స్పోర్ట్స్‌ స్టార్‌

ఇంట్లో నుంచి పారిపోయి...

17 ఏళ్ల అమ్మాయి ఇంట్లో నుంచి పారిపోయింది అంటే... అదేదో ప్రేమ వ్యవహారం అయ్యుండొచ్చనే అనుకుంటారు చాలామంది.. కానీ ఓ అమ్మాయి తనకిష్టమైన ఆట కోసం.. దేశానికి ప్రాతినిధ్యం వహించాలనే కల కోసం.. గడప దాటింది అంటే నమ్మగలరా? ఫుట్‌బాల్‌తో ముడిపడిన తన జీవితంలో ఆ ఆటే లేకుండా చేయాలని చూసిన తల్లిదండ్రులకు దూరంగా.. ఆడపిల్లవి నీకా ఆటలవసరమా? అని తన ఆశయాలకు అడ్డుగోడలు కట్టాలనుకున్న గ్రామపెద్దలకు కనిపించకుండా వెళ్లిన ఆ అమ్మాయి.. అందనంత ఎత్తుకు ఎదిగింది. ఏఎఫ్‌సీ ‘ఎ’ లైసెన్స్‌ పొందిన అతిపిన్న వయస్కురాలైన భారత మహిళా కోచ్‌గా చరిత్ర సృష్టించింది. 30 ఏళ్ల అంజూ తురాంబేకర్‌ గురించే ఈ ఉపోద్ఘాతమంతా! ఫుట్‌బాల్‌ క్రీడాకారిణిగా కెరీర్‌ మొదలెట్టి.. కోచ్‌గా మారిన ఆమె ప్రయాణం స్ఫూర్తిదాయకం.

మహారాష్ట్రలోని కొల్హాపూర్‌ జిల్లా బెకనాల్‌ అనే మారుమూల గ్రామం నుంచి వచ్చిన అంజూ.. ఆసియా ఫుట్‌బాల్‌ సమాఖ్య గ్రాస్‌రూట్స్‌ అభివృద్ధి ప్యానెల్‌లో సభ్యురాలిగా ఎంపికయ్యే స్థాయికి చేరుకోవడం వెనక అకుంఠిత దీక్ష, అంకితభావం దాగి ఉన్నాయి. చిన్నతనంలోనే ఫుట్‌బాల్‌ను ఇష్టపడి.. ఆ క్రీడలో జాతీయ స్థాయిలో గొప్పగా రాణించి.. అనంతరం కోచింగ్‌ వైపు అడుగులు వేసిన ఆమె ప్రస్థానంలో ఎన్నో మలుపులున్నాయి. ప్రతి అడుగులోనూ ఒడుదొడుకులు ఎదురైనా.. చుట్టుపక్కల వాళ్లు సూటిపోటి ప్రశ్నలతో వేధించినా.. ఆమె ప్రయాణం ఆగలేదు.

పేడ ఎత్తి.. గేదెలు కడిగి: అంజూ కుటుంబానికి వ్యవసాయ క్షేత్రంతో పాటు గేదెలు ఉండేవి. చిన్నప్పటి నుంచే పొలంలో పని చేయడం, గేదెలను చూసుకోవడం, ఇంటిని చక్కబెట్టడం, చదవడం ఇదే తన లోకం. తన కష్టానికి సెలవులంటూ ఉండేవి కావు. దగ్గర్లోని పట్టణానికి వెళ్లి కూరగాయాలు అమ్మేది. ఇలాంటి పరిస్థితుల్లో కూడా ఆమె ఆటలపై ఇష్టాన్ని పెంచుకుంది. మొదట్లో అథ్లెటిక్స్‌లో సత్తాచాటింది. ఆమె తొమ్మిదో తరగతిలో ఉండగా.. బాలికలకు ఫుట్‌బాల్‌లో శిక్షణ ఇస్తున్నారనే విషయం తెలిసి వెళ్లింది. అక్కడి నుంచి బంతి కోసం ఆమె పరుగు ఆగలేదు. మారుమూల గ్రామం కావడంతో వాళ్ల ఊరికి బస్సు సౌకర్యం ఉండేది కాదు. శిక్షణ ముగించుకొని చీకట్లోనే నడుచుకుంటూ ఇంటికి చేరేది. మరోవైపు అబ్బాయిలతో కలిసి ఫుట్‌బాల్‌ ఆడుతుంతుండటంపై తండ్రి తిట్టాడు. కొట్టాడు కూడా. గ్రామపెద్దలు కూడా వారించారు. అయినా కూడా అంజూ వెనక్కి తగ్గలేదు. మెరుగ్గా రాణించి అండర్‌-19 జిల్లా జట్టుకు ఎంపికైంది. ఆ తర్వాత మహారాష్ట్ర తరపున అండర్‌-19 జాతీయ స్థాయి ఛాంపియన్‌షిప్‌లో ప్రాతినిధ్యం వహించింది. జట్టుకు కెప్టెన్‌గా కూడా వ్యవహరించింది. అయినప్పటికీ తల్లిదండ్రులు ఆమెను అడ్డుకొనే ప్రయత్నం చేశారు. ఆట మానేసి పోలీస్‌ ఉద్యోగం కోసం ప్రయత్నించాలని సూచించారు. దీంతో ఆమె ఇంట్లో నుంచి వెళ్లిపోయింది.

కోచ్‌గా మారి...

జాతీయ ఛాంపియన్‌షిప్‌లో మహారాష్ట్రను రన్నరప్‌గా నిలిపిన అంజూ ప్రతిభ గుర్తించిన కోచ్‌ పుణెలోని తన క్లబ్బులో చేరాలని ఆమెను కోరాడు. అప్పటికే ఇంటి నుంచి వచ్చేసిన ఆమె ఏమాత్రం ఆలోచించకుండా సరేనంది. పేయింగ్‌ గెస్ట్‌గా ఉండే ఇంట్లో పనులు చేసింది. ఒక్కోసారి తినడానికి ఏమీ లేక కడుపు మాడ్చుకొని పడుకునేది. అలాంటి పరిస్థితుల్లో కూడా జాతీయ జట్టుకు ఆడాలనే లక్ష్యం కోసం శ్రమించేది. రెండు సార్లు భారత శిబిరానికి ఎంపికైంది. కానీ ఆ శిబిరాలను నిర్వహించలేదు. ఓ వైపు ఆటలో అవకాశం రాకపోవడం, ఉండడానికి డబ్బు లేకపోవడంతో నిరాశలో కూరుకుపోయింది. ఆ సమయంలోనే ఓ ఎన్‌జీవోలో కోచ్‌గా పనిచేసే అవకాశం వచ్చింది. అక్కడి నుంచి కోచ్‌గా తన ప్రయాణం మొదలైంది. 2008 తర్వాత ఇక ఆమె ఆడడం మానేసి పూర్తిగా కోచింగ్‌ పైనే దృష్టి పెట్టింది. గతేడాది కోచింగ్‌లో ఏఎఫ్‌సీ ‘ఎ’ లైసెన్స్‌ పొంది ఆ ఘనత సాధించిన భారత పిన్న వయస్కురాలిగా నిలిచింది.

Tags :

మరిన్ని

జిల్లా వార్తలు

చదువు సుఖీభవ మకరందం ఈతరం ఆహా హాయ్ బుజ్జీ స్థిరాస్తి కథామృతం రుచులు దేవతార్చన

స్పోర్ట్స్‌ స్టార్‌

మరిన్ని

App