బస్తీ పిల్లా..సెయిలింగ్‌లో భళా!

స్పోర్ట్స్‌ స్టార్‌

బస్తీ పిల్లా..సెయిలింగ్‌లో భళా!

ఆమెకు నీళ్లంటే భయం మాత్రమే కాదు.. అసహ్యం కూడా! ఎందుకంటే అవే తన తండ్రిని పొట్టన పెట్టుకున్నాయి! అందుకే ఆమె నీళ్లున్న వైపే వెళ్లేది కాదు!కానీ ఇప్పుడు ఆ నీళ్లే ఆమె ప్రపంచం! అవే ఆమె కెరీర్‌! అవే ఆమె గుర్తింపు!
తండ్రి ప్రాణాలు తీసిన నీళ్లను చూసి ఒకప్పుడు భయపడ్డ అమ్మాయే.. ఇప్పుడు ఆ నీటిలో ఒడుపుగా పడవను నడుపుతూ ఛాంపియన్‌ అయింది. చిన్న వయసులోనే జాతీయ స్థాయిలో మేటి సెయిలర్‌గా పేరు తెచ్చుకుంది.
తనతో నిర్దాక్షిణ్యంగా ఆటలాడుకున్న విధిని ఎదిరించి.. విజేతగా నిలిచిన పదహారేళ్ల ప్రీతి కథేంటో తెలుసుకుందాం పదండి.

చిన్నతనంలోనే తండ్రి ప్రేమకు దూరమైంది.. ఇల్లు గడవాలి అంటే తల్లి పనిచేయాల్సిందే.. కూలీకి వెళ్తేనే పూట గడిచే పరిస్థితి.. అలాంటి నేపథ్యంలో ఖరీదైన క్రీడ సెయిలింగ్‌లో ఆ కుమార్తె అడుగుపెట్టగలదా? చదివేది ప్రభుత్వ పాఠశాలలో.. ఉండేది బస్తీలో.. అలాంటిది జాతీయ ఛాంపియన్‌షిప్‌లో టైటిళ్లతో మెరుస్తుందని ఊహించగలమా? కానీ ఆ అమ్మాయి సాధించింది. సెయిలింగ్‌లో మెరుపులా దూసుకొచ్చిన పద్నాలుగేళ్ల ప్రీతి కొంగర గురించే ఈ ఉపోద్ఘాతమంతా! ఇటీవల హైదరాబాద్‌లోని హుస్సేన్‌సాగర్‌లో జరిగిన మాన్సూన్‌ రెగెట్టా జాతీయ స్థాయి ర్యాంకింగ్‌ సెయిలింగ్‌ ఛాంపియన్‌షిప్‌లో ఆమె మూడు ట్రోఫీలు సొంతం చేసుకొని ఔరా! అనిపించింది. బస్తీ నుంచి వచ్చి నీటిపై అద్భుతాలు సృష్టిస్తోంది.
ప్రీతి.. ప్రస్తుతం సెయిలింగ్‌లో మార్మోగుతోన్న పేరిది. రెండు వారాల క్రితం తెలంగాణ రెగెట్టా ఛాంపియన్‌షిప్‌లో ఓవరాల్‌ ఛాంపియన్‌గా నిలిస్తే.. రాష్ట్ర స్థాయి పోటీలే కదా! బరిలో దిగిన సెయిలర్లు మనవాళ్లే కదా! పోటీ ఏ మాత్రం ఉంటుందిలే అని అనుకున్న వాళ్లు లేకపోలేదు. వాళ్ల అనుమానాలను పటాపంచలు చేస్తూ.. తన సత్తాను చాటుతూ.. తాజాగా జాతీయ స్థాయి మాన్సూన్‌ రెగెట్టాలోనూ ఓవరాల్‌ ఛాంపియన్‌గా నిలిచి అబ్బురపరచింది. ముంబయి, బెంగళూరు లాంటి రాష్ట్రాల ఉత్తమ సెయిలర్లను వెనక్కి నెట్టి విజేతగా నిలిచింది. జాతీయ స్థాయి ఛాంపియన్‌షిప్‌లో హైదరాబాద్‌ యాచ్‌ క్లబ్‌ నుంచి ఓవరాల్‌ ఛాంపియన్‌ ట్రోఫీ సొంతం చేసుకొన్న తొలి సెయిలర్‌గా రికార్డు నమోదు చేసింది. అంతర్జాతీయ స్థాయి సెయిలింగ్‌లో రాణించి.. దేశం తరపున అత్యుత్తమ సెయిలర్‌గా ఎదగాలనే లక్ష్యం దిశగా ప్రయాణం సాగిస్తానని చెబుతోన్న ప్రీతి.. పట్టుదలతో సాధన చేస్తోంది.

అమ్మే అన్నీ

చూడడానికి చిన్నపిల్లలా కనిపించే ప్రీతి పడవ ఎక్కిందంటే దూసుకుపోవడమే. ఆ అమ్మాయి నీటిపై దూసుకెళ్లే తీరు చూస్తే మనకు భయం కలగక మానదు. అరే.. చిన్న పిల్లే.. ఏమవుతుందో ఏమో అనుకుంటాం. ప్రీతి మాత్రం గాలికి అనుగుణంగా పడవను ఒడుపుగా నడుపుతూ.. దాని దిశను మార్చి లక్ష్యానికి వేగంగా చేరడంలో తనకు తానే సాటి అనిపిస్తుంది. ఆమె ఈ స్థాయికి చేరుకోవడం వెనక తల్లి విజయలక్ష్మి కష్టం ఉంది. ప్రీతి వాళ్ల నాన్న చిన్నప్పుడే దూరమవడంతో అమ్మే బతుకు బండిని లాగుతోంది. కుటుంబ పెద్ద దూరమవడం, ఇద్దరు కూతుళ్లు చిన్నవాళ్లు కావడం... ఓ వైపు పేదరికం.. మరోవైపు పలకరించేందుకు నా అన్నవాళ్లు కూడా లేకపోవడం.. ఇలాంటి కఠిన పరిస్థితుల్లో ఆ తల్లి ధైర్యంగా నిలబడింది. కుటుంబ భారాన్ని భుజాన వేసుకుంది. రోజూవారీ కూలీగా పనిచేసింది. ఇళ్లల్లోనూ పని చేసింది. ప్రస్తుతం సికింద్రాబాద్‌లోని ఓ బట్టల దుకాణంలో ఆమె పనిచేస్తోంది. అమ్మ కష్టాన్ని చూసిన ప్రీతి లోలోన ఎంతో కుమిలిపోయింది. ఈ కష్టాల నుంచి బయటపడాలంటే.. పేదరికాన్ని తరిమి కొట్టాలంటే ఆమెకు సెయిలింగ్‌ ఓ మార్గంలా కనిపించింది. మొదట్లో ఇబ్బందులు ఎదురైనా.. పడవ ఎక్కేందుకే భయం కలిగినా ఆమె వెనకడుగు వేయలేదు. సెయిలింగ్‌లో రాణించి అమ్మను సంతోషపెట్టాలనే ఆలోచనే కళ్ల ముందు కదిలింది. దాంతో ఆటపై శ్రద్ధ పెట్టింది. శిక్షణలో రాటుదేలింది. జాతీయ స్థాయిలో ఛాంపియన్‌గా ఎదిగింది.

నీటిని జయించాలని

ప్రీతి వాళ్ల నాన్న ప్రమాదవశాత్తూ నీటిలో మునిగి చనిపోయాడు. అయిదేళ్ల క్రితం తను వాచ్‌మన్‌గా పనిచేస్తున్న అతను.. ఓ నీటి కుంటలో పడి మృతిచెందాడు. అప్పటి నుంచి ఆమెకు నీళ్లంటే చాలా భయం. నీళ్లున్న చోటుకు వెళ్లొద్దని గట్టిగా నిర్ణయించుకుంది. ఇప్పుడామె ఆ నీటిపైనే దూసుకెళ్తూ సంచలనాలు నమోదు చేస్తుండడం విశేషం. అద్భుత ప్రదర్శనతో అదరగొడుతొన్న ఆమె ప్రస్థానం.. 2016లో మొదలైంది. ప్రస్తుతం నల్లకుంట ప్రభుత్వ ఉన్నత పాఠశాలలో పదో తరగతి చదువుతున్న ప్రీతి మూడేన్నరేళ్ల క్రితం తొలిసారి పడవ ఎక్కింది. యాచ్‌ క్లబ్‌ నిర్వాహకులు ఆ పాఠశాలకు వెళ్లి సెయిలింగ్‌ గురించి పిల్లలకు అవగాహన కల్పించారు. ఆసక్తి ఉన్న వాళ్ల పేర్లు నమోదు చేసుకొని శిక్షణ ఇప్పిస్తామని చెప్పారు. మొదట్లో ప్రీతి దాని గురించి పెద్దగా ఆలోచించలేదు. కానీ పాఠశాలలో క్రీడల్లో చురుగ్గా ఉండే ఆమెపై ప్రత్యేక దృష్టి పెట్టి యాచ్‌ క్లబ్‌ వాళ్లు ప్రీతిని సెయిలింగ్‌ వైపు మళ్లేలా చేశారు. తండ్రి మరణానికి కారణమైన నీటిని జయించాలనే కాంక్షను రగిల్చారు. దాంతో ఆమె ఈ క్రీడపై ఆసక్తి ప్రదర్శించింది. నీటిపై ఆటలంటే వాళ్లమ్మ మొదట్లో అసలు ఒప్పుకోలేదు. తన కూతురుకు ఏమన్నా అవుతుందేమోనని భయపడింది. యాచ్‌ క్లబ్‌ నిర్వాహకులు జాగ్రత్తలు చెప్పడంతో చివరికి ఆమె ఒప్పుకుంది. నాంది ఫౌండేషన్‌ సహకారంతో శిక్షణ ఆరంభించిన ఆమె మొదట్లో పడవలో నీటిపై వెళ్లాలంటే వణికిపోయేది. ముందుకెళ్లేందుకు సాహసం చేసేది కాదు. కోచ్‌ సుహీం షేక్‌ స్ఫూర్తి నింపడంతో తడబడుతూనే మొదలెట్టిన ఆమె.. అనతి కాలంలోనే అలలతో ఆటాడుకొనే స్థాయికి చేరింది.

అదే లోకం

సెయిలింగ్‌.. సెయిలింగ్‌.. సెయిలింగ్‌.. ప్రీతి లేచినప్పటి నుంచి పడుకొనే వరకు ఆమె లోకం సెయిలింగే. ఉదయం ఐదు గంటలకు లేచి ఫిట్‌నెస్‌ పెంచుకోవడం కోసం జిమ్‌కు వెళ్లి కసరత్తులు చేస్తోంది. ఆ తర్వాత హుస్సేన్‌ సాగర్‌ వెళ్లడం.. పడవేసుకొని నీటిలో దూసుకెళ్లడం.. ఇదే ఆమె దినచర్య. సెయిలింగ్‌ కారణంగా రోజూ పాఠశాలకు వెళ్లలేకపోయినా ఆమె చదువులోనూ ముందే ఉంటోంది. ప్రత్యేక తరగతులు పెట్టించుకొని చదువు దెబ్బతినకుండా జాగ్రత్త పడుతోంది. ‘‘సెయిలింగ్‌ అంటే ఏమిటో తెలియని స్థాయి నుంచి ఆ క్రీడలో జాతీయ ఛాంపియన్‌గా నిలిచే స్థాయికి చేరుకుంటా అని ఊహించలేదు. మా నాన్నను పొట్టన పెట్టుకొన్న నీళ్లంటే మొదట్లో భయం ఉండేది. ఇప్పుడు అదే నీటిపై దూసుకెళ్తూ జయకేతనం ఎగురవేస్తుంటే ఆనందమేస్తోంది. నీటిపై ఆధిపత్యం చలాయిస్తున్నానే ఆత్మవిశ్వాసం కలుగుతోంది. భవిష్యత్‌లో అంతర్జాతీయ స్థాయిలో రాణించి.. అత్యుత్తమ సెయిలర్‌గా నిలవాలన్నదే లక్ష్యం. ఎప్పటికైనా ఆ లక్ష్యాన్ని చేరుకుంటాననే నమ్మకం ఉంది. మా కోసం ఎంతో కష్టపడుతున్న అమ్మను సంతోషంగా చూసుకోవాలి. ఆమె కోసం ఓ ఇల్లు కొనివ్వాలి’’ అని ప్రీతి చెబుతోంది.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

స్పోర్ట్స్‌ స్టార్‌

మరిన్ని

రుచులు

App