- Eenadu

నేడే వేసవిచూడండి

ధన్‌ ధనా ధన్‌ సమ్మర్‌ ప్లాన్‌‘

నాన్నా! పరీక్షలయ్యాక సమ్మర్‌ వెకేషన్‌కి నేహ వాళ్ల ఫ్యామిలీ డార్జిలింగ్‌ వెళ్తోందట! మనం ఎక్కడికెళ్దాం’ కూతురి ఉత్సాహం. ‘చూద్దాంలే! పరీక్షలు బాగా రాయి’ నాన్న మాట. పరీక్షలయ్యాక చూస్తే ఏముంటుంది.. రైళ్లలో వెయిటింగ్‌ లిస్ట్‌, ఆకాశంలో విమాన ఛార్జీలు! ఫలితం... ప్రయాణం వాయిదా! పిల్లలకు ఆటవిడుపు దూరం. మీ మనసుకూ ఆనందం దూరం. నేడే స్పందించండి. వేసవిలో ఏమేం చూడాలో తేల్చుకోండి. ప్రయాణం ఎలాగో నిశ్చయానికి రండి. అయితే మాకేంటి అంటారా.. చదివేయండి మరి!

పొరుగూరుకు పోవాలంటేనే పది రకాలుగా ఆలోచిస్తారు. పండగకు సొంతూరు వెళ్లాలనుకుంటే రెండు నెలల ముందు నుంచే సన్నద్ధం అవుతుంటారు. విహారయాత్రలకు మాత్రం అప్పటికప్పుడు స్పందిస్తుంటారు. ఆదరాబాదరాగా వెళ్లిపోతుంటారు. అక్కడ నిరీక్షణలు, నీరసాలు, అలసటలు తప్పవు. వీటిని తప్పించుకోవడానికి ముందుగా టికెట్లు, బస ఏర్పాట్లు చేసుకోవాలి. ఒక ప్రణాళిక ప్రకారం వెళితే యాత్రలు ఆద్యంతం అనువుగా సాగుతాయి. ఆనందాల్ని మిగుల్చుతాయి.

సరి చూసుకోండి..
* పర్యాటక కేంద్రాన్ని ఎంచుకున్న తర్వాత దాని చుట్టూ చూడాల్సిన ప్రదేశాలు ఎన్నో ఉంటాయి. మార్గం మధ్యలోనూ ఒకట్రెండు విహార కేంద్రాలు చుట్టి వచ్చేలాగా ప్రణాళిక చేసుకోగలిగితే మరీ మంచిది.
* టికెట్ల బుకింగ్‌, రూమ్‌ బుకింగ్‌ సమయంలో డెబిట్‌ కార్డులు, క్రెడిట్‌ కార్డులను ఉపయోగించడం ద్వారా డిస్కౌంట్లు లభించే అవకాశం ఉంది.
* సొంతంగా విహరించే వారికి రూట్‌మ్యాప్‌పై అవగాహన ఉండాలి. ముందుగా ఎక్కడికి వెళ్లాలి, ఎక్కడ బస చేయాలి, ఎన్ని గంటల వరకు చేరుకుంటాం.. వంటి విషయాల్లో స్పష్టత ఉండాలి. లేకపోతే.. వచ్చిన దారిలోనే మళ్లీ వెళ్లడం, మధ్యలో మంచి ప్రదేశాన్ని మిస్‌ అవ్వడం వంటివి జరుగుతాయి.
* వేసవికి రెండునెలల ముందు నుంచే ట్రావెల్‌ సంస్థలు ప్యాకేజీలు ప్రకటిస్తాయి. ముందస్తుగా ప్యాకేజీలు బుక్‌ చేసుకోవడం వల్ల మంచి ఆఫర్లు పొందవచ్చు.
* పర్యాటక సంస్థ గతానుభవం, విశ్వసనీయత తెలుసుకొని బుక్‌ చేసుకోవాలి. ప్రయాణం, భోజనం, బస ఖర్చులు ప్యాకేజీలోనే వస్తాయో లేదో తెలుసుకోవాలి. విదేశీ ప్యాకేజీల్లో వీసా, ప్రయాణ బీమా కవర్‌ అవుతున్నాయో లేదో తెలుసుకోవాలి.
* కొన్ని పర్యాటక సంస్థలు ప్యాకేజీ ధరలను ఎలాంటి వడ్డీ లేకుండా వాయిదాల పద్ధతిలో చెల్లించే వెసులుబాటు ఇస్తాయి. అలాంటి ఆఫర్లను వాడుకోవాలి.
* ఖర్చుల విషయంలో జాగ్రత్తగా ఉండాలి. అనవసరమైన ఖర్చుల జోలికి వెళ్లకుండా, అవసరమైన వాటికి వెనుకాడకుండా వినోదానికి లోటు లేకుండా చూసుకోవాలి.

చూడాలంటే ఎన్నెన్నో..
ఎక్కడికి వెళ్లాలనే దానిపై స్పష్టత ఉండాలి. కుటుంబసభ్యుల అభిప్రాయాలను పరిగణనలోకి తీసుకోవాలి. ప్రకృతి సౌందర్యం ఇష్టపడని వారుండరు. వేసవిలో చల్లని ప్రదేశాలకు వెళ్లాలనుకునే వారు ఎక్కువగా ఉంటారు. ఇంట్లో పెద్దలు యాత్రలో ఒకటో రెండో పుణ్యక్షేత్రాలు ఉండాలంటారు. చారిత్రక ప్రదేశాల విశేషాలు తెలుసుకోవాలనే ఆరాటమూ ఉంటుంది. సాహస యాత్రలు సాగించాలనే ఆత్రుత యువతది. ఇందరినీ ఒప్పించే, మెప్పించే పర్యాటక కేంద్రాలు ఎన్నో ఉన్నాయి. అలాంటి చోటుకు వెళ్తే.. వేసవి విహారం వినోదభరితంగా ఉంటుంది. డార్జిలింగ్‌, సిమ్లా, శ్రీనగర్‌, మనాలి, అల్మోరా తదితర శీతల ప్రాంతాలు అందరినీ అలరిస్తాయి. అందుకే వేసవి సీజన్‌లో ఈ ప్రాంతాలకు పర్యాటకుల తాకిడి ఎక్కువ. రుషీకేష్‌, హరిద్వార్‌ యాత్రలు చల్లదనానికి కేరాఫ్‌గా నిలుస్తాయి. భక్తి భావాన్ని పంచడంతో పాటు సాహసాలకు పురిగొల్పుతాయి. ఈశాన్య రాష్ట్రాల్లో పర్యటన సరికొత్త సంస్కృతిని కళ్లముందుంచుతుంది. ఉత్తరాదిలోనే కాదు దక్షిణ భారతంలోనూ వేసవి విడిది కేంద్రాలున్నాయి. కర్ణాటకలో కూర్గ్‌, నందిహిల్స్‌, తమిళనాడులో ఊటీ, కొడైకెనాల్‌, పొల్లాచి, కేరళలో వయనాడ్‌, మున్నార్‌, ఆంధ్రప్రదేశ్‌లో అరకు, హార్స్‌లీహిల్స్‌ ఇవన్నీ వేస‘వినోద’ కేంద్రాలే! ఇదే సమయంలో దేశంలోని వివిధ ప్రాంతాల్లో ఉన్న వన్యప్రాణి సంరక్షణ కేంద్రాలు చూసిరావొచ్చు. గుజరాత్‌లోని గిర్‌, అసోంలోని కజిరంగా, మధ్యప్రదేశ్‌లోని కన్హా వన్యప్రాణి సంరక్షణ కేంద్రాల్లో సఫారీ ఊహించని ఆనందాన్నందిస్తాయి.

ముందస్తు శుభమస్తు
విహారాల విషయంలో ముందస్తుగా ప్రణాళిక చేసుకుంటే దాదాపు 47 శాతం వరకు ఖర్చులు కలిసి వస్తాయని కయాక్‌ సంస్థ నిర్వహించిన సర్వేలో వెల్లడైంది. అంతర్జాతీయ విహారాలకు రెండు నెలల ముందుగా, దేశీయ ప్రయాణాలకు కనీసం మూడు వారాల ముందుగా విమాన టికెట్లు బుక్‌ చేసుకోవడం ద్వారా 10 నుంచి 47 శాతం వరకు ఆదా అయ్యే అవకాశాలు ఉన్నాయి. దుబాయ్‌, బాలి, హాంగ్‌కాంగ్‌ తదితర దేశాలకు కనీసం రెండు నెలల ముందుగా, న్యూయార్క్‌, లండన్‌, టొరొంటో లాంటి నగరాలకు వెళ్లాలనుకుంటే రెండున్నర నెలల ముందుగా బుకింగ్‌ ఏర్పాట్లు చేసుకుంటే లాభం.. శుభమని సర్వే సారాంశం.

వేసవిలో తెలుగు రాష్ట్రాల్లో చాలామంది తీర్థయాత్రలకు మొగ్గుచూపుతారు. పిల్లలకు సెలవులు ఉండటంతో.. పెద్దలు తీరికగా యాత్రలకు వెళ్లడానికి ఆసక్తి చూపుతారు. ఏప్రిల్‌లో మొదలయ్యే చార్‌ధామ్‌ యాత్రకు ఫిబ్రవరి నుంచే ప్యాకేజీ బుకింగ్‌లు ప్రారంభమవుతాయి. మానస సరోవర యాత్రకూ వీలైనంత తొందరగా ఏర్పాట్లు చేసుకుంటే ఖర్చులు కలిసి వస్తాయి. ఉత్తర భారతంలోని పర్యాటక ప్రాంతాలన్నీ దిల్లీ మీదుగానే వెళ్లాల్సి ఉంటుంది. పర్యాటకులు దిల్లీ విమాన టికెట్లు ముందుగానే బుక్‌ చేసుకోవడం వల్ల 30-50 శాతం వరకు డబ్బు ఆదా అవుతుంది. కాస్త ముందుగా స్పందిస్తే పర్యాటక సంస్థలు ప్రకటించే ఆఫర్లను సద్వినియోగం చేసుకోవచ్చు.

ముందుగా తెలుసుకోవాలి..
మొదటిసారి విదేశీ విహారానికి వెళ్తున్న వాళ్లు.. సొంతంగా కాకుండా టూరిస్ట్‌ ఆపరేటర్‌ ద్వారా వెళ్లడమే మంచిదని పర్యాటక నిపుణులు చెబుతారు. కొత్తగా వెళ్లే వారికి ఏ ప్రాంతాలు చూడాలి, ఏం తినాలి, ఎక్కడ ఉండాలనే విషయాలు ఆందోళన కలిగిస్తాయి. ప్యాకేజీలో వెళ్తే ఈ చిక్కులేం ఉండవు. రానున్న వేసవిలో వినోదాన్ని పంచడానికి టూరిస్ట్‌ ఆపరేటర్లు ఇప్పటికే ప్యాకేజీలు ప్రకటించేశారు. థాయ్‌లాండ్‌, మలేసియా, యూరప్‌ దేశాలు, సింగపూర్‌, బాలి, కాంబోడియా, టర్కీ, జపాన్‌, ఆస్ట్రేలియా, ఫిజీ, వియత్నాం, మాల్దీవులు తదితర దేశాలకు టూర్లు నిర్వహిస్తున్నారు. పాస్‌పోర్ట్‌, వీసా ప్రాసెసింగ్‌ వంటివన్నీ ప్యాకేజీలో భాగమే అని ప్రకటిస్తున్నారు. చివరి నిమిషంలో ప్యాకేజీ బుక్‌ చేసుకుంటే ఆఫర్లు లభించకపోవచ్చు. తొందరగా స్పందించడం ద్వారా ఆపరేటర్లతో బేరాలాడే వెసులుబాటు ఉంటుంది. ప్యాకేజీలో ఉన్నవేంటి, లేనివేంటి తెలుసుకోవడం పర్యాటకుల బాధ్యత.

- ఆర్వీ రమణ, ఆర్వీ టూర్స్‌ అండ్‌ ట్రావెల్స్‌

Tags :