చందాలతోమ్యాచ్‌లాడి..

ఈ ఆటకు 20 ఏళ్లు

సచిన్‌ తెందుల్కర్‌.. జావెద్‌ మియాందాద్‌.. సనత్‌ జయసూర్య.. ప్రపంచ క్రికెట్‌ చరిత్రలోనే 20 ఏళ్ల అంతర్జాతీయ కెరీర్‌ పూర్తి చేసుకున్న ఆటగాళ్లు ఈ ముగ్గురే! మహిళల క్రికెట్లో మొన్నటిదాకా ఒక్కరూ ఈ మైలురాయిని అందుకోలేదు! పదేళ్ల ప్రస్థానమే కష్టం అనుకునే మహిళల ఆటలో అన్నేళ్లు 20 ఏళ్ల కెరీర్‌ ఊహకందని విషయం! కానీ ఇటీవలే ఈ అరుదైన ఘనతను అందుకుని అబ్బురపరిచింది మన మిథాలీ రాజ్‌. అయితే ఈ సుదీర్ఘ ప్రస్థానంలో ఆమె ఎదుర్కొన్న ఒడుదొడుకులు అన్నీ అన్నీ కావు! అంతర్జాతీయ మ్యాచ్‌లు ఆడితే డబ్బు రాకపోగా సొంతంగా చేతి నుంచే ఖర్చు పెట్టే రోజుల్లో కెరీర్‌ మొదలుపెట్టి.. తన ప్రదర్శనతో ఆటకే ఆదరణ పెంచే స్థాయికి చేరుకుందామె. 20 ఏళ్ల కెరీర్లో మిథాలీ ప్రతి అడుగూ స్ఫూర్తిదాయకమే!

2006 వరకు మహిళల క్రికెట్లో రూపాయి ఆదాయం లేదు! బీసీసీఐలో మహిళల క్రికెట్‌ విలీనమయ్యే వరకు అమ్మాయిల ఆటలో ఎవరి ఖర్చులు వారివే. ఇప్పుడు మహిళా క్రికెటర్లు మ్యాచ్‌ల కోసం బీసీసీఐ ఖర్చుతో విమానాల్లో వెళ్తున్నారు. కానీ ఒకప్పుడు రైల్లో సాధారణ తరగతుల్లో ప్రయాణించి మ్యాచ్‌లకు వెళ్లేవారు అమ్మాయిలు. అందులో మిథాలీ కూడా ఒకరు. ఏదైనా సిరీస్‌ మొదలవుతుంటే.. అందులో ఆడితే ఎంత సంపాదన ఉంటుందని కాకుండా, చేతి నుంచి ఎంత ఖర్చవుతుంది అని ఆలోచించాల్సిన పరిస్థితి మిథాలీది. 2002లో ఇంగ్లాండ్‌తో టెస్టులో 214 పరుగులతో అత్యధిక వ్యక్తిగత స్కోరు సాధించినప్పుడు మిథాలీకి అయిన ఖర్చు అక్షరాల రూ.25 వేలు! ఆ తర్వాత శ్రీలంక పర్యటనకూ చందాల సొమ్ముతో వెళ్లిన అనుభవం ఆమెది! 2005 ప్రపంచకప్‌లో భారత్‌ను రన్నరప్‌గా నిలిపిన కెప్టెన్‌ మిథాలీకి అప్పట్లో రైల్వేస్‌లో ఉద్యోగమే దిక్కు. క్రికెటర్లను దేవుళ్లుగా కొలుస్తూ.. ఆటగాళ్లపై కోట్ల వర్షం కురుస్తున్న దేశంలోనే మహిళల క్రికెట్‌ నిరాదరణకు గురవడం.. ఆర్థికంగా ఏమాత్రం ఆసరా లేకపోవడం మిథాలీ పట్టుదలను కించిత్‌ కూడా తగ్గించలేకపోయింది.

1999లో అరంగేట్ర వన్డేలో అజేయ శతకంతో రాణించినప్పుడు మిథాలీ వయసు 16 ఏళ్లు. పూర్ణిమారావు, అంజుమ్‌ చోప్రా, అంజూ జైన్‌ లాంటి సీనియర్లతో కలిసి ఆడింది. 2005 నాటికి జట్టులోని క్రీడాకారిణులంతా మిథాలీ ఈడువాళ్లే. 2009 నుంచి ఇప్పటి వరకు అందరూ మిథాలీ కంటే జూనియర్లే. తనకంటే సీనియర్లకు నాయకత్వం వహించిన మిథాలీ.. అంతర్జాతీయ క్రికెట్లో తన అనుభవమంత వయసు లేని వాళ్లకు ఇప్పుడు సారథిగా కొనసాగుతోంది. ఈ క్రమంలో ఎదురైన ఎన్నో ఒడుదొడుకులు మిథాలీ ఆత్మవిశ్వాసాన్ని దెబ్బతీయలేదు సరికదా ఆమెను మరింతగా రాటుదేల్చాయి. 2005లో భారత మహిళల జట్టు ప్రపంచకప్‌ ఫైనల్‌ చేరుకోవడం మిథాలీ సహా ఎవ్వరూ ఊహించనిదే! దేశంలో మహిళల క్రికెట్‌ను ఉన్నత శిఖరాలకు తీసుకెళ్లాలన్న లక్ష్యాన్ని నిర్దేశించుకుంది అప్పుడే. అయితే ఆ సమయంలో మిథాలీకి అయిన గాయం ఆమె కెరీర్‌ను ప్రమాదంలోకి నెట్టింది. శస్త్రచికిత్స చేస్తేగానీ మిథాలీ బ్యాట్‌ పట్టదని వైద్యులు తేల్చేశారు. బ్యాట్‌ పట్టకపోయినా ఫర్వాలేదు గానీ శస్త్రచికిత్సకు ఒప్పుకునేది లేదంటూ తల్లిదండ్రులు భీష్మించారు. చివరికి శస్త్రచికిత్స అవసరం లేకుండానే మిథాలీ గాయం మానిపోయింది. ఆమె మళ్లీ బ్యాటు పట్టింది. మరెన్నో రికార్డులు మిథాలీ ముందు మోకరిల్లాయి.

అటు ఆ ముగ్గురు.. ఇటు మిథాలీ

సచిన్‌.. మియాందాద్‌.. జయసూర్య.. మిథాలీ! 20 ఏళ్లకు పైగా అంతర్జాతీయ కెరీర్‌ కలిగిన క్రికెటర్లు వీళ్లే. సచిన్‌, మియాందాద్‌, జయసూర్య అన్నేళ్లు ఆటలో ఉండటం గొప్ఫే కానీ.. ఓ మధ్య తరగతి అమ్మాయికి ఎన్నో సవాళ్లతో కూడిన మహిళల క్రికెట్లో రెండు దశాబ్దాల కెరీర్‌ అంటే అసాధారణమే. కనీస వసతులు కరవైన ఆటలో కొనసాగుతూ.. ఆ ఆట గతినే మార్చే స్థాయికి చేరుకోవడం అద్భుతమే!

నాన్న మాటను కాదని..

మిథాలీకి 25 ఏళ్లొచ్చినప్పుడు సంకట స్థితి ఎదురైంది. ‘‘క్రికెట్‌ ఆడింది చాలు. పెళ్లి చేసుకుని జీవితంలో స్థిరపడు. ఇంకా ఎదురుచూస్తే ముసలాణ్ణి చేసుకోవాలి’’ అంటూ తండ్రి స్పష్టంగా చెప్పేశాడు. చిన్నప్పుడు నాన్న మాట మేరకే క్రికెట్‌లోకి వచ్చింది. అంతర్జాతీయ క్రికెట్లో అత్యున్నత స్థాయికి ఎదిగింది. అలాంటిది పెళ్లి విషయంలో నాన్న మాటనే కాదని, క్రికెట్‌కు తన జీవితాన్ని అంకితం చేసింది. అప్పట్నుంచి మిథాలీ ఆట మరో స్థాయికి చేరుకుంది. అంతర్జాతీయ క్రికెట్లో అత్యధిక పరుగులు చేసిన మహిళా క్రికెటర్‌గా మిథాలీ రికార్డు సృష్టించింది. వన్డే క్రికెట్లో 6 వేల పరుగుల మైలురాయిని అధిగమించిన ఏకైక క్రీడాకారిణిగా నిలిచింది. టీ20 క్రికెట్లో 2000 పరుగులు సాధించిన తొలి (పురుషులు, మహిళలు కలిపి) క్రికెటర్‌గా గొప్ప ఘనత అందుకుంది. 200 వన్డేలు ఆడిన తొలి మహిళా క్రికెటర్‌గా రికార్డు నెలకొల్పింది. ఇప్పటికీ వన్డేల్లో మిథాలీ సగటు 51 కంటే ఎక్కువే. 2004 ఏప్రిల్‌ నుంచి ఇప్పటిదాకా మిథాలీ సగటు 45కు తగ్గకపోవడం ఆమె సత్తాకు తిరుగులేని నిదర్శనం.

ఇప్పటికీ అదే కష్టం

మూడు వారలు దాటితే మిథాలీకి 37 ఏళ్లొస్తాయి. తొమ్మిదేళ్ల వయసు నుంచి మిథాలీ క్రికెట్‌ ఆడుతోంది. సుమారు 28 ఏళ్లుగా క్రికెట్‌తో ఆమె అనుబంధం కొనసాగుతోంది. చిన్నప్పట్నుంచి మిథాలీ ఇంట్లో గడిపిన సమయం చాలా తక్కువ. ఉదయం, సాయంత్రం ప్రాక్టీస్‌.. మధ్యలో చదువు. 2021 ప్రపంచకప్‌ వరకు క్రికెట్లో కొనసాగాలని భావిస్తున్న మిథాలీ ఇప్పటికీ కఠోర సాధననే నమ్ముకుంది. వయసులో తనకంటే ఎంతో చిన్నవాళ్లతో మైదానంలో పోటీపడుతోంది. వారికంటే ఎక్కువగా పరుగులు రాబడుతోంది. మెరుగైన ఫీల్డింగ్‌.. ఫిట్‌నెస్‌తో ఆకట్టుకుంటోంది. ఈ స్థాయికి చేరుకున్నా.. ఇంత అనుభవం వచ్చినా మిథాలీ ఎప్పుడూ విశ్రమించలేదు. ఉదయాన్నే లేచి సాధనకు వెళ్తుంది. మధ్యాహ్నం విశ్రాంతి తీసుకుని.. సాయంత్రం జిమ్‌లో కసరత్తులు చేస్తుంది. వ్యక్తిగత ట్రైనర్‌, న్యూట్రిషనర్‌ సలహాల్ని తూచా తప్పకుండా పాటిస్తుంది. 40 ఏళ్లకు దగ్గరవుతున్నా మిథాలీ పట్టుదల, అంకితభావంలో ఏ మార్పు లేదు. వ్యక్తిగత జీవితానికి దూరమై.. ఆటే సర్వస్వంగా భావించిన మిథాలీకి సహకారం అందించకపోగా.. ఆమె ప్రతిష్టను దెబ్బ తీసే ప్రయత్నాలు జరిగాయి. గత ఏడాది టీ20 ప్రపంచకప్‌ సెమీస్‌లో మిథాలీని పక్కన పెట్టడం, ఆమెను తక్కువ చేసి మాట్లాడటం అందుకు ఒక ఉదాహరణ. అయినా మిథాలీ నిబ్బరం ప్రదర్శించింది. ఆటలోనే కొనసాగింది. ఇటీవలే టీ20లకు గుడ్‌బై చెప్పిన ఈ దిగ్గజ క్రికెటర్‌.. వన్డేలు, టెస్టుల్లో కొనసాగుతూ వాటిలో అత్యుత్తమ ప్రదర్శన ఇచ్చే ప్రయత్నం చేస్తోంది.

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి