వీధి బాలలకు విద్య నేర్పుతాం..

చదువుకుంటున్నప్పుడే... నిరుపేద చిన్నారుల గురించి ఆలోచించిన ఆమె... డ్రాపవుట్లు తగ్గించేందుకు ఉచిత పాఠశాలలు ప్రారంభించింది. ఆమే ముంబయికి చెందిన కృతికారావు.

ఓ రోజు తండ్రి గణేశ్‌రావుతో కలిసి కృతిక కోయంబత్తూరు రోడ్డుపై నడుస్తోంది. ఆ పక్కన ఉండే మురికివాడల్లోని చిన్నారులు ఆరుబయట ఆడుకోవడం గమనించింది. బడికి వెళ్లాల్సిన సమయంలో వాళ్లక్కడ ఏం చేస్తున్నారో అర్థంకాలేదామెకు. అదే ఆ పిల్లల్ని అడిగితే ‘తరగతిలో చెప్పే పాఠాలు అర్థంకాక’ అని సమాధానం ఇచ్చారు. పరీక్షలెలా రాస్తారని అడిగితే... ట్యూషన్‌ అంటూ వెళ్లిపోయారు. ప్రైవేటుగా పాఠాలు చెప్పించుకునే స్థోమత వాళ్లది కాదని తెలుసుకున్న ఆమె... ఆ చిన్నారులకోసం ఏదైనా చేయాలనుకుంది. తండ్రీ ప్రోత్సహించడంతో తనదైన ప్రయత్నాలు మొదలుపెట్టింది.

అధ్యయనం చేసి...

కృతిక ముంబయిలో డిగ్రీ చదివేది. సెలవుల్లో కోయంబత్తూరు వచ్చేది. ఆ సమయంలో ఏయే ప్రాంతాల్లో డ్రాపవుట్లు ఎక్కువగా ఉన్నారో తెలుసుకునేది. మురికివాడలు, మారుమూల ప్రాంతాలన్నీ తిరిగి, ఆ పిల్లల చదువు గురించి వాకబు చేసేది. బళ్లో పాఠాలు అర్థంకాకే చదువుల్లో వెనుకబడుతున్నారని, కొందరు ఏకంగా స్కూలే మానేస్తున్నారని తెలుసుకుంది. వాళ్లకు ఆంగ్లం, లెక్కలు, సైన్సును అర్థమయ్యేలా చెప్పాలనుకుంది. చివరకు వీధిపాఠశాల అర్థంవచ్చేలా ‘నుక్కాడ్‌ స్కూల్‌’ పేరుతో అయిదేళ్లక్రితం విద్యాకేంద్రాల్ని ఏర్పాటుచేసింది. ‘మొదటి కేంద్రాన్ని కోయంబత్తూరులోనే ప్రారంభించా. అక్కడ నాన్నకు వ్యాపారం ఉంది. అమ్మానాన్న సహకారంతో చదువుకున్న నిరుద్యోగుల్ని ఉపాధ్యాయులుగా ఎంచుకున్నా. పిల్లలకు పాఠాలు చెప్పడంలో వారికి శిక్షణ ఇచ్చి టీచర్లుగా మార్చాం...’ అని చెబుతుంది కృతిక.

రోజూ... రెండుగంటలు చదువు

వారంలో ఆరురోజులు రెండు గంటల చొప్పున ఈ విద్యాకేంద్రాలు నడుస్తాయి. ఒక్కో తరగతిలో 20 నుంచి 40 మంది పిల్లలుంటారు. ఎల్‌కేజీ నుంచి ఇంటర్‌ వరకూ ఇక్కడ పాఠాలు చెబుతారు. ప్రస్తుతం 38 విద్యాకేంద్రాలుంటే... అన్నింట్లో కలిపి దాదాపు 1,500 మంది చదువుకుంటున్నారు. పాఠాలు సులువుగా అర్థమయ్యేలా బొమ్మలు, కథల రూపంలో చదువు చెబుతారిక్కడ. వాటితోపాటు కథలు, వీడియోలు, ఆటల ద్వారా మానవతా విలువల్నీ నేర్పిస్తారు. ‘ఆ పిల్లల్ని భవిష్యత్తులో ఉత్తమ పౌరులుగా, ఉన్నత విద్యావంతులుగా తీర్చిదిద్దడమే నా లక్ష్యం. నేను ప్రస్తుతం ముంబయిలో ‘మాస్టర్‌ ఇన్‌ జనరల్‌ మేనేజిమెంట్‌’ చదువుతున్నా. నెలకొకసారి కోవై వెళ్లి, మా కేంద్రాలన్నింటినీ గమనిస్తా. భవిష్యత్తులో దేశవ్యాప్తంగా వీటిని విస్తరించే ఆలోచనలో ఉన్నా. ఇవన్నీ నిర్వహించేందుకు నెలకు లక్షన్నర రూపాయలు ఖర్చవుతున్నాయి. ఆ డబ్బును క్రౌడ్‌ఫండింగ్‌ ద్వారా సేకరిస్తున్నా. ప్రస్తుతం తరగతిలో ప్రొజెక్టర్‌ ఏర్పాటు చేసి, విద్యార్థులకు ‘ఆన్‌లైన్‌ మెంటార్‌షిప్‌ ప్రోగ్రాం’ పేరుతో ఇతర ప్రాంతాల నుంచీ... ఉపాధ్యాయులు పాఠాలు చెప్పేలా ఏర్పాట్లూ చేస్తున్నాం...’ అని చెప్పే కృతిక ఆ పిల్లల తల్లిదండ్రులకూ చదువు విలువ తెలియజేస్తోంది.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

మరిన్ని

రుచులు

App