స్పోర్ట్స్‌ స్టార్‌

తండ్రి బాట..తనయుడి ఆట

అతనికి తొమ్మిదేళ్ల వయసులోనే నాన్న చనిపోయాడు.. అమ్మ కండక్టర్‌గా పని చేస్తేనే కుటుంబం గడిచింది.. ఆర్థికంగా చాలా కష్టాలు.. అనారోగ్యం ఇన్ని ఇబ్బందుల్లోంచి ఒక ఛాంపియన్‌ పుట్టాడు.. అతడి పేరు అధర్వ అంకోలేకర్‌. ఈ 18 ఏళ్ల ముంబయి లెఫ్ట్‌ ఆర్మ్‌ స్పిన్నర్‌ ఇటీవల భారత్‌ అండర్‌-19 ఆసియా కప్‌ గెలవడంలో కీలకపాత్ర పోషించాడు.
బస్‌ కండక్టర్‌గా పని చేసే అథర్వ తండ్రి వినోద్‌ కూడా ఒకప్పుడు క్రికెటరే. ముంబయి కంగా లీగ్స్‌లో ఆడాడు. ప్రోత్సాహం లేకపోవడం, ఆర్థిక పరిస్థితుల వల్ల అతను దిగువ స్థాయిలోనే ఉండిపోయాడు. తన కొడుకునైనా మంచి క్రికెటర్‌గా తయారు చేయాలని కలలుగన్నాడు. కానీ అథర్వకు 9 ఏళ్ల వయసులోనే తండ్రి మలేరియాతో చనిపోయాడు. దీంతో ఆ కుటుంబం కొన్నేళ్లపాటు తీవ్ర మనో వేదనలో కూరుకుపోయింది. ఈ స్థితిలో అధర్వ తల్లి వైదేహి మొదట ట్యూషన్లు చెప్పి కుటుంబాన్ని పోషించింది. ఆ తర్వాత భర్త కండక్టర్‌ ఉద్యోగం ఆమెకు రావడంతో ఆ కుటుంబం కాస్త కుదుటపడింది. కుమారుడిని క్రికెటర్‌గా చేయాలన్న భర్త సంకల్పాన్ని నెరవేర్చడానికి వైదేహి శ్రమించింది. అతణ్ని స్థానికంగా ఉండే ఎంఐజీ క్రికెట్‌ క్లబ్‌లో చేర్చింది. ఒకసారి కోచింగ్‌కు రూ.14 వేలు అవసరం కావడంతో నగలు కూడా తాకట్టు పెట్టింది. అమ్మ కష్టాన్ని వృథా పోనీయకుండా అథర్వ కూడా పట్టుదలగా క్రికెట్లో శ్రమించేవాడు.
గిరగిరా తిప్పి..
చిన్నప్పటి నుంచి స్పిన్‌ బౌలింగ్‌ మీద ఎంతో ఇష్టాన్ని పెంచుకున్న అధర్వ లెఫ్ట్‌ ఆర్మ్‌ స్పిన్నర్‌గా ఎదిగాడు. కంగా లీగ్‌లో అద్భుత ప్రదర్శనలతో అందర్ని ఆకట్టుకున్నాడు. యువ క్రీడాకారుల సత్తాను గుర్తించడంలో ముందుండే భారత అండర్‌-19 జట్టు కోచ్‌ రాహుల్‌ ద్రవిడ్‌ దృష్టిలో పడడం అధర్వకు వరమైంది. అతణ్ని ప్రోత్సహించి ధైర్యం చెప్పిన ద్రవిడ్‌.. అండర్‌-19 జట్టులో చోటు కల్పించడంలో కీలకపాత్ర పోషించాడు. ముంబయి తరఫున ఒక్క ఫస్ట్‌ క్లాస్‌ మ్యాచ్‌ ఆడకపోయినా నేరుగా ఆసియా కప్‌ ఆడే భారత జట్టులో చోటు సంపాదించిన అధర్వ.. ఫైనల్లో అద్భుత ప్రదర్శన చేశాడు. ప్రత్యర్థి బంగ్లాదేశ్‌ ముందుంచింది కేవలం 107 పరుగుల లక్ష్యమే అయినా ఎంతో గొప్పగా బంతులేసిన ఈ కుర్రాడు.. 28 పరుగులకే 5 వికెట్లు తీసి జట్టు విజయంలో కీలకమయ్యాడు. ఈ టోర్నీలో అతను మొత్తం 12 వికెట్లు పడగొట్టాడు. మంచి ఫ్లయిట్‌.. బంతుల్లో వైవిధ్యం.. తెలివైన బౌలింగ్‌తో అథర్వ బ్యాట్స్‌మెన్‌ను బుట్టలో వేస్తున్నాడు. దేశవాళీ పోటీల్లోనూ సత్తా చాటి భారత జట్టు తలుపు తట్టాలనేది అతని కోరిక. అతని తమ్ముడు పార్థ్‌ కూడా లెఫ్ట్‌ ఆర్మ్‌ స్పిన్నరే కావడం విశేషం.

Tags :

మరిన్ని

జిల్లా వార్తలు

చదువు సుఖీభవ మకరందం ఈతరం ఆహా హాయ్ బుజ్జీ స్థిరాస్తి కథామృతం రుచులు దేవతార్చన

స్పోర్ట్స్‌ స్టార్‌

మరిన్ని

App