అరక పట్టి.. దుక్కి దున్ని..

అవీ ఇవీ...

అరక పట్టి.. దుక్కి దున్ని..

ట్రాక్‌లో మాణిక్యాలు

ఆ అమ్మాయి ఒక వ్యవసాయ కూలీ. అరక పట్టడం.. దుక్కి దున్నడం.. నాట్లు వేయడం, కలుపు తీయడం.. ఆమెకు తెలిసిన పని! నాన్న వాచ్‌మన్‌.. ఇళ్లలో అంట్లు తోమడం, బట్టలు ఉతకడం అమ్మ పని. అలాంటి నేపథ్యం మరో అమ్మాయిది!
ఆ అమ్మాయి తండ్రి కూలీ. అమ్మదీ కూలి పనే. అలా సంపాదించే డబ్బుతోనే ఇల్లు గడవాలి! ముగ్గురివీ నిరుపేద కుటుంబాలే. రెక్కాడితే గానీ డొక్కాడని నేపథ్యాలే. అయినా పట్టుదల ఉంటే సాధించలేనిది ఏదీ లేదంటూ నిరూపించారీ అమ్మాయిలు. అండగా నిలిస్తే ఆకాశమే హద్దుగా దూసుకెళ్తామని రుజువు చేశారీ ధీర వనితలు. సౌత్‌జోన్‌ అథ్లెటిక్స్‌ ఛాంపియన్‌షిప్‌లో రికార్డుల పంట పండించి జాతీయ అథ్లెటిక్స్‌లో సంచలనాలుగా మారారు మహేశ్వరి, నందిని, దీప్తి. హైదరాబాద్‌లోని సాయ్‌ గోపీచంద్‌ మైత్రా ఫౌండేషన్‌లో ద్రోణాచార్య నాగపురి రమేశ్‌ దగ్గర శిక్షణ తీసుకుంటున్న వీళ్లు తమ ప్రదర్శనతో దేశం దృష్టిని ఆకర్షించారు.

కర్ణాటకలో జరిగిన సౌత్‌జోన్‌ అథ్లెటిక్స్‌ ఛాంపియన్‌షిప్‌లో తెలుగమ్మాయిలదే హవా. 2000 మీటర్ల స్టీపుల్‌ ఛేజ్‌లో మహేశ్వరి స్వర్ణం (6 నిమిషాల 41 సెకన్లు)తో మెరిసింది. 2015 నాటి జాతీయ రికార్డు (7ని 1.72సె)ను తిరగరాసింది. కొత్త మీట్‌ రికార్డును నెలకొల్పింది. 1500 మీటర్ల పరుగును 4ని 42 సెకన్లలో ముగించి రజత పతకం సాధించింది. హెప్టాథ్లాన్‌లో నందిని జాతీయ రికార్డు బద్దలు కొట్టింది. 5046 పాయింట్లతో స్వర్ణం సాధించి ఆరేళ్ల క్రితం స్వప్న బర్మన్‌ (4992) పేరిట నమోదైన రికార్డు (2013 ఆసియా క్రీడలు)ను తిరగరాసింది. 100 మీ హర్డిల్స్‌ను 15.19 సెకన్లలో ముగించి రజతం నెగ్గింది. 100 మీ, 200 మీ పరుగులలో దీప్తి 2 స్వర్ణ పతకాలు కైవసం చేసుకుంది. 100 మీ పరుగును 12.11 సెకన్లలో పూర్తి చేసిన దీప్తి.. 200 మీ పరుగును 24.84 సెకన్లలో ముగించింది. 2017లో ఆన్సీ జోసెఫ్‌ (25.09 సె) పేరిట ఉన్న మీట్‌ రికార్డును తుడిచి పెట్టింది.
ట్రాక్‌ను బాగు చేయండి
పేదరికం వెంటాడుతున్నా.. ఆత్మవిశ్వాసమే అండగా దూసుకెళ్తున్న మహేశ్వరి, నందిని, దీప్తిలు తెలంగాణ రాష్ట్ర ప్రభుత్వానికి చేసే విజ్ఞప్తి ఒక్కటే. కోట్ల రూపాయల నగదు ప్రోత్సాహకాలు తమకు ఇవ్వకపోయినా.. గచ్చిబౌలి స్టేడియంలోని అథ్లెటిక్స్‌ను ట్రాక్‌ బాగు చేయమంటున్నారు. పెచ్చులూడిపోయిన ట్రాక్‌పై పరుగెత్తుతుంటే గాయాలవుతున్నాయని వాపోతున్నారు. ప్రధాన స్టేడియంలో ట్రాక్‌.. ప్రాక్టీస్‌ ట్రాక్‌ పూర్తిగా పాడయ్యాయని అంటున్నారు. ఆదివారం వచ్చిందంటే ఫంక్షన్లు నిర్వహిస్తుండటం తమ ప్రాక్టీసు ఇబ్బందిగా మారిందని చెప్తున్నారు. రోడ్డుపై సాధన చేస్తుంటే కాలి కండరాలు పట్టుకుంటున్నాయని ఆవేదన వ్యక్తంజేస్తున్నారు.

భూమి పుత్రిక
మహబూబ్‌నగర్‌ జిల్లా వెల్కిచర్లకు చెందిన మహేశ్వరిది వ్యవసాయ కుటుంబం. నలుగురు సంతానంలో పెద్దమ్మాయి. నాన్నకు చేదోడు వాదోడుగా ఉండేందుకు 13 ఏళ్ల నుంచే పొలం బాట పట్టింది. అరక పట్టి దుక్కి దున్నింది. కలుపు తీసింది. నాట్లు వేసింది. పత్తి ఏరింది. గొర్రెలు కాసింది. ట్రాక్టర్‌ కూడా నడిపింది. ఉదయం 7 గంటలకు మొదలుపెట్టి సాయంత్రం 6 గంటల వరకు అరక పట్టి దుక్కి దున్నిన సందర్భాలెన్నో. వేసవి సెలవుల్లో కూలీకి వెళ్లడం మామూలే. వాటితో పాటు రోజూ మైదానానికి వెళ్లి జావెలిన్‌ త్రో ప్రాక్టీస్‌ చేసింది. అలా చేస్తూనే పదో తరగతి, ఇంటర్‌ పూర్తి చేసిన మహేశ్వరి.. కోచ్‌ రమేశ్‌ దృష్టిలో పడటం కీలక మలుపు. మహేశ్వరిలోని ప్రతిభను గుర్తించిన రమేశ్‌.. 2016 వరకు జావెలిన్‌ త్రో సాధన చేసిన ఆమెను 800 మీ పరుగుకు మార్చాడు. 2017లో 800 మీ పరుగులో రజత పతకం సాధించింది. అనంతరం స్టీపుల్‌ ఛేజ్‌కు మారిన మహేశ్వరి సౌత్‌జోన్‌ టోర్నీలో అద్భుతమే చేసింది. రికార్డుల మీద రికార్డులతో ప్రశంసలందుకుంది. రానున్న జూనియర్‌ ఫెడరేషన్‌ కప్‌లో మరో రికార్డు సృష్టించాలన్న లక్ష్యాన్ని నిర్దేశించుకుంది. ఆసియా స్థాయిలో పతకం సాధించడమే తన ఆశయమని చెప్తోంది.
వాచ్‌మన్‌ తనయ
నందిని నాలుగు నెలల వయసున్నప్పుడు ఆమె తల్లిదండ్రులు కర్ణాటక నుంచి హైదరాబాద్‌కు వలస వచ్చారు. నగర శివార్లలోని ఓ కాలనీలోని నీళ్ల ట్యాంకు కింద మున్సిపల్‌ షెడ్‌లో నివాసం ఏర్పర్చుకున్నారు. అదే కాలనీకి తండ్రి వాచ్‌మన్‌గా పని చేస్తుండగా.. తల్లి అందరి ఇళ్లలో పనికి వెళ్లేది. ఇంటినిండా పేదరికం ఉన్నా ఆటలపై ఇష్టంతో క్రీడల్లో చురుగ్గా పాల్గొనేది నందిని. కాలనీలోని కొందరి సహకారంతో కేంద్ర ప్రభుత్వ పాఠశాలలో చోటు సంపాదించిన నందిని అథ్లెటిక్స్‌పై పూర్తిస్థాయిలో దృష్టిసారించింది. ఖమ్మంలో జరిగిన జాతీయ స్థాయి పోటీల్లో నందినిని చూసిన రమేశ్‌ ఆమెను హైదరాబాద్‌లోని సాయ్‌ ఎస్టీసీకి ఎంపిక చేశాడు. హెప్టాథ్లాన్‌లో శిక్షణ ఇప్పిస్తే ఫలితం ఉంటుందని భావించాడు. తల్లిదండ్రులకు ఇష్టం లేకపోయినా నందిని సాయ్‌ హాస్టల్‌కు వచ్చే హెప్టాథ్లాన్‌లో శిక్షణ మొదలుపెట్టింది. ఐతే నందిని హాజరు శాతం తక్కువుందన్న కారణంతో పాఠశాల ప్రిన్సిపల్‌ ఆమెకు టీసీ ఇచ్చారు. అయినా నందిని వెనుకడుగు వేయలేదు. ఇష్టమైన అథ్లెటిక్స్‌ను వీడలేదు. చదువుకు దూరమైనా ఆటపై ఏకాగ్రత తగ్గలేదు. మరింత పట్టుదలతో ప్రాక్టీస్‌ చేసిన నందిని సౌత్‌జోన్‌ ఛాంపియన్‌షిప్‌లో జాతీయ, మీట్‌ రికార్డులతో సత్తాచాటింది. ఎస్సీ, ఎస్టీ గురుకుల విద్యాలయాలంలో ప్రస్తుతం పదో తరగతి చదువుతున్న నందిని అథ్లెటిక్స్‌లో మరింత పట్టుదలతో దూసుకెళ్తోంది.

కూలీ కుమార్తె
వరంగల్‌ జిల్లా కల్లెడ గ్రామానికి చెందిన దీప్తిది నిరుపేద కుటుంబం. తల్లి, తండ్రి ఇద్దరూ కూలీలే. రెక్కాడితే గానీ డొక్కాడని పరిస్థితి. పాఠశాల క్రీడల్లో 100 మీ, 200 మీ పరుగులో ప్రతిభ కనబరుస్తున్న దీప్తి 9వ తరగతిలో సాయ్‌ హాస్టల్‌లో చేరింది. 2015 నుంచి శిక్షణ తీసుకుంటున్న దీప్తి స్ప్రింట్‌లో భవిష్యత్‌ ఆశాకిరణంగా దూసుకొచ్చింది. 2017 సౌత్‌జోన్‌ ఛాంపియన్‌షిప్‌లో 100 మీ, 200 మీలలో స్వర్ణ పతకాలు కైవసం చేసుకుంది. ఇటీవల మరోసారి అదే ప్రదర్శనను పునరావృతం చేసింది. 200 మీ పరుగులో మీట్‌ రికార్డు నమోదు చేసింది. ఆసియా యూత్‌ ఛాంపియన్‌షిప్‌లో రజతం, కాంస్య పతకాలు కూడా సొంతం చేసుకుంది. 2020 టోక్యో ఒలింపిక్స్‌ లక్ష్యంగా సాధన చేస్తోంది.

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి