స్పోర్ట్స్‌ స్టార్‌

మంచి పంచ్‌ ఉన్నోళ్లు..

భూమినే నమ్ముకొని జీవనం కొనసాగిస్తున్న రైతుల బిడ్డలు వాళ్లు. కుటుంబంతో కలిసి పొలంలో పనులు చేసిన ఆ చేతులు ఇప్పుడు బాక్సింగ్‌ రింగ్‌లో పంచ్‌లు విసురుతున్నాయి. పంట పండాలనే ఆశతో భూమిని ముద్దాడిన ఆ పెదాలు ఇప్పుడు ప్రతిష్ఠాత్మక ప్రపంచ ఛాంపియన్‌షిప్స్‌లో పతకాలను ముద్దాడుతున్నాయి. దేశానికి అన్నం పెట్టే కర్షక కుటుంబాల నుంచి వచ్చిన ఆ ఛాంపియన్లు ఇప్పుడు దేశానికి అంతర్జాతీయ స్థాయి పోటీల్లో విజయాలు అందిస్తున్నారు. మట్టితో ముడిపడిన వాళ్ల జీవితాలు ప్రస్తుతం ఆ మట్టి రుణం తీర్చుకుంటున్నాయి. ప్రత్యర్థి మీద పంచ్‌లతో విరుచుకుపడుతూ ప్రపంచ బాక్సింగ్‌ ఛాంపియన్‌షిప్స్‌లో పతకాలు సాధించిన బాక్సర్లు అమిత్‌ పంగాల్‌, మనీశ్‌ కౌశిక్‌ల గురించే ఈ ఉపోద్ఘాతమంతా! వ్యవసాయ నేపథ్యం నుంచి వచ్చిన ఈ విజేతలు.. పతకాల సేద్యం చేస్తున్నారు.
అన్న నడిపించాడు..
హరియాణాలోని రోహ్‌తక్‌ జిల్లా మైనా గ్రామానికి చెందిన 23 ఏళ్ల అమిత్‌ బాక్సింగ్‌ రింగ్‌లో అడుగుపెట్టడానికి ప్రధాన కారణం అతని అన్న అజయ్‌. ఒకప్పటి బాక్సరైన అజయ్‌ ఆర్మీలో ఉద్యోగం సంపాదించిన తర్వాత వ్యక్తిగత కారణాల రీత్యా బాక్సింగ్‌ను వదిలేయాల్సి వచ్చింది. తాను ఆట నుంచి వైదొలిగినా తన తమ్ముణ్ని ఛాంపియన్‌గా చూడాలని అతను నిర్ణయించుకున్నాడు. అమిత్‌ను బాక్సింగ్‌ వైపు నడిపించాడు. ఆటను కెరీర్‌గా ఎంచుకునేలా ప్రేరణ కలిగించాడు. ఓనమాలు నేర్పించాడు. అలా పన్నెండేళ్ల వయసులో బాక్సింగ్‌ మొదలెట్టిన అమిత్‌ అనతికాలంలోనే ఆట మీద పట్టు సాధించాడు. 2009లో పాల్గొన్న తొలి సబ్‌ జూనియర్‌ జాతీయ ఛాంపియన్‌షిప్‌లోనే స్వర్ణంతో సత్తాచాటాడు. ఆ తర్వాత వివిధ స్థాయి పోటీల్లో విజేతగా నిలిచాడు. 2017 సీనియర్‌ జాతీయ ఛాంపియన్‌షిప్‌లో తొలి సారి బరిలో దిగి 49 కేజీల విభాగంలో ఛాంపియన్‌గా నిలిచి అందరి దృష్టిని ఆకర్షించాడు. భారత భవిష్యత్‌ బాక్సింగ్‌ ఆశాకిరణంగా ప్రశంసలు అందుకున్నాడు. అదే ఏడాది ఆసియా బాక్సింగ్‌ ఛాంపియన్‌షిప్స్‌లో కాంస్యంతో మెరిశాడు. ప్రపంచ బాక్సింగ్‌ ఛాంపియన్‌షిప్స్‌లో పాల్గొని క్వార్టర్స్‌ వరకూ చేరాడు. గతేడాది తన ప్రదర్శనను మరోస్థాయికి తీసుకెళ్లిన అతను ఆసియా క్రీడల్లో స్వర్ణం, కామన్వెల్త్‌లో రజతం గెలుచుకున్నాడు.
జ్వరం బాధిస్తున్నా..: ఒక్కసారి ఆట మీద ఇష్టం ఏర్పడితే విజయాల కోసం ప్రాణం పెట్టేస్తుంటారు అనేదానికి నిదర్శనం అమిత్‌. ఈ ఏడాది ఏప్రిల్‌లో ఆసియా బాక్సింగ్‌ ఛాంపియన్‌షిప్‌లో ఫైనల్‌ బౌట్‌కు ముందు అతను తీవ్ర జ్వరం బారిన పడ్డాడు. రాత్రి నిద్ర కూడా పోలేదు. అలాంటి పరిస్థితుల్లో కూడా రింగ్‌లో అడుగుపెట్టి ప్రత్యర్థికి తన పంచ్‌ రుచి చూపించి విజేతగా నిలిచాడు. ఆ విజయం తర్వాత దేశానికి పతకం సాధించి పెట్టడం కంటే తనకు ఏదీ ఎక్కువ కాదని అతను చెప్పడం విశేషం. టోక్యో ఒలింపిక్స్‌ కోసం ఈ ఏడాది ఆరంభంలో 49 కేజీల విభాగం నుంచి 52 కేజీలకు మారిన అమిత్‌ ఆ మెగా క్రీడల్లో స్వర్ణం దిశగా దూసుకెళ్తున్నాడు. ప్రపంచ ఛాంపియన్‌షిప్స్‌లో ఫైనల్‌ చేరిన తొలి భారత బాక్సర్‌గా చరిత్ర సృష్టించిన అతడు.. పసిడి పంచ్‌ విసరాలన్న పట్టుదలతో ఉన్నాడు. తాజా ప్రదర్శనతో వచ్చే ఏడాది ఫిబ్రవరిలో జరిగే ఒలింపిక్స్‌ క్వాలిఫయర్‌ టోర్నీకి అతడు అర్హత సాధించాడు. దాంట్లో మెరిసి ఒలింపిక్స్‌కు ఎంపికై.. ఆ మెగా క్రీడల్లో పతకం సాధించడమే తన లక్ష్యమని అమిత్‌ పేర్కొన్నాడు.

విజేందర్‌ విజయంతో..
2008 బీజింగ్‌ ఒలింపిక్స్‌ వరకు మనీశ్‌కు బాక్సింగ్‌ గురించి పెద్దగా అవగాహన లేదు. అతను దాన్ని కెరీర్‌గా ఎంచుకోవాలని ఏనాడూ అనుకోలేదు. పొద్దున్నే లేచి తండ్రితో కలిసి పొలంలోకి వెళ్లి పనులు చేసేవాడు. కానీ ఒక్కసారి ఆ ఒలింపిక్స్‌లో విజేందర్‌ సింగ్‌ కాంస్యం సాధించాక మనీశ్‌ బాక్సింగ్‌ వైపు అడుగులు వేశాడు. హరియాణాలోని భివాని జిల్లాకు చెందిన అతను.. అదే జిల్లా నుంచి వచ్చిన విజేందర్‌ను స్ఫూర్తిగా తీసుకొని బాక్సింగ్‌ రింగ్‌లో అడుగుపెట్టాడు. 13 ఏళ్లకు బాక్సింగ్‌ గ్లోవ్‌లు తొడుక్కొని ప్రత్యర్థులతో తలపడడం మొదలెట్టాడు. అనంతరం ఆటలో అత్యుత్తమ స్థాయికి చేరితే తమ జీవితాలు మెరుగుపడతాయనే ఆశతో సాధన ముమ్మరం చేశాడు.
ప్రశ్నలకు సమాధానంగా: మనీశ్‌ బాక్సింగ్‌ వైపు అడుగులు వేస్తుంటే అతనిపై నమ్మకం లేక తల్లిదండ్రులు వద్దని వారించారు. తన సామర్థ్యంపై వాళ్లకు నెలకొన్న ప్రశ్నలకు పతకాలతోనే జవాబివ్వాలని అతను గట్టిగా నిర్ణయించుకున్నాడు. శిక్షణ మొదలెట్టిన మూడేళ్లలోపే 2011 ప్రపంచ జూనియర్‌ ఛాంపియన్‌షిప్స్‌లో క్వార్టర్స్‌ వరకూ వెళ్లగలిగాడు. అదే ఏడాది టర్కీలో జరిగిన టోర్నీలో రజతం నెగ్గాడు. 2015లో సీనియర్‌ జాతీయ ఛాంపియన్‌షిప్‌లో రజతం నెగ్గి భారత శిబిరానికి ఎంపికయ్యాడు. అంతర్జాతీయ టోర్నీల్లో పతకాలతో మెరిశాడు. కానీ టోక్యో ఒలింపిక్స్‌ కోసం అగ్రశ్రేణి బాక్సర్‌ శివ థాపా 56 నుంచి 60 కేజీల విభాగానికి మారడం ఆ విభాగంలో అప్పటికే పోటీపడుతోన్న మనీశ్‌కు అడ్డంకిగా మారింది. 2016 జాతీయ ఛాంపియన్‌షిప్‌, 2017 ఆసియా ఛాంపియన్‌షిప్‌లో శివ చేతిలో మనీశ్‌ ఓడిపోయాడు. దాంతో అతని కెరీర్‌ ప్రశ్నార్థకంగా మారిందని చాలా మంది భావించారు. కానీ పొగొట్టుకున్న చోటే వెతుక్కోవాలని భావించిన మనీశ్‌.. 2017 జాతీయ ఛాంపియన్‌షిప్‌లో శివపై విజయం సాధించి ఛాంపియన్‌గా నిలిచాడు. గతేడాది కామన్వెల్త్‌లో రజతం సాధించాడు. జాతీయ సెలక్షన్స్‌లోనూ శివపై మరోసారి నెగ్గి ప్రపంచ ఛాంపియన్‌షిప్స్‌కు అర్హత సాధించాడు. తాజాగా ప్రపంచ ఛాంపియన్‌షిప్స్‌లో కాంస్యం నెగ్గిన అతడు ఒలింపిక్స్‌ దిశగా సాగుతున్నాడు.

Tags :

మరిన్ని

జిల్లా వార్తలు

చదువు సుఖీభవ మకరందం ఈతరం ఆహా హాయ్ బుజ్జీ స్థిరాస్తి కథామృతం రుచులు దేవతార్చన

స్పోర్ట్స్‌ స్టార్‌

మరిన్ని

App