గేమ్‌ ఆడితే 20 కోట్లొచ్చాయ్‌

స్పోర్ట్స్‌ స్టార్‌

గేమ్‌ ఆడితే 20 కోట్లొచ్చాయ్‌

వీడియో గేమ్‌ ఆడితే ఏమొస్తుంది?
టైంపాస్‌ అవుతుంది.. థ్రిల్‌ కలుగుతుంది..!
కానీ ఇలాంటి గేమ్‌ల వల్ల కోట్ల రూపాయల డబ్బులొచ్చి ఖాతాలో పడితే..? సెలబ్రెటీ హోదా లభిస్తే..? లక్షల మంది అభిమానుల్ని తెచ్చి పెడితే..? కెరీర్‌ ఏర్పడితే..?
చాల్లెండి కబుర్లు అంటారా..?
అయితే అమెరికా కుర్రాడు కైల్‌ గీర్స్‌డార్ఫ్‌ అలియాస్‌ బుగాను ఒకసారి కలవాల్సిందే.

కైల్‌ గీర్స్‌డార్ఫ్‌ వయసు కేవలం 16 ఏళ్లు. ఈ అమెరికా కుర్రాడు.. ఇంకా పాఠశాల స్థాయి విద్యార్థే. ఈ వయసుకే అతను 3 మిలియన్‌ డాలర్ల (రూపాయల్లో 20.5 కోట్లు) ప్రైజ్‌మనీ అందుకున్నాడు. ‘ఫోర్ట్‌నైట్‌’ అనే ఆటలో అతను కొన్ని రోజుల కిందటే ప్రపంచ ఛాంపియన్‌ అయ్యాడు. అందుకు గానూ అందుకున్న బహుమతి అది. ఏకంగా 30 మిలియన్‌ డాలర్ల (దాదాపు రూ.205 కోట్లు) ప్రైజ్‌మనీతో నిర్వహించిన టోర్నమెంట్‌ అది. న్యూయార్క్‌లోని ఆర్థర్‌ ఆషె ఏరెనా స్టేడియంలో 23 వేల మంది వీక్షకుల సమక్షంలో.. ప్రపంచవ్యాప్తంగా టీవీలు, ఇంటర్నెట్‌ ద్వారా కోట్లాదిమంది ప్రత్యక్ష ప్రసారంలో చూస్తూ ఊగిపోతుండగా ఈ టోర్నీ ఉత్కంఠభరితంగా సాగిపోయింది. అయితే టోర్నమెంట్‌ అని, స్టేడియం అని అంటున్నాం కాబట్టి.. ఇది మైదానంలోకి దిగి అమీతుమీ తేల్చుకునే ఆట అనుకుంటే పొరపాటే. స్టేడియంలో కంప్యూటర్‌ తెరల ముందు కూర్చుని.. చెవులకు హెడ్‌ఫోన్స్‌, చేతుల్లో ఒక ఎలక్ట్రానిక్‌ ఉపకరణం పట్టుకుని ఆడే మైండ్‌ గేమ్‌ ఈ ‘ఫోర్ట్‌నైట్‌’. ప్రపంచవ్యాప్తంగా లక్షల మంది రేసులో నిలిస్తే.. చివరికి 30 దేశాల నుంచి వందమందికి ప్రపంచకప్‌లో పోటీ పడే అవకాశం లభించింది. ఆరు గేమ్‌ల ప్రపంచకప్‌ ఫైనల్స్‌లో సింగిల్స్‌, డబుల్స్‌ ఈవెంట్లు జరిగాయి. సింగిల్స్‌లో గీర్స్‌డార్ఫ్‌ విజేతగా నిలిచాడు. ఫైనల్లో సమీప ప్రత్యర్థి 33 పాయింట్ల దగ్గర ఆగిపోతే.. ఈ కుర్రాడు 59 పాయింట్లతో తిరుగులేని ఆధిక్యం సాధించి టైటిల్‌ ఎగరేసుకుపోయాడు.
ప్రైజ్‌మనీ మాత్రమే కాదు
కైల్‌ గీర్స్‌డార్ఫ్‌ ‘ఫోర్ట్‌నైట్‌’ ప్రపంచ ఛాంపియన్‌ కావడం వల్ల ప్రైజ్‌మనీ మాత్రమే లాభం కాదు. అతను ఈ-స్పోర్ట్స్‌ ప్రపంచంలో ఇప్పుడో సూపర్‌స్టార్‌. గేమర్‌గా ‘బుగా’ అనే పేరుతో బరిలోకి దిగే అతడికి.. బయట కూడా సెలబ్రెటీ హోదా వచ్చేసింది. టైటిల్‌ గెలవక ముందు వేలల్లో ఉన్న అతడి ట్విటర్‌ ఫాలోవర్ల సంఖ్య లక్షలకు చేరుకుంది. యూట్యూబ్‌లోనూ సబ్‌స్క్రైబర్ల సంఖ్య లక్షల్లోకి వెళ్లిపోయింది. ఈ ఫాలోయింగ్‌ ద్వారా అతను భారీగా ఆదాయం ఆర్జించబోతున్నాడు. అతడి కోసం స్పాన్సర్లు క్యూ కడుతున్నారు. వాణిజ్య ఒప్పందాల రూపంలో కోట్లు అందుకోబోతున్నాడు. ప్రొఫెషనల్‌ గేమర్‌గా నిలకడగా రాణిస్తే మున్ముందు అతడి స్థాయే వేరుగా ఉంటుంది. పదహారేళ్లకే కైల్‌ ఈ స్థాయికి చేరడం గేమింగ్‌ వల్లే సాధ్యమైంది.
ఏంటీ గేమ్‌?
‘ఫోర్ట్‌నైట్‌’ గేమ్‌లో ప్రపంచకప్‌ జరగడం ఇదే తొలిసారి. ఈ గేమ్‌లో భాగంగా ఆటగాడు ఒక ద్వీపంలో వెళ్లి పడతాడు. అక్కడ తాను బతకడం కోసం వనరులు వెతుక్కోవాల్సి ఉంటుంది. శత్రువులపై దాడికి ఆయుధాలు సమకూర్చుకోవాల్సి ఉంటుంది. తనను తాను కాపాడుకుంటూ ప్రత్యర్థుల అడ్డు తొలగిస్తూ వెళ్లాలి. మానసిక దృఢత్వానికి, చురుకుదనానికి అడుగడుగునా పరీక్ష పెడుతూ సాగుతుందీ గేమ్‌.
ఈ-స్పోర్ట్స్‌.. సరదా కాదు!
ఈ-స్పోర్ట్స్‌.. ఇప్పుడు ప్రపంచవ్యాప్తంగా యువతరాన్ని ఊపేస్తున్న వ్యాపకం! కంప్యూటర్‌ ప్రపంచంతో పాటు వేగంగా విస్తరిస్తున్న క్రీడల్లో ఈ-స్పోర్ట్స్‌ కూడా ఉన్నాయి. ముఖ్యంగా ఆండ్రాయిడ్‌ విప్లవం తర్వాత ఈ-స్పోర్ట్స్‌ అందరికీ పరిచయం అయ్యాయి. ఆండ్రాయిడ్‌లో ప్లేస్టోర్‌ ఓపెన్‌ చేస్తే అనేక క్రీడలు దర్శనమిస్తాయి. వీటిలో కొన్ని సరదాకు ఆడుకునేవైతే.. ఇంకొన్ని బుర్రకు పదును పెడతాయి. సరదాకు ఆడుకునే వీడియో గేమ్‌లనే సవాలు విసిరేలా, సాహసోపేతంగా ఉండేలా తీర్చిదిద్ది.. ప్రొఫెషనల్‌ పోటీలు నిర్వహిస్తూ వేల కోట్ల టర్నోవర్‌గా మారుస్తున్నారు వీటి నిర్వాహకులు. కంప్యూటర్‌ ముందు కూర్చుని చేతిలో మొబైల్‌ లేదా వేరే ఏదైనా ఎలక్ట్రానిక్‌ ఉపకరణం పట్టుకుని బుర్రతోనే ప్రత్యర్థుల్ని ఢీకొట్టడమే ఈ-స్పోర్ట్స్‌ ప్రత్యేకత. ‘ఫోర్ట్‌నైట్‌’ కంటే ముందు డోటా-2, లీగ్‌ ఆఫ్‌ ద లెజెండ్స్‌ లాంటి ఈ-స్పోర్ట్స్‌ గొప్ప ఆదరణ సంపాదించాయి. వీటిని ఆడితే సమయం వృథా అనుకునే రోజుల నుంచి.. కోట్ల రూపాయలు ఆర్జించే పరిస్థితులు వచ్చేశాయి. ఈ-స్పోర్ట్స్‌లో పెద్ద పెద్ద స్టేడియాల్లో భారీ ఎత్తున ప్రొఫెషనల్‌ పోటీలు నిర్వహిస్తున్నారిప్పుడు. వీటిలో ప్రపంచకప్‌లు కూడా వచ్చేశాయి. గత ఏడాది ఆసియా క్రీడల్లో ఈ-స్పోర్ట్స్‌ను భాగం చేశారు. ఒలింపిక్స్‌లోనూ ఈ-స్పోర్ట్స్‌ను చూసే రోజులు ఎంతో దూరంలో లేవు!

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

స్పోర్ట్స్‌ స్టార్‌

మరిన్ని

రుచులు

App