45 ఏళ్ల గురి..

స్పోర్ట్స్‌ స్టార్‌

45 ఏళ్ల గురి..

దిల్లీలో సర్దార్‌ సజ్జన్‌ సింగ్‌ సేథి స్మారక మాస్టర్స్‌ షూటింగ్‌ ఛాంపియన్‌షిప్‌ జరుగుతోంది.. దేశంలోని అగ్రశ్రేణి షూటర్లందరూ బరిలో నిలిచారు. సీనియర్‌ మహిళల 10మీ. ఎయిర్‌ పిస్టోల్‌ విభాగంలో పోటీలు మొదలయ్యాయి. 14 ఏళ్ల తెలంగాణ షూటర్‌ ఇషా సింగ్‌ తన అద్భుత ఫామ్‌ను కొనసాగిస్తూ దూసుకెళ్తోంది. అందరి కళ్లు మాత్రం యువ షూటర్లతో పోటీపడుతూ మెరుగైన ఫలితాలు సాధిస్తున్న ఓ 45 ఏళ్ల పెద్దావిడ మీదే ఉన్నాయి. ఆ వయసులోనూ తుపాకీ చేతబట్టి యువ షూటర్లకు పోటీగా నిలస్తున్న ఆమె పేరు పద్మా దేవరమ్‌. చెన్నైకు చెందిన ఆమె మొదట హ్యామర్‌ త్రో క్రీడాకారిణి. ఆ క్రీడ నుంచి షూటింగ్‌కు ఎందుకు మారింది? ఈ వయసులోనూ తుపాకీ మీద ఎందుకు అంత ప్రేమ చూపుతుంది? తదితర ఆసక్తికర విషయాలు తెలుసుకోవాలంటే చదివేయండి..!

జాతీయ స్థాయిలో రెండు స్వర్ణాలతో సహా మొత్తం పన్నెండు పతకాలు.. దిగ్గజ స్ప్రింటర్‌ పీటీ ఉషతో కలిసి గది పంచుకొన్న ఘనత.. ఇవీ హ్యామర్‌ త్రో క్రీడాకారిణిగా పద్మ సాగించిన ప్రయాణంలోని మధురమైన జ్ఞాపకాలు. యుక్త వయసులోనే హ్యామర్‌ త్రో అథ్లెట్‌గా ప్రస్థానం మొదలెట్టిన ఆమె జాతీయ స్థాయిలో అత్యుత్తమ ప్రదర్శనతో మెరిసింది. కెరీర్‌ కోసం పెళ్లిని సైతం పక్కకు పెట్టింది. మరోవైపు గత రెండేళ్ల క్రితమే తుపాకీ చేతబట్టి గొప్ప ఫలితాలు రాబడుతోంది. ప్రస్తుతం 10మీ. ఎయిర్‌ పిస్టోల్‌ సీనియర్‌ మహిళల జాతీయ ర్యాంకుల్లో ఆమె ఐదో స్థానంలో ఉంది. ఆమె వయసులో దృష్టి సరిగ్గా ఉండడమే కష్టం.. అలాంటిది తీక్షణమైన కంటి చూపుతోనే ముడిపడిన షూటింగ్‌లో ఆమె మెరుగ్గా రాణిస్తోంది. తనలో సగం వయసు కూడా లేని క్రీడాకారిణులతో పోటీపడుతూ ఉత్తమ ప్రదర్శన చేసిన ఆమె దిల్లీలో జరిగిన ఛాంపియన్‌షిప్‌లో నాలుగో స్థానంలో నిలిచి తృటిలో పతకం చేజార్చుకుంది.

గాయం మేలు చేసింది: మోకాలి గాయం పద్మ హ్యామర్‌ త్రో కెరీర్‌కు బ్రేకులు వేసింది. ఆ గాయం ఆమె ఆ క్రీడకే గుడ్‌బై చెప్పాల్సి వచ్చింది. ఆ పరిస్థితుల్లో ఇక ఆటలు చాలు అనుకొని వ్యక్తిగత జీవితంపై దృష్టి సారించాలని చాలా మంది భావిస్తూ ఉంటారు. పద్మ అలాగే ఆలోచించి ఉంటే ఆమె గురించి ప్రత్యేకంగా చెప్పుకోవాల్సిన అవసరం మనకు లేకుండా పోయేది. హ్యామర్‌ త్రోకు వీడ్కోలు పలికిన ఆమె తుపాకీ చేతబట్టింది. ముందు రైఫిల్‌తో సాధన చేసి ఆ తర్వాత పిస్టోల్‌కు మారింది. తన విలక్షణమైన శైలితో రెండేళ్లలోనే గొప్ప ఫలితాలు సాధించే స్థాయికి ఎదిగింది. ఆమె విభాగంలో దేశంలోని తొలి ఐదుగురు అత్యుత్తమ షూటర్ల జాబితాలో చోటు దక్కించుకుంది. దాంతో రియోలో జరిగిన షూటింగ్‌ ప్రపంచకప్‌లో పాల్గొనే అవకాశం ఆమెకు వచ్చింది. ఆర్థిక స్థోమత కారణంగా ఆమె వెళ్లలేకపోయింది. కేవలం భారత ప్రధాన జట్టుకు ఎంపికైన షూటర్లకు మాత్రమే ప్రభుత్వం ఖర్చులు బరిస్తోంది. ఈ నేపథ్యంలో తన ప్రదర్శనను మరింత మెరుగుపర్చుకొని ప్రధాన జట్టుకు ఎంపికవడమే లక్ష్యంగా పెట్టుకుంది.

రుణం తీసుకొని: భారతీయ రైల్వేలో చీఫ్‌ టికెట్‌ ఇన్‌స్పెక్టర్‌గా బాధ్యతలు నిర్వర్తిస్తున్న పద్మ తన సొంత పిస్టోల్‌ కొనుక్కోవడం కోసం రూ.1.6లక్షలు రుణం తీసుకొంది. సహజ సిద్ధమైన శైలి దెబ్బతింటుందనే కారణంతో ఆమె ఎలాంటి కోచ్‌ల సాయం లేకుండా సొంతంగా సాధన చేస్తుంది. ‘‘తమ దగ్గర శిక్షణ పొందితే నా సహజ సిద్ధమైన శైలిలో మార్పు వస్తుందని, సొంతంగా సాధన చేసుకోవడం మేలని కోచ్‌లు చెప్పారు. అప్పటి నుంచి నా ప్రశ్నలకు నేనే సమాధానాలు వెతుక్కుంటున్నా. ప్రస్తుతం జాతీయ ర్యాంకింగ్స్‌లో ఐదో స్థానంలో ఉన్నా. రియో ప్రపంచకప్‌ వెళ్లే అవకాశం వచ్చినా కూడా ఆర్థిక ఇబ్బందుల కారణంగా వెళ్లలేకపోయా. ప్రధాన జట్టుకు ఎంపికవడమే నా లక్ష్యం. షూటింగ్‌ క్లబ్‌లో చేరినప్పటి నుంచి సవాళ్లు ఎదురవుతూనే ఉన్నాయి. అన్నింటినీ దాటుకుంటూ ముందుకు సాగుతున్నా. పొరపాట్ల నుంచి పాఠాలు నేర్చుకొని మెరుగైన ప్రదర్శన కనబరచడానికి ప్రయత్నిస్తూనే ఉంటా’’ అని పద్మ అంటోంది.

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి