కష్టాలకడలిలో ఎగసిన కెరటాలు

స్పోర్ట్స్‌ స్టార్‌

కష్టాలకడలిలో ఎగసిన కెరటాలు

కష్టాలకడలిలో
ఎగసిన కెరటాలు

సెయిలింగ్‌ ఖరీదైన క్రీడ.. అందులోకి దిగాలంటే పెట్టుబడి, ప్రోత్సాహం చాలానే అవసరం. మరి అలాంటి ఆటలోకి తిండికే కష్టపడే బస్తీ పిల్లలు రాగలరా? వాళ్లకు అలాంటి అవకాశం ఎవరైనా ఇస్తారా? ఒకవేళ ఎవరైనా అవకాశం ఇచ్చారనే అనుకుందాం.. ఆ పిల్లలు ముందు వెనుక చూడకుండా ఆ ఆటలోకి దిగేస్తారా..? సాహసంతో కూడిన ఆ ఆటలో సాధన చేస్తారా..? అందులో నైపుణ్యం సంపాదిస్తారా..?
కానీ ఇవన్నీ సాధ్యమయ్యాయి!
హైదరాబాద్‌ బస్తీల్లో బతికే పేద కుటుంబాలకు చెందిన పిల్లలు అనుకోకుండా తమకు దక్కిన అవకాశం సద్వినియోగం చేసుకుని అద్భుతాలు చేస్తున్నారు. హుస్సేన్‌ సాగర్‌ నీటిపై కళ్లు చెదిరే విన్యాసాలతో అదరగొడుతున్నారు. పట్టుదల ముందు పేదరికం నిలవలేదని.. ప్రోత్సాహం ఉంటే ఎవరితో అయినా పోటీగలమని చాటుతున్న ఆ చిన్నారుల కథేంటో చూద్దాం పదండి.
తండ్రి లేడు.. తల్లి వాచ్‌ఉమన్‌
ఇటీవల హుస్సేన్‌సాగర్‌లో జరిగిన మాన్‌సూన్‌ రెగెట్టాలో సబ్‌జూనియర్‌ విభాగంలో అందరి దృష్టి ఆ బాలిక మీదే. అద్భుత ప్రదర్శనతో రజతం గెలిచి సత్తా చాటింది వెస్ట్‌మారెడ్‌పల్లికి చెందిన తునాగర్‌ మహబూబీ. రెండేళ్ల శిక్షణలోనే సెయిలింగ్‌లో ఆరితేరిన ఆమె వరుస విజయాలు సాధిస్తూ దూసుకెళ్తోంది. గత జనవరిలో పుదుచ్చేరిలో జరిగిన అంతర్జాతీయ రెగెట్టాలో మహిళల విభాగంలో ఈ అమ్మాయి స్వర్ణం సాధించింది. ఐతే విజయాలతో చిరునవ్వులు చిందిస్తున్న ఆమె వెనక విషాదం ఉంది. ఆమె తండ్రి మరణించడంతో కుటుంబ భారం తల్లిపై పడింది. ఆమె వాచ్‌ఉమన్‌గా పనిచేస్తూ ఇద్దరు కూతుళ్లను చదివిస్తోంది. యాట్‌ క్లబ్‌ వాళ్ల చొరవతో సెయిలింగ్‌ వైపు వచ్చిన మహబూబీ మొదట్లో ఈ క్రీడవైపు వస్తానంటే వాళ్ల అమ్మ ఒప్పుకోలేదు. ఐతే కూతురు పట్టు బట్టడంతో ఒప్పుకుంది. ఇప్పుడు మహబూబీ సాధిస్తున్న విజయాలు చూసి మురిసిపోతోంది. ‘‘మొదట్లో కొంచెం భయంగా అనిపించింది. నేను చేయగలనో లేదో అనుకున్నా. చాలా ఇబ్బందిపడ్డా. గాలికి అనుగుణంగా పడవను తిప్పడంలో వెనకబడేదాణ్ని. అయితే కోచ్‌ సుహీం సార్‌ దగ్గరుండి బాగా ప్రోత్సాహించారు. దాంతో కొన్ని నెలల్లోనే మెరుగయ్యా’’ అని మహబూబీ అంటోంది.
అమ్మానాన్నా భయపడ్డా..
నీళ్లలో రయ్‌మంటూ దూసుకెళ్లడం అంటే ఎంతో ఇష్టమంటోంది వెస్ట్‌మారెడ్‌పల్లికి చెందిన ఎం.లలిత. ప్రభుత్వ పాఠశాలలో తొమ్మిదో తరగతి చదువుతున్న ఆమె.. సెయిలింగ్‌లో సత్తా చాటుతోంది. ఆమె తండ్రి మేస్త్రీ. అమ్మ కూలీ పనులకు వెళ్తుంటుంది. సెయిలింగ్‌లో శిక్షణ తీసుకుంటాను అని చెప్పగానే అమ్మానాన్న అన్ని వివరాలూ తెలుసుకున్నాకే సరే అన్నారు. ‘‘మొదట్లో అమ్మానాన్న చేర్పించాలా వద్దా అని అయోమయంలో పడ్డారు. అయితే యాట్‌ క్లబ్‌ వాళ్లు తీసుకొనే జాగ్రత్తలు, శిక్షణ విధానం గురించి చెప్పిన తర్వాత సరే అన్నారు. ఇప్పుడు నా ప్రదర్శన పట్ల సంతోషంతో ఉన్నారు. శిక్షణ మొదలుపెట్టిన తొలిరోజుల్లో సెయిలింగ్‌లో రాణిస్తాననే ఆత్మవిశ్వాసం తక్కువగా ఉండేది. పడవలో అటు నుంచి ఇటు దూకడంలో ఇబ్బంది పడ్డా. అయితే శ్రద్ధగా సాధన చేసి మెరుగయ్యా’’ అని లలిత అంటోంది.
మెరిసిన కిరణం
హైదరాబాద్‌ మాన్‌సూన్‌ రెగెట్టా.. ఇంకా రెండు రేసులు మాత్రమే మిగిలి ఉన్నాయి. పతకం సాధించాలంటే ఆ రెండు రేసుల్లో ఆ బాలుడు తప్పనిసరిగా మంచి ప్రదర్శన చేయాలి. అప్పటిదాకా వెనకబడ్డ అతను అదే లక్ష్యంతో తన పడవను సిద్ధం చేసుకున్నాడు. ఆత్మవిశ్వాసంతో అద్భుత ప్రదర్శన చేసి మూడో స్థానంలో నిలిచి పతకం కొల్లగొట్టాడు. అతనే మహబూబ్‌నగర్‌కు చెందిన బి.జైకిరణ్‌. షేక్‌పేట్‌ వసతి గృహంలో ఉంటూ గోల్కొండ ప్రభుత్వ పాఠశాలలో తొమ్మిదో తరగతి చదువుతున్నాడీ కుర్రాడు. వ్యవసాయం చేస్తూ జీవనం సాగిస్తున్న అతని తల్లిదండ్రులు కొడుకు తమలా కాకూడదని ఆటలో మెరుగయ్యేలా ప్రోత్సహిస్తున్నారు. రెండేళ్ల శిక్షణతో ఆటలో ఆరితేరిన కిరణ్‌.. నీటిపై పడవను పరుగులు పెట్టిస్తున్నాడు. సెయిలింగ్‌లో సత్తాచాటి గోవాలోని నేవీ స్కూల్లో ప్రవేశం పొంది అక్కడే ప్రస్తుతం శిక్షణ పొందుతున్న సీనియర్లు దుర్గా ప్రసాద్‌, మల్లేశ్‌, సచిన్‌, విశ్వనాథన్‌ల బాటలో నడవాలని కిరణ్‌ ఉవ్విళ్లూరుతున్నాడు. ‘‘సీనియర్లు నాకు ప్రేరణనిచ్చారు. వాళ్లలాగా సత్తాచాటి నేవీ స్కూల్లో ప్రవేశం సాధిస్తా’’ అని కిరణ్‌ ధీమాగా చెబుతున్నాడు.

మొదట్లో గాలికి అనుగుణంగా పడవను తిప్పడంలో వెనకబడేదాణ్ని. అయితే కోచ్‌ సుహీం సార్‌ దగ్గరుండి బాగా ప్రోత్సహించారు. దాంతో కొన్ని నెలల్లోనే మెరుగయ్యా’’

- మహబూబీ

వారి వెనుక అతను

ప్రతిభ ఉన్న ఆటగాళ్లు ఎక్కడున్నా గుర్తించి వాళ్ల భవిష్యత్తుకు బాటలు వేస్తున్నాడు యాట్‌ క్లబ్‌ వ్యవస్థాపకుడు, కోచ్‌ సుహీం షేక్‌. పేద క్రీడాకారులకు కూడా ఈ ఆటను దగ్గర చేయాలని.. బస్తీలకు వెళ్లి పిల్లల్ని ఎంచుకుని వారికి శిక్షణ ఇచ్చి ఛాంపియన్లను చేసే ప్రయత్నంలో ఉన్నాడు. వీరి నుంచి రుసుములేమీ వసూలు చేయట్లేదు. మిత్రులు.. కొన్ని సంస్థల ఆర్థిక సాయంతో క్లబ్‌ను నడపిస్తున్నాడు. సుహీం బృందం ఎంపిక చేసిన కొన్ని పాఠశాలలకు వెళ్లి సెయిలింగ్‌ గురించి వివరించి ఎనిమిదేళ్ల కన్నా ఎక్కువ వయసుండి.. ఆసక్తి ఉన్న వాళ్ల పేర్లను నమోదు చేయించుకుంటుంది. వారిలో కొందరిని పాఠశాల ప్రతిపాదిస్తే.. మరికొందరు సొంత ఆసక్తితో వస్తారు. అలా వచ్చిన వారికి శారీరక, మానసిక పరీక్షలు నిర్వహించి ప్రతిభ కనబరిచిన వారిని శిక్షణ కోసం ఎంపిక చేస్తారు. అలా ఎంపికచేసిన వారికి సెయిలింగ్‌లో శిక్షణ దగ్గర నుంచి పౌష్టికాహారం అందించడం, వారి చదువును ఎప్పటికప్పుడూ సమీక్షించడం, పాఠశాల నుంచి తీసుకురావడంతో పాటు తిరిగి దించి రావడం వరకూ మొత్తం బాధ్యత యాట్‌ క్లబ్‌దే. 2009లో మూడు పడవలతో మొదలైన యాట్‌ క్లబ్‌లో ప్రస్తుతం 50 పడవలు ఉన్నాయి.

శిక్షణ కోసం చిన్నారులకు సెలక్షన్స్‌ నిర్వహిస్తాం. వచ్చినవారి శారీరక, మానసిక సామర్థ్యాన్ని పరీక్షించి మంచి ప్రదర్శన కనబరిచిన వారిని ఎంపిక చేస్తాం. మా సొంత ఖర్చులతో, మిత్రుల ప్రోత్సాహంతో వీళ్లకి శిక్షణతో పాటు మంచి పోషకాహారం అందిస్తున్నాం’’

- సుహీం, కోచ్‌

- శనిగారపు చందు, ఈనాడు డిజిటల్‌

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

స్పోర్ట్స్‌ స్టార్‌

మరిన్ని

రుచులు

App