హిమలోయ.. సినీమాయ

క్యా సీన్‌ హై!

హిమసీమల్లో షూటింగ్‌ చేసుకున్న సినిమాలు కోకొల్లలు. వెండితెరపై కశ్మీర సౌందర్యం కనిపిస్తే చాలు.. ప్రేక్షకులు అలా చిత్రంలో లీనమవుతారు. అక్కడి ప్రకృతి సౌందర్యం ఎన్నో చిత్రాలకు ఆకర్షణగా నిలిచింది. 1983లో వచ్చిన ఓ సినిమా మాత్రం ఓ హిమలోయకు పేరుగా నిలిచిపోయింది. ఆ చిత్రం పేరు బేతాబ్‌. సన్నిడియోల్‌ హీరో. అనంతనాగ్‌ జిల్లా పహల్గామ్‌కు సుమారు 5 కిలోమీటర్ల దూరంలో ఉన్న అందమైన లోయ ఇది. చుట్టూ కొండలు, వాటిపై అంతెత్తు దేవదారు వృక్షాలు, కొండల నడుమ ఉరుకుల పరుగులతో లిద్ధర్‌ నది, ఆ పక్కనే పచ్చికతో విశాలమైన మైదానంతో స్వర్గాన్ని మరిపిస్తుందీ లోయ. ఈ అద్భుతమైన లొకేషన్‌లోనే బేతాబ్‌ చిత్రంలో చాలా భాగం చిత్రీకరించారు. ఆనాటి నుంచి ఈ లోయకు బేతాబ్‌ లోయగా పేరు స్థిరపడింది. అమరనాథ్‌ యాత్రలో బేస్‌క్యాంప్‌ అయిన పహల్గామ్‌కు యాత్రికుల తాకిడి ఎక్కువగానే ఉంటుంది. ఇక్కడికి వచ్చే పర్యాటకులు బేతాబ్‌ వ్యాలీని కూడా చూసి వస్తుంటారు. ఆ సినిమా చూసిన వాళ్లు అందులోని సన్నివేశాలను గుర్తు చేసుకొని మరింత సందడి చేస్తారు.

Tags :