వేళ్లు లేకపోయినా..!

అవీ ఇవీ...

వేళ్లు లేకపోయినా..!

మంత్రి రమేశ్‌ సుబ్రహ్మణ్యం నాయుడు.. పుట్టుకతోనే దివ్యాంగుడు! క్రికెట్‌పై ఇష్టంతో ఆట నేర్చుకున్నాడు. నేర్చుకోవడమే కాదు.. అటు బ్యాటుతో, ఇటు బంతితో అదరగొడుతున్నాడు. అతడు బ్యాటింగ్‌ చేస్తే పరుగుల ప్రవాహమే. బౌలింగ్‌ చేస్తే వికెట్లే వికెట్లు. దేశవ్యాప్తంగా ఎన్నో క్రికెట్‌ టోర్నీలు ఆడాడు. ఎన్నో మ్యాన్‌ ఆఫ్‌ ద సిరీస్‌లు అందుకున్నాడు. అందరితో శభాష్‌ అనిపించుకున్నాడు. ఈ ఘనతలన్నీ దివ్యాంగుల టోర్నీల్లో సాధించినవి అనుకుంటే పొరపాటే! సాధారణ క్రికెట్లోనే.. శారీరకంగా ఏ లోపం లేని ఆటగాళ్లతో పోటీపడుతూ రమేశ్‌ ఎన్నో శిఖరాలు అధిరోహించడం విశేషం.
రమేశ్‌ చేతి వేళ్ల నిర్మాణం సరిగా లేదు. రెండు చేతులకు బొటనవేళ్లు పెద్దగా ఉంటాయి. మిగతా వేళ్లు చాలా చిన్నవి. కుడి కాలి పాదానికి బొటన వేలు మాత్రమే ఉంది. విశాఖపట్నానికి చెందిన రమేశ్‌ అవయవ లోపంతో జన్మించినా ఆటలో అతడు మరెవరికీ తీసిపోడు. బంతిని గింగిరాలు తిప్పడంలో దిట్ట. లెగ్‌ స్పిన్‌తో హేమాహేమీ బ్యాట్స్‌మెన్‌ను బోల్తాకొట్టించగలడు. బ్యాటుతోనూ అదే స్థాయిలో మాయ చేయగలడు. బొటన వేలు.. చిటికెన వేలు సహాయంతో బంతిపై పట్టుసాధించుకుని బౌలింగ్‌ వేస్తాడు. బ్యాటింగ్‌లోనూ ఆ రెండు వేళ్లే అతడికి పనికొస్తాయి. గతంలో ‘ఈనాడు’ ఛాంపియన్‌ క్రికెట్‌ (ఈసీసీ) కప్‌లో అందరితో కలిసి ఆడి సత్తాచాటాడు రమేశ్‌. ఆటలోనే కాదు చదువులోనూ అతడు నేర్పరి. ఇంటర్‌లో 95 శాతం మార్కులు సాధించాడు. ఐఐటీ ప్రవేశ పరీక్షలో అఖిల భారత స్థాయిలో 41వ ర్యాంకు సాధించి ఐఐటీ మద్రాసులో సీటు సంపాదించాడు. తమిళనాడులో చదువుకుంటూ అక్కడి లీగ్‌ క్రికెట్లో చురుగ్గా పాల్గొంటున్నాడు. కుడి కాలి వేళ్లు లేకపోయినా రమేశ్‌ బాగా పరుగెత్తగలడు. 5 కిమీ పరుగును 24 నిమిషాల్లో పూర్తి చేస్తాడు. యోయో ఫిట్‌నెస్‌ 14వ స్థాయి పరీక్ష కూడా పాసయ్యాడు.

తమిళనాడు సాధారణ లీగ్‌లో ఆడుతున్న రమేశ్‌ను దివ్యాంగుల క్రికెట్‌కు సిఫారసు చేసింది ఆ రాష్ట్ర సంఘం. తమిళనాడు క్రికెట్‌ సంఘం సూచనతో దివ్యాంగుల క్రికెట్లో తన అదృష్టం పరీక్షించుకున్నాడు. సాధారణ క్రికెట్లోనే సత్తాచాటుతున్న రమేశ్‌.. దివ్యాంగుల ఆటలోనూ మెరిశాడు. ఏకంగా తమిళనాడు రాష్ట్ర దివ్యాంగుల జట్టుకు కెప్టెన్‌గా ఎంపికయ్యాడు. అట్నుంచి సౌత్‌జోన్‌ టోర్నీలో సత్తాచాటాడు. అఖిల భారత స్థాయిలో జరిగిన సెలెక్షన్స్‌లో 78 పరుగులు చేసి.. ఐదు వికెట్లు తీశాడు. సెలెక్టర్ల దృష్టిని ఆకర్షించిన రమేశ్‌కు భారత టీ20 ప్రపంచకప్‌ జట్టులో చోటు దక్కింది. ఆగస్టులో ఇంగ్లాండ్‌లో జరుగనున్న దివ్యాంగుల తొలి టీ20 ప్రపంచకప్‌లో రమేశ్‌ భారత జట్టుకు ప్రాతినిధ్యం వహించనుండటం ఎంతోమందికి స్ఫూర్తిదాయకం.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

అవీ ఇవీ...

మరిన్ని

రుచులు

App