రఫా..ఓ ప్రేమఖైదీ

స్పోర్ట్స్‌ స్టార్‌

రఫా..ఓ ప్రేమఖైదీ

అతడి కథ ముగిసినట్లే అని చాలా సార్లు అనుకున్నాం. కానీ ఆట పట్ల ప్రేమ అతణ్ని ఓడనివ్వలేదు. ఎన్నిసార్లు కింద పడ్డా లేచాడు. నిలిచాడు. పోరాడి గెలిచాడు. ఇటీవలే యుఎస్‌ ఓపెన్‌ విజయంతో 19వ గ్రాండ్‌సామ్‌ను ఖాతాలో వేసుకుని వేరొకరికి అసాధ్యంలా కనిపించిన ఫెదరర్‌ 20 టైటిళ్ల ఘనతకు అత్యంత చేరువగా వచ్చిన రఫెల్‌ నాదల్‌ గురించే ఈ ఉపోద్ఘాతం!

మైదానంలో రఫా ఏంటో టెన్నిస్‌ అభిమానులందరికీ తెలుసు. ఆట పట్ల అతడి ప్రేమ గురించీ తెలుసు. మరి మైదానం అవతల అతనేంటి? అక్కడ కూడా రఫాది ఇదే ప్రేమ.. అమ్మాయిని ప్రేమించినా.. అమ్మానాన్నను ప్రేమించినా.. అభిమానుల్ని ప్రేమించినా.. నాదల్‌ నాదలే అనిపిస్తాడు.

ఎప్పుడో పాఠశాల స్థాయిలో రఫెల్‌ నాదల్‌కు సిస్కా పెరోలాతో పరిచయం అయింది. స్నేహం కుదిరింది. అప్పటికి అతను అందరి లాంటి మామూలు కుర్రాడే. కానీ టీనేజీలో టెన్నిస్‌ ప్రేమలో పడిన అతను.. ఆ ఆటలో చూస్తుండగానే ఇంతింతై అన్నట్లు ఎదిగిపోయాడు. 20 ఏళ్ల వయసుకే సూపర్‌ స్టార్‌ అయ్యాడు. ఇంకొన్నేళ్లకు దిగ్గజ హోదాను అందుకున్నాడు. మధ్యలో ఆ అమ్మాయితో స్నేహం ప్రేమగా మారింది. తన స్థాయి మారింది, హోదా పెరిగింది.. అలాగే సిస్కాతో ప్రేమ బంధం దృఢంగా తయారైంది. ఐదేళ్లు కాదు.. పదేళ్లు కాదు.. ఏకంగా 15 ఏళ్లుగా వీళ్లిదరూ ప్రేమ బంధంలో ఉండటం విశేషం. తనో మామూలు కుర్రాడిగా ఉన్నపుడు పరిచయం అయిన అమ్మాయితో.. ఒక సూపర్‌ స్టార్‌ అయ్యాక బంధాన్ని కొనసాగించడం, ఇన్నేళ్ల పాటు మరొకరి వైపు చూడకుండా తనతోనే సాగడం గొప్ప విషయమే. ఒక ప్రేమికుడిగా నాదల్‌ ఎంతటి నిబద్ధుడో చెప్పడానికి ఇది ఉదాహరణ.

అతనో కుటుంబ మనిషి

చాలామంది టెన్నిస్‌ స్టార్లలా నాదల్‌ ప్లేబాయ్‌, పార్టీ బాయ్‌ కాదు. అతనో కుటుంబ మనిషి. నాదల్‌కు తన అమ్మానాన్న, సోదరి అంటే అమితమైన ప్రేమ. చిన్నప్పట్నుంచి తన ఆనందాలన్నీ వాళ్లతోనే పంచుకున్నాడు. కానీ నాదల్‌ కెరీర్లో ఎదుగుతున్న దశలో అతడి తల్లిదండ్రుల మధ్య విభేదాలు మొదలయ్యాయి. కుటుంబాన్ని ఎంతో ఇష్టపడే నాదల్‌కు వీరి గొడవలు అస్సలు నచ్చేవి కావు. తనకు ఎదురు లేని ఫ్రెంచ్‌ ఓపెన్‌లో నాదల్‌ 2009లో ప్రిక్వార్టర్స్‌లో సొదర్లింగ్‌ అనే అనామకుడి చేతిలో ఓడిపోవడానికి కుటుంబ గొడవలే కారణం అని తర్వాత వెల్లడించాడు. ఆ సమయంలో రఫా తీవ్ర మానసిక ఒత్తిడికి గురయ్యాడట. నాదల్‌ ఎంత చెప్పినా వినిపించుకోకుండా కొన్నేళ్ల కిందటే తల్లిదండ్రులిద్దరూ విడిపోయారు. వారిని చూసి వివాహ బంధంపై ప్రతికూల అభిప్రాయాలు ఏర్పడటంతో ప్రేయసి సిస్కాను పెళ్లి చేసుకోవడానికి సిద్ధపడలేదట. తల్లిదండ్రులకు సంబంధించి చేదు అనుభవాల నేపథ్యంలో.. పెళ్లి చేసుకుంటే బంధం నిలబడదేమో అని భయపడ్డాడట. దీంతో పాటు పెళ్లి, పిల్లలు అంటే.. ఆట మీద ప్రభావం పడుతుందేమో అని ఆలోచించి రఫా ఈ బంధంలోకి వెళ్లలేదట. అయితే తన కెరీర్‌ 30 ఏళ్లకే ముగుస్తుందని నాదల్‌ అనుకుంటే.. ఇప్పుడు 33 ఏళ్ల వయసులోనూ పతాక స్థాయి ఆటతో అదరగొడుతున్నాడు. అతడి ఆలోచనలు మారాయాని, రిటైర్మెంట్‌ గురించి ఆలోచించకుండా సిస్కాను పెళ్లాడేందుకు సిద్ధమయ్యాడని.. అక్టోబరులో వీరి పెళ్లి జరగొచ్చని సన్నిహితులు అంటున్నారు. అయితే నాదల్‌ను పెళ్లాడలేదన్న మాటే కానీ.. అతడి వ్యక్తిగత జీవితంలో అన్నీ సిస్కానే. తల్లిదండ్రులు విడిపోవడంతో ఆటేతర వ్యవహారాల బాధ్యత సిస్కాకే అప్పగించాడు రఫా. నాదల్‌ పేరిట నడిచే ఫౌండేషన్‌కు ఆమే డైరెక్టర్‌. ఈ సంస్థ ఆధ్వర్యంలో టెన్నిస్‌ అకాడమీతో పాటు అనేక సేవా కార్యక్రమాలు నడుస్తున్నాయి. రఫా వాణిజ్య ఒప్పందాల్ని కూడా సిస్కానే పర్యవేక్షిస్తుంది. నాదల్‌తో పాటు దేశాలు తిరగడం, అతను ఆడే ప్రతి టోర్నీకి వెళ్లడం.. ఆమెకు అలవాటు లేదు. తానుంటే రఫా ఒత్తిడికి గురవుతాడని.. ఆట మీద మనసు లఘ్నం చేయడేమో అని చాలా వరకు మ్యాచ్‌లకు దూరంగా ఉంటుంది. ఎప్పుడో ఒకసారే కోర్టులో తళుక్కుమంటుంది. టోర్నీలు ముగించుకుని వస్తే మాత్రం ఇద్దరూ తమ సొంత నగరంలో ఏకాంతంగా గడిపేందుకు ఇష్టపడతారు.

నాదల్‌.. ఒక ఉల్క

* రఫెల్‌ నాదల్‌ పేరిట ఒక ఉల్క ఉండటం విశేషం. 2003లో కనుగొన్న ఈ ఉల్కకు శాస్త్రజ్ఞులు 128036 నంబర్‌ ఇచ్చారు. టెన్నిస్‌లో నాదల్‌ ఘనతల్ని గుర్తించి అంతర్జాతీయ ఆస్ట్రోనామికల్‌ యూనియన్‌ ఆ ఉల్కకు నాదల్‌ పేరు పెట్టింది. మరోవైపు ఏటీపీ టోర్నీ బార్సిలోనా ఓపెన్‌ నిర్వాహకులు అక్కడి సెంటర్‌ కోర్టుకు ‘పిస్తా రఫెల్‌ నాదల్‌’ అని నామకరణం చేశారు.

* తాను ఏ ట్రోఫీ గెలిచినా.. దాన్ని కొరుకుతూ ఫొటోలకు పోజులివ్వడం నాదల్‌కు అలవాటు. దీనికి ప్రత్యేక కారణాలేమీ లేవు. కెరీర్‌ ఆరంభంలో ఒక టోర్నీలో నెగ్గిన అనంతరం సరదాగా ట్రోఫీని కొరుకుతుండగా ఫొటోగ్రాఫర్లు క్లిక్‌మనిపించారు. ఆ ఫొటో ప్రాచుర్యం పొందింది. దీంతో తర్వాత అతను టైటిల్‌ గెలిచినపుడల్లా ట్రోఫీని కొరకమని ఫొటోగ్రాఫర్లు అడగడం, అతను అదే పని చేయడం.. ఇలా అదో ఆనవాయితీలా మారిపోయింది.

* టెన్నిస్‌ కాకుండా నాదల్‌ అమితంగా ఇష్టపడేది ఫుట్‌బాల్‌ను. రియల్‌ మాడ్రిడ్‌ అతడికిష్టమైన క్లబ్‌. ప్రేయసితో కలిసి తరచుగా ఫుట్‌బాల్‌ మైదానాలకు వెళ్లి మ్యాచ్‌లు చూస్తుంటాడు.

* ప్రపంచంలో ఎన్నో దేశాలు, అందమైన ప్రాంతాలు తిరిగినప్పటికీ.. నాదల్‌కు తన సొంత నగరం మలోర్కా అంటేనే అమితమైన ఇష్టం. ఎప్పుడు ఖాళీ దొరికినా అక్కడే తిష్ట వేస్తాడు. ప్రేయసితో కలిసి అక్కడి బీచ్‌లో విహరించడం రఫాకు మహా సరదా. టోర్నీ కోసం ఏ దేశానికి వెళ్లినా.. మ్యాచ్‌ ముగిసిన మరుసటి రోజే మలోర్కాకు పయనమవుతాడు. ఇటీవల యుఎస్‌ ఓపెన్‌ గెలిచాక కూడా తర్వాతి రోజే విమానం ఎక్కేశాడు.

* ప్రఖ్యాత పాప్‌ గాయని షకీరాతో కలిసి నాదల్‌ 2010లో ఒక పాటలో నృత్యం చేశాడు.

* నాదల్‌కు కుక్కలన్నా, చీకటి అన్నా చాలా భయం. ప్రతి టెన్నిస్‌ మ్యాచ్‌కు ముందు చన్నీటితో స్నానం చేయడం రఫాకు అలవాటు.

ఆటను అగౌరవపరిచారో..

టెన్నిస్‌ అంటే నాదల్‌కు ప్రేమే కాదు.. గౌరవం కూడా. మైదానంలో అతనెప్పుడూ హద్దులు దాటడు. ప్రత్యర్థులతో కలహించడు. ఇలా చేసేవాళ్లను ఉపేక్షించడు. ఫెదరర్‌ 20 గ్రాండ్‌స్లామ్‌లు గెలిచాడు. నాదల్‌ అతడి కంటే ఒక్క టైటిలే తక్కువున్నాడు. కానీ రోజర్‌ పేరెత్తితే చాలు.. అమితమైన గౌరవ భావం చూపిస్తాడు రఫా. అతనో పెద్ద దిగ్గజం అని, అతడి ముందు తాను మామూలు ఆటగాడినని అంటాడు. కెరీర్‌ ఆరంభం నుంచి అతను ఇదే మాట అంటున్నాడు. ఫెదరర్‌కు సమవుజ్జీగా పేరు తెచ్చుకుని, అతడి మీద మెరుగైన రికార్డు ఉన్నా కూడా.. తనను తాను తక్కువ చేసుకోవడం గురించి దిగ్గజ ఆటగాడు మెకన్రో ఒక సందర్భంలో అసహనం వ్యక్తం చేశాడు. నాదల్‌ కూడా ఫెదరర్‌ స్థాయి దిగ్గజమే అన్నాడు. కానీ రఫా అందుకు అంగీకరించడు. ఇక రఫా క్రమశిక్షణ చర్యలు ఎదుర్కొన్న సందర్భాలు దాదాపు కనిపించవు. మైదానంలో అదుపు తప్పి ప్రవర్తించే కిర్గియోస్‌, ఫాగ్నిని లాంటి ఆటగాళ్లంటే రఫాకు అస్సలు నచ్చదు. ఇలాంటి ఆటగాళ్లపై ఘాటుగా విమర్శలు చేస్తాడు. ఆట పట్ల అతడికున్న గౌరవభావానికి ఇది సూచిక.

అభిమానులకు ప్రేమతో..

తనకెంతో ఇచ్చిన టెన్నిస్‌కు, అభిమానులకు ఏదైనా చేయాలన్నది రఫా తపన. ఇందుకోసం అతను దేశాలు దాటి తెలుగు గడ్డకు వచ్చాడు. ఆంధ్రప్రదేశ్‌లో అడుగుపెట్టాడు. రఫెల్‌ నాదల్‌ పేరిట తెలుగు గడ్డపై ఓ పాఠశాల నడుస్తున్న విషయం చాలామందికి తెలియదు. అనంతపురం జిల్లాలో ‘నాదల్‌ ఎడ్యుకేషనల్‌, టెన్నిస్‌ స్కూల్‌’ పేరుతో ఓ పాఠశాలను దశాబ్దం కిందటే నెలకొల్పాడు. స్పెయిన్‌కు చెందిన ఫెర్రర్‌కుటుంబం ఆధ్వర్యంలో నడిచే రూరల్‌ డెవలప్మెంట్‌ ట్రస్ట్‌ (ఆర్డీటీ) సహకారంతో నాదల్‌ ఈ పాఠశాల ఏర్పాటు చేశాడు. 2010లో అతను ఈ పాఠశాలను సందర్శించాడు కూడా. అనాథ, పేద విద్యార్థుల కోసం నాదల్‌ ఫౌండేషన్‌ ఈ పాఠశాలను నడుపుతోంది. ఇక్కడ చిన్నారులకు విద్యా బుద్ధులతో పాటు టెన్నిస్‌ కూడా నేర్పుతారు. తన సొంత పట్టణం మలోర్కాలో నాదల్‌ ఇదే తరహాలో స్కూల్‌, అకాడమీ నడుపుతున్నాడు. మొత్తంగా 500 మంది దాకా విద్యార్థులకు ఉచితంగా చదువు చెప్పించడంతో పాటు టెన్నిస్‌ శిక్షణ ఇప్పిస్తున్నాడు. మలోర్కాలోని అకాడమీ విస్తీర్ణం 40 వేల చదరపు అడుగులు. ఇందులో 26 కోర్టులతో పాటు నాదల్‌ విశేషాలతో కూడిన మ్యూజియం, ఇంకా ఎన్నో విశేషాలు, సౌకర్యాలు ఉన్నాయి.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

స్పోర్ట్స్‌ స్టార్‌

మరిన్ని

రుచులు

App