విరబోసినా.. విరబూసింది

స్పోర్ట్స్‌ స్టార్‌

ఒక వర్షం కురిసిన పగలు..! నడుము దిగువ వరకు పొడవాటి జుట్టు విరబోసుకుని.. ఫిట్‌నెస్‌ లేదా అన్నట్లు ఉండే బక్క పలచని శరీరంతో.. రేసు స్టార్టింగ్‌ పాయింట్లో కూర్చోందో అమ్మాయి.. ఆన్‌ ఏ మార్క్‌ అంటూ తుపాకీ పేలగానే.. పరుగెత్తింది.. పరుగెత్తింది.. పరుగెత్తుతూనే ఉంది.. ఫినిషింగ్‌ లైన్‌ దగ్గర ఆమె కాలు పెట్టగానే ప్రపంచ రికార్డు బద్దలైపోయింది! ఆ అమ్మాయి సంబరాల్లో మునిగిపోయింది.. ఇలా ప్రపంచ రికార్డు బద్దలు కొట్టిన ఆ కెరటమే దలీలా మహ్మద్‌. ఇటీవల యుఎస్‌ జాతీయ అథ్లెటిక్‌ మీట్‌లో 400 మీటర్ల హర్డిల్స్‌ ప్రపంచ రికార్డును తుడిచిపెట్టింది దలీలా. 52.20 సెకన్లలో లక్ష్యాన్ని చేరి కొత్త రికార్డు నెలకొల్పి టోక్యో ఒలింపిక్స్‌లో తనపై అంచనాలను ఎంతో పెంచేసింది.

ఫ్యాషన్‌ షోకి వచ్చినట్లు
దలీలాను చూస్తే ఎవరికి ఆమె ఒక అథ్లెట్‌లా అనిపించదు.. నడుమును దాటే పొడవాటి జుట్టు... దానికి సప్త వర్ణాలు.. ఏదో ఫ్యాషన్‌ షోకి వచ్చినట్లు లుక్‌..! ట్రాక్‌లో దిగితే తెలియదు ఆమె తడాఖా! అథ్లెటిక్స్‌లో క్లిష్లమైన హర్డిల్స్‌ను ఎంచుకున్న దలీలా.. ఈ విభాగంలో ప్రపంచ రికార్డు సృష్టించి అందర్ని తనవైపు తిప్పుకుంది. ముస్లిం కుటుంబం నుంచి వచ్చిన ఆమెకు.. అథ్లెటిక్స్‌లో కొనసాగడానికి చాలా ఇబ్బందులు ఎదురయ్యాయి. ట్రాక్‌ సూట్‌ వేసుకున్నా విమర్శించేవాళ్లు. అలాంటిది దలీలా జుట్టు విరబోసుకుని, ట్రాక్‌ సూట్‌ వేసుకుని తిరిగితే ఊరుకుంటారా? ఇలాంటి చాలా హర్డిల్స్‌ను దాటింది కాబట్టే ఆమె ఈ ఆటలో ప్రపంచ రికార్డు నెలకొల్పే స్థాయికి ఎదిగింది.
లాంగ్‌జంప్‌ చేయబోయి..
దలీలా సాధించింది మామూలు రికార్డేం కాదు 16 ఏళ్ల క్రితం సృష్టించిన హర్డిల్స్‌ ప్రపంచ రికార్డు. యులియా పెచొన్‌కినా (రష్యా, 52.34 సె) నెలకొల్పిన రికార్డును దలీలా తుడిచిపెట్టింది. ఇప్పుడు ప్రపంచ రికార్డు టైమింగ్‌ సాధించిన ఈ అమెరికా అమ్మాయి.. చిన్నప్పుడు హర్డిల్స్‌ అంటేనే భయపడేది. తమ అమ్మాయికి హర్డిల్స్‌ తగిలితే గాయాలు అవుతాయనని తల్లి దలీలాను ఈ విభాగంలోకి వెళ్లేందుకు ఒప్పుకోలేదు. కోచ్‌ సర్ది చెప్పడంతో దలీలా హర్డిల్స్‌లోకి వచ్చింది. నిజానికి దలీలాకు ఇష్టమైన ఆట లాంగ్‌జంప్‌. ఏడేళ్ల వయసులో ఆమె నొవాస్‌ ట్రాక్‌ క్లబ్‌లో లాంగ్‌జంప్‌ సాధన చేస్తూ ఉండేది. లాంగ్‌జంప్‌ కన్నా హర్డిల్స్‌లో అయితే ఆమె మెరుగ్గా రాణింగలదని భావించిన ఆమె కోచ్‌ హర్డిల్‌లోకి తీసుకొచ్చాడు. చిన్నప్పుడు ఆమె హిజాబ్‌ ధరించి సంప్రదాయ దుస్తుల్లోనే సాధన చేసేది. ఇలా ప్రాక్టీస్‌ చేయడం ఆమెకు చాలా కష్టమయ్యేది. 2009లో అమెరికా జూనియర్‌ ఛాంపియన్‌షిప్‌ను గెలుచుకున్న దాలియా.. అదే ఏడాది పాన్‌ అమెరికా ఛాంపియన్‌షిప్‌, నాకా ఔట్‌డోర్‌ ఛాంపియన్‌షిప్‌లో కాంస్యం గెలుచుకుని సత్తా చాటింది.
ఒలింపిక్స్‌లో సత్తా చాటి
2012 లండన్‌ ఒలింపిక్స్‌కు ఎంపిక కావాలనే లక్ష్యంతో కఠోర శ్రమ చేసినా.. గాయం ఆమె ఆశలను తుంచేసింది. నిరాశపడకుండా ముందుకెళ్లిన హర్డిల్‌ స్టార్‌ 2013 ప్రపంచ ఛాంపియన్‌షిప్‌లో రజతం గెలిచింది.. 2016 రియో ఒలింపిక్స్‌కు అర్హత సాధించింది. ఈ మెగా ఈవెంట్లో 400 మీ హర్డిల్స్‌ పరుగులో స్వర్ణం గెలిచి తన కల నెరవేర్చుకుందీ అమ్మాయి. 2017 ప్రపంచ ఛాంపియన్‌షిప్‌లోనూ రజతం నెగ్గిన ఆమె.. తాజాగా ప్రపంచ రికార్డు సృష్టించి టోక్యో ఒలింపిక్స్‌లో స్వర్ణంపై కన్నేసింది.