ష్యాన్ని మార్చుకొని పైలట్‌ కావాలన్న కాంక్షను బలపరిచింది. భారత నౌకా దళంలో తొలి మహిళా పైలట్‌గా చరిత్ర సృష్టించేలా చేసింది. ఆమే బిహార్‌కు చెందిన సబ్‌ లెఫ్టినెంట్‌ శివాంగి. తన గురించి వసుంధరతో చెప్పుకొచ్చిందిలా.

శివాంగి బిహార్‌లోని చిన్నపట్టణం ముజఫర్‌పుర్‌లో పుట్టి పెరిగింది. ఆమె తండ్రి ఒక ప్రభుత్వ పాఠశాలలో ప్రధానోపాధ్యాయుడిగా చేస్తున్నారు. తల్లి గృహిణి. చెల్లి, తమ్ముడు. ఇదీ ఆమె కుటుంబం. శివాంగి బాల్యం నుంచే చదువులో రాణించేది. స్థానిక డీఏవీ పాఠశాలలో చదువుకుంది. సిక్కిం, మణిపాల్‌ సాంకేతిక విశ్వవిద్యాలయంలో మెకానికల్‌ ఇంజినీరింగ్‌ పూర్తి చేసింది. తరువాత జయపురలోని నిట్‌లో ఎంటెక్‌లో చేరింది. కొద్ది నెలలకే నౌకాదళంలో అవకాశం రావడంతో... దాన్ని మధ్యలోనే ఆపేసింది.

హెలికాప్టర్‌ చూసి... చిన్నతనంలో ఆమెకు పోలీసు అధికారిణి అవ్వాలని కోరిక ఉండేది. కిరణ్‌బేడి లాంటివాళ్లను చూసినప్పుడు ఒక్కసారైనా అలా యూనిఫారం ధరించాలని అనుకునేదట. ఓసారి శివాంగి వాళ్ల తాతయ్య ఇంటికెళ్లింది. ఆ ప్రాంతానికి రాష్ట్ర మంత్రి వస్తున్నార[ని తెలియడంతో చూడ్డానికి వెళ్లింది. ఆయన హెలికాప్టర్‌లో వచ్చారు. అది ఆకాశంలో చుట్టూ తిరుగుతూ... కిందికి దిగుతుంటే ఆమెకు ఆనందంగా అనిపించింది. అందరూ దాన్ని ఆశ్చర్యంగా చూస్తున్నారు. అప్పుడే... జీవితంలో ఒక్కసారైనా గాల్లోకి ఎగరాలని, విమానం నడపాలనే కోరిక ఆమెలో బలంగా నాటుకుపోయింది. అందుకు కావాల్సిన ప్రయత్నాలు అప్పట్నుంచే మొదలుపెట్టింది. నిట్‌లో చదువుకునే సమయంలో నేవీలో పైలట్‌ శిక్షణ కోసం మహిళా అభ్యర్థుల నుంచి దరఖాస్తులు ఆహ్వానిస్తున్నారని తెలియడంతో ఏం ఆలోచించకుండా దరఖాస్తు చేసుకుంది. మహిళలను పైలట్‌ పోస్టులకు ఎంపిక చేయడం నౌకాదళంలో ఇదే మొదటిసారి. ఆమె అందుకు తగ్గట్టు సన్నద్ధమై సీటు సంపాదించింది. మొత్తం ముగ్గురిని ఎంపిక చేయగా అందులో శివాంగి ఉండటం విశేషం.

తనకు తెలియనివి... సదరన్‌ నేవల్‌ అకాడమీలో శివాంగి ఎంతో కఠినమైన శిక్షణను పూర్తి చేసింది. ‘పైలట్‌ పోస్టుకు ఎంపికవడానికి ఎన్నో సవాళ్లు ఎదుర్కోవాలి. రాత పరీక్షల్లో ప్రతిభ చూపాలి. శారీరక, మానసిక ఆరోగ్యాన్ని సొంతం చేసుకోవాలి. ఎన్నో దేహదారుఢ్య పరీక్షలను ఎదుర్కోవాల్సి ఉంటుంది. శిక్షణ కోసం కోచిలోని నేవల్‌ అకాడమీకి వచ్చిన తరువాత అసలు కథ మొదలైంది. ఇక్కడ నా సామర్థ్యాలు తెలుసుకొని... నా ఆలోచనా విధానాన్ని చాలా వరకు మార్చుకోగలిగా. రోజూ ఉదయం ఐదు గంటలకే నిద్ర లేపేవారు. వెంటనే భిన్నరకాల వ్యాయామాలు, స్ట్రెచెస్‌ ఉండేవి. తరువాత ఈత తరగతులుండేవి. మొదట్లో పది కిలోమీటర్లు పరుగెత్తమని చెప్పారు. నేనెప్పుడూ అలాంటి సాహసం చేయలేదు. మొదటిసారి పరుగెత్తినప్పుడు చాలా కష్టంగా అనిపించింది. చివరికి పూర్తి చేయగలిగా. అప్పుడే నాకు నమ్మకం వచ్చింది. మనం ఏదైనా చేయగలుగుతామని అనుకుంటే తప్పకుండా దాన్ని చేరుకుంటాం. నిరాశలో కూరుకుపోతే ముందుకు సాగలేం. తరువాత 15 కిమీలను సైతం సునాయాసంగా పరుగెత్తడం నేర్చుకున్నా. నాకు అంతకు ముందు ఈత సరిగ్గా రాదు. ఇక్కడికి వచ్చాక చాలా మెరుగయ్యా. వీటితో పాటు నేవీకి సంబంధించిన విషయాలు, మరికొన్ని సాంకేతిక అంశాలు చెప్పేవారు. ఇక్కడ రోజు మొత్తం పూర్తిగా ఎలా సద్వినియోగం చేసుకోవాలో తెలిసింద’ని అంటుందామె.

శివాంగి కఠోర శిక్షణను పూర్తి చేసుకుని డిసెంబర్‌ 2న విధుల్లో చేరనుంది. తనతోపాటు చేరిన మరో ఇద్దరి కంటే ముందే శిక్షణను పూర్తి చేసి నౌకాదళంలో మొదటి మహిళా పైలట్‌గా గుర్తింపు పొందింది. నేవీలో ఇప్పటికే ఎయిర్‌ ట్రాఫిక్‌ను నియంత్రించే అధికారులుగా, కమ్యూనికేషన్స్‌, ఆయుధాలను పర్యవేక్షించే విభాగాల్లో మహిళలు పని చేస్తున్నారు. శివాంగి త్వరలో సముద్రంపై డోర్నియర్‌ ఎయిర్‌క్రాఫ్ట్స్‌ను నడపనుంది. ‘నేను ఈ ఘనత సాధించినందుకు ఆనందంగా ఉంది. క్లిష్ట పరిస్థితుల్లోనూ నా బాధ్యతలను సమర్థవంతంగా నెరవేర్చగలనన్న నమ్మకం వచ్చింది. నాకు దూర ప్రాంతాలకు ప్రయాణించడమన్నా... నవలలు చదవడమన్నా ఇష్టం. నన్ను ఎవరూ వెనక్కి లాగాలని ప్రయత్నించలేదు. చుట్టూ ఉన్న సమాజం నన్ను ప్రోత్సహించి ముందుకు నడిపింది. చాలా తక్కువ మంది మహిళలు ఉండే రంగంలో మనమ్మాయి మెరుగ్గా రాణిస్తుంది కదా అనేవార’ని చెబుతుందామె.

మొదటిసారి ఎయిర్‌క్రాఫ్ట్‌ చూసినప్పుడు.... చాలా ఆనందంగా అనిపించింది. అందులోకి వెళ్లి కూర్చున్నప్పుడు... మనసులో చిన్న అలజడి. భయంగానూ అనిపించింది. నడపగలనా అని ఒక్కక్షణం అనిపించింది. ఇక్కడివరకూ రావడానికి ఎంత కష్టపడ్డానో తెలిశాక నాలో ధైర్యం వచ్చింది. కష్టం, అంకితభావంతో ఒక్కో సవాలునీ అధిగమిస్తూ విజయవంతంగా శిక్షణ పూర్తి చేసుకున్నా.

Tags :