తీర్పులిచ్చేస్తుంది బంట్రోతుగారమ్మాయి

మహిళా జయహో

తీర్పులిచ్చేస్తుంది బంట్రోతుగారమ్మాయి

కోర్టులో నాన్న ప్యూన్‌గా పనిచేయడం ఆ అమ్మాయికి చిన్నప్పటి నుంచి ఇష్టం ఉండేది కాదు. బాగా చదువుకుని న్యాయమూర్తిగా బాధ్యతలు తీసుకోవాలనుకునేది. దాన్నే లక్ష్యంగా పెట్టుకుంది. జ్యుడీ…షియల్‌ సర్వీస్‌ పరీక్షల్లో ఉత్తీర్ణురాలై అనుకున్నది సాధించింది. త్వరలో జడ్జిగా పదవీస్వీకారం చేయనుంది. ఆమే... అర్చన.

బిహార్‌లోని సోనేపూర్‌ కోర్టులో అర్చన తండ్రి గౌరీనందన్‌ గుమస్తాగా విధులు నిర్వహించేవాడు. బాల్యంలో తండ్రితోపాటు అప్పుడప్పుడు కోర్టుకు వెళ్లేదామె. ఆ కోర్టులోకి వచ్చే న్యాయమూర్తులందరికి సహాయకారిగా ఆయన చేసే పనులు అర్చన మనసుకు కష్టం కలిగించేవి. అప్పుడే పెద్ద చదువులు చదువుకొని తండ్రి సేవలందించే న్యాయమూర్తిలా గుర్తింపు సాధించాలనుకుంది. కానీ పరిస్థితులు ఆమె లక్ష్యం చేరుకునేందుకు సహకరించలేదు. ఇంటర్‌కి రాకముందే తండ్రి అనారోగ్యంతో చనిపోయాడు. దీంతో కుటుంబం ఆర్థిక ఆసరాను కోల్పోయింది. అనుకున్న లక్ష్యాన్ని సాధించడం అటుంచి, కనీసం ఇంటి అవసరాలు తీరలేని పరిస్థితి ఏర్పడింది.

అమ్మ చేయూతతో
అర్చన కల నెరవేరడానికి ఆమె తల్లి చేయూత అందించింది. స్నేహితులు, బంధువుల అండతో ఆమెను చదివించింది. పాట్నా, శాస్త్రీనగర్‌ ప్రభుత్వ పాఠశాలలో ఇంటరు పూర్తిచేసి, పాట్నా విశ్వవిద్యాలయంలో ఉన్నతాభ్యాసానికి వెళ్లింది. ‘నాన్న ఉద్యోగం చేసినప్పుడు చిన్న గదిలో ముగ్గురం ఉండేవాళ్లం. ఆయన చనిపోయిన తరువాత మా పరిస్థితి మరింత దయనీయంగా మారింది. పై చదువులకు అమ్మను ఇబ్బంది పెట్టడం ఇష్టం లేక, అక్కడితో ఆపేసి, నేను చదివిన పాఠశాలలోనే కంప్యూటర్‌ ఉపాధ్యాయురాలిగా చేరా. ఆ తరువాత పాట్నా మెడికల్‌ కాలేజ్‌ హాస్పిటల్‌లో క్లర్క్‌గా పనిచేస్తున్న రాజీవ్‌ రంజన్‌తో పెళ్లైంది. మాకు బాబు పుట్టాడు. చదువుకోవాలని ఉన్నా... కొనసాగించలేకపోయానని బాధపడేదాన్ని. చివరకు నా భర్తకు ఈ విషయం చెప్పా. చిన్నప్పటి నుంచి జడ్జి అవ్వాలనే నా కలను ఆయన అర్థం చేసుకున్నాడు. నాకు పూర్తి సహకారం అందించాడు. అప్పటికే మా అబ్బాయికి అయిదేళ్లు. అత్తింటివారు ఈ విషయంలో చేయూతనిచ్చి ప్రోత్సహించారు. బాబుని అత్తింట్లో అప్పజెప్పి, పుణెలో ఎల్‌ఎల్‌బీ చదవడానికి వెళ్లా. బాబును వదిలేసి వచ్చి చదువుకుంటున్నా అని అప్పుడప్పుడు ఏడుపు వచ్చేది. ఆ సమయంలో నా లక్ష్యాన్ని గుర్తు చేసుకునేదాన్ని. పూర్తిగా చదువుపై ధ్యాస ఉంచేదాన్ని. ఆ తరువాత బీఎంటీ లా కళాశాలలో అయిదేళ్లక్రితం ఎల్‌ఎల్‌ఎం పూర్తి చేశా. అక్కడి నుంచి దిల్లీకి వచ్చి జ్యుడిషియల్‌ సర్వీస్‌ పరీక్షలకు హాజరుకావడానికి శిక్షణాతరగతుల్లో చేరా. పరీక్షలు రాశా. మొదటి సారి ఫెయిల్‌ అయ్యా. కొంత నిరుత్సాహపడినా, తిరిగి రాసి సాధించా. దీని వెనుక అమ్మ, నా భర్త సహకారం ఎంతో ఉంది. కలను నెరవేర్చుకోవాలంటే కృషి, అంకిత భావం ఉండాలి అని చెప్పేది అమ్మ. మా అబ్బాయి బాధ్యతలన్నీ అత్తింటివారు చూసుకునేవారు. ఇవన్నీ నేను లక్ష్యాన్ని సాధించేందుకు తోడ్పడ్డాయి. న్యాయమూర్తిగా త్వరలో బాధ్యతలు స్వీకరించనున్నా. ఈ సందర్భంలో నాన్న నాతో ఉంటే బాగుండేది అనిపిస్తోంది. పెళ్లి, కుటుంబం ఇతర బాధ్యతలేవీ లక్ష్యానికి అవరోధాలుగా మారవు. ప్రణాళికతో ముందడుగేస్తే అన్ని రంగాల్లోనూ మహిళలు విజయం సాధిస్తారు’ అని చెబుతోంది అర్చన.

Tags :