YSRCP: మీసం మెలేసి.. తెదేపా శ్రేణులకు వైకాపా ఎమ్మెల్యే బొల్లా బ్రహ్మనాయుడు సవాల్!

పల్నాడు జిల్లా వినుకొండ నియోజకవర్గ శావల్యాపురంలో వైకాపా, తెదేపా వర్గాల మధ్య కొద్దిసేపు ఘర్షణ వాతావరణం నెలకొంది. నారా లోకేశ్‌ చేపట్టిన ‘యువగళం’ పాదయాత్ర వంద రోజులు పూర్తి చేసుకున్న సందర్భంగా మాజీ ఎమ్మెల్యే జీవీ ఆంజనేయులు ఆధ్వర్యంలో వినుకొండ పట్టణంలో సంఘీభావ పాదయాత్ర నిర్వహించారు. అదే మార్గంలో ఎమ్మెల్యే బొల్లా బ్రహ్మనాయుడు (Bolla Brahma Naidu) వచ్చారు. తెదేపా శ్రేణుల నినాదాలు విని ఆగ్రహంతో ఊగిపోయిన బొల్లా బ్రహ్మనాయుడు.. కారులో నుంచి బయటకు వచ్చి ‘‘దమ్ముంటే రండి చూసుకుందాం. మీ సంగతి తేలుస్తా అంటూ’’ దుర్భాషలాడుతూ మీసం  మెలేశారు. పోలీసులు కలుగజేసుకొని ఎమ్మెల్యే కారును అక్కడి నుంచి పంపించేశారు.