వీళ్లకు పరుగులు రాసి ఉన్నాయి..!

స్పోర్ట్స్‌ స్టార్‌

వీళ్లకు పరుగులు రాసి ఉన్నాయి..!

చిన్నప్పట్నుంచి రగ్బీని ప్రేమించి, దాన్నే కెరీర్‌గా మలుచుకున్న ఆటగాడు.. ఉన్నట్లుండి క్రికెట్‌ వైపు మళ్లి ఏకంగా దేశం తరఫున ఆడే అవకాశం దక్కించుకున్నాడు. జట్టులో కీలక ఆటగాడిగా ఎదిగాడు. కారు ప్రమాదంలో రెండు కాళ్లూ తీవ్రంగా దెబ్బ తిని కొన్ని నెలల పాటు మంచానికి పరిమితమై, మళ్లీ నడవడమే కష్టం అనుకున్న మరో క్రికెటర్‌.. మళ్లీ క్రికెట్‌ ఆడుతున్నాడు. అంతర్జాతీయ స్థాయిలో మెరుపులు మెరిపిస్తున్నాడు.
ప్రపంచకప్‌లో అందరి దృష్టినీ ఆకర్షించిన ఆ ఇద్దరు ఆటగాళ్ల కథేంటో తెలుసుకుందాం పదండి.

అలెక్స్‌ కేరీ.. అనతికాలంలోనే ఆస్ట్రేలియా పరిమిత ఓవర్ల జట్టులో ఉత్తమ వికెట్‌కీపర్‌ బ్యాట్స్‌మన్‌గా మంచి పేరు కొట్టేశాడు. ప్రపంచకప్‌ ఆడే అవకాశం దక్కించుకొని బ్యాట్‌తో సత్తాచాటుతున్నాడు. ఏడో స్థానంలో బ్యాటింగ్‌కు దిగే అతను ప్రపంచకప్‌లో ఇప్పటి వరకు ఎనిమిది మ్యాచ్‌ల్లో 244 పరుగులతో అదరగొట్టాడు. బ్యాటింగ్‌ ఆర్డర్లో టాప్‌-6 స్థానాల తర్వాత ఓ ప్రపంచకప్‌లో అత్యధిక పరుగులు చేసిన ఆటగాడిగా రికార్డు నమోదు చేశాడు. అంతకుముందు ఈ రికార్డు దక్షిణాఫ్రికా మాజీ ఆల్‌రౌండర్‌ క్లూసెనర్‌ (1999 ప్రపంచకప్‌లో 241 పరుగులు) పేరు మీద ఉంది. అయితే క్రికెట్‌లో గొప్పగా రాణిస్తోన్న కేరీ.. మొదట ఆస్ట్రేలియా ఫుట్‌బాల్‌ (రగ్బీ) క్రీడాకారుడు.

కాదనుకున్నవాడే.. తిరిగి: చిన్నతనంలో కేరీ రగ్బీ మీద అమితాసక్తి ప్రదర్శించేవాడు. క్రికెట్‌ ఆడినా కూడా ప్రధాన దృష్టి మాత్రం దానిపైనే. ఎప్పుడూ బంతిని పట్టుకొని పరుగెత్తుతూ మైదానంలో కనిపించేవాడు. దాన్నే కెరీర్‌గా ఎంచుకున్నాడు. పదిహేనేళ్ల వయసులోనే దక్షిణ ఆస్ట్రేలియా జాతీయ ఫుట్‌బాల్‌ (ఎస్‌ఏఎన్‌ఎఫ్‌ఎల్‌) లీగ్‌లో గ్లెనెల్గ్‌ జట్టు తరపున ఆడే అవకాశం కొట్టేశాడు. అక్కడి నుంచి అంచెలంచెలుగా ఎదిగి సత్తాచాటాడు. దక్షిణ ఆస్ట్రేలియా జట్టు తరపున ఆస్ట్రేలియా ఫుట్‌బాల్‌ లీగ్‌ (ఏఎఫ్‌ఎల్‌) అండర్‌-18 ఛాంపియన్‌షిప్‌లో ప్రాతినిథ్యం వహించాడు. టీఎసీ కప్‌ ఫుట్‌బాల్‌ టోర్నీలో గ్రేటర్‌ వెస్టర్న్‌ సిడ్నీ జెయింట్స్‌ కెప్టెన్‌గా తన జట్టుకు ఫైనల్స్‌కు చేర్చాడు. అయితే ఆ తర్వాతి ఏడాది తన ఫామ్‌ గొప్పగా లేకపోవడంతో జట్టులో చోటు దక్కలేదు. దీంతో ఆవేదన చెందిన అతను.. అప్పటికే తనకు కొంచెం అనుభవం ఉన్న క్రికెట్లోకి వచ్చాడు. గ్లెనెల్గ్‌ క్రికెట్‌ క్లబ్‌ తరపున గ్రేడ్‌ క్రికెట్‌ ఆడాడు. మొదట టాప్‌ఆర్డర్‌ బ్యాట్స్‌మన్‌గా క్రికెట్‌ మొదలెట్టిన అతను తర్వాత వికెట్‌ కీపర్‌గా మారాడు. 2016- 17 సీజన్లో షెఫీల్డ్‌ షీల్డ్‌ టోర్నీలో 500 పరుగులు చేయడంతో పాటు వికెట్‌కీపర్‌గా 59 మందిని ఔట్‌ చేసి.. ఆ ఘనత సాధించిన నాలుగో క్రికెటర్‌గా చరిత్రకెక్కాడు. అనంతరం ఆస్ట్రేలియా- ఎ జట్టులో ఎంపికై.. ఆ తర్వాత జాతీయ జట్టులో చోటు దక్కించుకొని ప్రస్తుతం చక్కని ఆటతీరుతో అలరిస్తున్నాడు.

జీవితంలో ఊహించని సంఘటన జరిగితే ఆశ్చర్యపడతారు.. కానీ ఆ సంఘటన.. జీవితాన్నే మలుపు తిప్పితే.. చీకట్లోకి నెట్టేస్తే.. భవిష్యత్‌ను అంధకారం చేసేస్తే.. ఆ విపత్కర పరిణామాలను దాటుకొని విజేతగా నిలిస్తే.. అది విండీస్‌ క్రికెటర్‌ నికోలస్‌ పూరన్‌ కథ అవుతుంది. లేకపోతే కారు ప్రమాదంలో తీవ్రంగా గాయపడి అసలు నడవలేని స్థితి నుంచి ప్రస్తుతం ప్రపంచకప్‌లో దేశానికి ప్రాతినిథ్యం వహించే స్థాయికి ఎదగడమంటే మామూలు విషయం కాదు కదా! పూరన్‌ విషయంలో అదే జరిగింది.

పరుగెత్తలేవన్నారు: పాఠశాల స్థాయి క్రికెట్లో సంచలనాలు సృష్టించిన పూరన్‌ క్రికెట్లో వేగంగా ఎదిగాడు. 16 ఏళ్లకే అండర్‌-19 జాతీయ జట్టు తలుపు తట్టాడు. కుర్రాళ్ల ప్రపంచకప్‌లో ఆస్ట్రేలియా మీద కఠిన పరిస్థితుల్లో 143 పరుగులు చేసి అందరి దృష్టిని ఆకర్షించాడు. కరీబియన్‌ ప్రిమియర్‌ లీగ్‌, దేశవాళీ టోర్నీల్లో మెరిశాడు. ఇక జాతీయ జట్టుకు ఆడడమే తరువాయి అనే దశలో అనుకోని ప్రమాదం అతని జీవితాన్ని అతలాకుతలం చేసింది. 2015 జనవరిలో ఓ రోజు క్రికెట్‌ సాధన పూర్తి చేసుకొని కార్లో ఇంటికి తిరిగి వస్తున్న సమయంలో జరిగిన రోడ్డు ప్రమాదంలో అతను తీవ్రంగా గాయపడ్డాడు. రెండు కాళ్లు ఘోరంగా దెబ్బతిన్నాయి. రెండు శస్త్రచికిత్సలు చేసిన వైద్యులు.. పూరన్‌ కోలుకున్నాక సరిగా పరుగెత్తలేడని చెప్పేశారు. క్రికెట్‌ ఆడడం కుదరదని తేల్చేశారు. దాంతో అతను నిరాశలో కూరుకుపోయాడు. ఆరు నెలల పాటు చక్రాల కుర్చీకే అంకితమైపోయాడు. నిస్పృహ, నిస్సత్తువలో అతను మునిగిపోయి ఉంటే అక్కడితోనే ఆగిపోయేవాడే. కానీ క్రికెట్‌పై ఉన్న ప్రేమ అతనిలో ఆత్మవిశ్వాసాన్ని పెంచింది. తిరిగి మైదానంలో అడుగుపెట్టాలనే తపన దెబ్బతిన్న కాళ్లకు పరుగులు నేర్పింది. పట్టుదలతో ప్రయత్నించిన అతను ఏడాదిలోపు మామూలు మనిషిగా మారాడు. తిరిగి బ్యాట్‌ పట్టాడు. తన ప్రదర్శనను కొనసాగించాడు. 2016లో పాకిస్థాన్‌పై టీ20తో అంతర్జాతీయ అరంగేట్రం చేశాడు. ఈ ఏడాది ఇంగ్లాండ్‌తో మ్యాచ్‌లో వన్డేల్లో అడుగుపెట్టాడు. ప్రస్తుత ప్రపంచకప్‌లో పూరన్‌.. 9 మ్యాచ్‌ల్లో ఓ శతకం సహా 367 పరుగులు చేసి విండీస్‌ తరపున అత్యధిక పరుగులు చేసిన ఆటగాడిగా నిలిచాడు.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

స్పోర్ట్స్‌ స్టార్‌

మరిన్ని

రుచులు

App