ద్రవిడ్‌.. ది గురు - Rahul Dravid

స్పోర్ట్స్‌ స్టార్‌

ద్రవిడ్‌.. ది గురు

జట్టు పీకల్లోతు కష్టాల్లో ఉందా..? ప్రత్యర్థి బౌలర్లు చెలరేగిపోతున్నారా..? పిచ్‌ పరీక్ష పెడుతోందా..? అయితే అతనే రావాలి.. అతనే నిలవాలి.. అతనే ఆడాలి! ఇలా ఎన్నిసార్లు నిలిచాడో.. ఎన్నిసార్లు జట్టును రక్షించాడో లెక్కలేదు!
అందుకే అతడినందరూ ‘మిస్టర్‌ డిపెండబుల్‌’ అనేవాళ్లు! దశాబ్దంన్నర పైగా టీమ్‌ఇండియాకు.. ప్రత్యర్థి జట్లకు మధ్య ‘గోడ’లా నిలిచిన అతను.. ఆటకు టాటా చెప్పేశాక ఇంకా పెద్ద బాధ్యతే నెత్తికెత్తుకున్నాడు. యువతరాన్ని తీర్చిదిద్దే పనిలో పడ్డాడు. ఇప్పుడు భారత జట్టులో ఓ బౌలర్‌ గాయపడ్డాడా..? ఒక బ్యాట్స్‌మన్‌ వరుసగా విఫలమవుతున్నాడా..? కొత్తగా ఎవరినైనా ప్రయత్నించాలానుకుంటున్నారా? ఎలాంటి ప్రత్యామ్నాయం కావాలన్నా చూపు అతడివైపే! ఇప్పుడు భారత క్రికెట్‌ భవిష్యత్తు అతడి చేతుల్లో ఉందంటే అతిశయోక్తి కాదు! ఆటగాడిగా ఉన్నపుడే కాదు.. ఇప్పుడు కోచ్‌గా కూడా అతను మిస్టర్‌ డిపెండబులే!

దటీజ్‌.. రాహుల్‌ ద్రవిడ్‌!

ద్రవిడ్‌.. ది గురు

‘‘నేను భారత జట్టులోకి రావడం వెనుక ద్రవిడ్‌ పాత్ర ఉంది’’ ఇదీ ఇటీవలే టెస్టు అరంగేట్రం చేసిన విహారి మాట. ‘‘ద్రవిడ్‌ సలహాలు నాపై ఎంతో ప్రభావం చూపాయి’’.. అరంగేట్ర టెస్టులోనే సెంచరీ చేసిన యువ సంచలనం పృథ్వీ షా అభిప్రాయమిది. గత రెండు మూడేళ్లలో భారత యువ క్రికెటర్లు ఎంతోమంది ఇలా ద్రవిడ్‌ను కొనియాడారు! 2015లో భారత అండర్‌-19, భారత్‌-ఎ జట్ల కోచ్‌ బాధ్యతలు అందుకున్న రాహుల్‌.. ఈ మూడేళ్లలో భారత క్రికెట్‌ భవిష్యత్తుకు దిశానిర్దేశం చేసే ఒక వ్యవస్థలా మారిపోయాడంటే అతిశయోక్తి కాదు. టీనేజీలో కుర్రాళ్ల ప్రతిభను గుర్తించి.. వారిని సరైన దారిలో నడిపించి.. అంతర్జాతీయ క్రికెట్‌ ఆడేందుకు తగ్గట్లుగా తీర్చిదిద్ది.. టీమ్‌ఇండియాకు అందిస్తున్న ఘనత రాహుల్‌దే. రిషబ్‌ పంత్‌, పృథ్వీ షా, విహారి, మయాంక్‌, సిరాజ్‌, ఖలీల్‌.. ఇలా భారత జట్టులోకి దూసుకొచ్చిన యువ ఆటగాళ్లందరూ ద్రవిడ్‌ శిక్షణలో రాటుదేలిన వాళ్లే. ఈ కొత్త కుర్రాళ్లే కాదు.. రాహుల్‌, మనీష్‌ పాండే, కరుణ్‌ లాంటి అనుభవజ్ఞులూ ఇండియా-ఎకు ఆడుతూ ద్రవిడ్‌ సలహాలతో గాడిన పడ్డవారే! వీరిలో ఎవరిని కదిపినా.. ద్రవిడ్‌ను ఆకాశానికెత్తేస్తారు.

ద్రవిడ్‌.. ది గురు

అతనొచ్చాక అంతా మారింది
గత రెండేళ్లలో భారత జట్టులో చోటు దక్కించుకున్న యువ ఆటగాళ్లలో దాదాపుగా అందరూ భారత్‌-ఎ, అండర్‌-19 జట్ల నుంచి వచ్చిన వాళ్లే. ద్రవిడ్‌ తోడ్పాటుతో బీసీసీఐ ప్రతిభావంతులైన కుర్రాళ్లతో ఒక పూల్‌నే ఏర్పాటు చేసింది. ముందు జూనియర్‌ స్థాయిలో ప్రతిభావంతుల్ని గుర్తించడం.. అండర్‌-19 జట్టులో చోటు కల్పించడం.. ఆ జట్టు కోచ్‌ ద్రవిడ్‌ వారిని సానబట్టి అంతర్జాతీయ స్థాయికి తగ్గట్లుగా తీర్చిదిద్దడం.. ఇలా నడుస్తోంది వ్యవస్థ. అలాగే కొంచెం అనుభవం సంపాదించిన ఆటగాళ్లకు భారత్‌-ఎ జట్టులో చోటిస్తున్నారు. దాని బాధ్యతా ద్రవిడ్‌దే. ఇంతకుముందు టీనేజీలో మెరుపులు మెరిపించి.. ఆ తర్వాత సరైన దిశా నిర్దేశం లేక కుర్రాళ్లు గాడి తప్పేవారు. కానీ ఇప్పుడా పరిస్థితి లేదు. ఎందుకంటే.. అలాంటివారి కోసం ద్రవిడ్‌ ఉన్నాడు. ద్రవిడ్‌ కోచ్‌ అయ్యాక అండర్‌-19, భారత్‌-ఎ జట్ల ప్రాధాన్యం చాలా పెరిగింది. ఈ జట్ల కోసం బీసీసీఐ ఇంటా బయటా బోలెడన్ని సిరీస్‌లు పెడుతోంది. తరచుగా ఈ జట్లు విదేశీ పర్యటనలకు వెళ్తున్నాయి. విదేశీ జట్లు భారత్‌కు వచ్చి వీటితో సిరీస్‌ ఆడుతున్నాయి. భారత జట్టులోకే కాక ఐపీఎల్‌ ప్రవేశానికి కానీ ఈ జట్లు మంచి మార్గంలా నిలుస్తున్నాయి.

అండర్‌-19 ప్రపంచకప్‌లో భారత యువ జట్టు ప్రదర్శన నన్నెంతగానో ఆకట్టుకుంది. కుర్రాళ్లు ఇంత బాగా ఆడుతుండటానికి ద్రవిడే కారణం. యువ తరాన్ని తీర్చిదిద్దడంలో బీసీసీఐ ముందు చూపుతో వ్యవహరిస్తోంది. మా కుర్రాళ్లకూ అలాంటి నిబద్ధత ఉన్న కోచ్‌ కావాలి’’

-రమీజ్‌ రాజా, పాకిస్థాన్‌ మాజీ కెప్టెన్‌

అవి ఊరిస్తున్నా..

ద్రవిడ్‌.. ది గురు

బీసీసీఐ పరిధిలో ఏదైనా పదవిలో ఉన్న వ్యక్తులకు.. ఐపీఎల్‌తో ఎలాంటి భాగస్వామ్యం ఉండకూడదని లోధా కమిటీ స్పష్టం చేసిన నేపథ్యంలో గత ఏడాది చాలామంది బోర్డు పదవుల్ని వదులకుని ఆకర్షణీయమైన ఐపీఎల్‌ వైపే మొగ్గు చూపారు. ఐతే రాహుల్‌ ద్రవిడ్‌ మాత్రం తనను ఎవరూ వేలెత్తి చూపకముందే.. ఐపీఎల్‌ మెంటార్‌ పదవిని వదులుకున్నాడు. భారత అండర్‌-19, ఇండియా-ఎ జట్ల కోచ్‌గా కొనసాగడానికే నిర్ణయించుకున్నాడు. ఐపీఎల్‌ మెంటార్‌గా రెండు మూడు నెలలు పని చేస్తే చాలు. కోట్లు వస్తాయి. పేరూ వస్తుంది. కానీ ద్రవిడ్‌ ఆ తళుకులు వద్దనుకుని బీసీసీఐ కోచ్‌ పదవికే పరిమితమయ్యాడు. నిజానికి ద్రవిడ్‌ ఊ అనాలే కానీ.. టీమ్‌ఇండియా కోచ్‌ పదవి కూడా రెండేళ్ల కిందటే అతడి ఒళ్లో వాలేది. ఆ దిశగా ప్రయత్నాలు కూడా జరిగాయి. కానీ ద్రవిడ్‌ ఒప్పుకోలేదు. సీనియర్‌ జట్టు కోచ్‌ పదవి కంటే.. కుర్రాళ్లను తీర్చిదిద్దే సవాలునే అతను స్వీకరించాడు.

తిడుతుంటే ఊరుకోవద్దు..

ద్రవిడ్‌.. ది గురు

పోయినేడాది ఆరంభంలో ఇంగ్లాండ్‌ అండర్‌-19 జట్టు భారత పర్యటనకు వచ్చింది. ఐదు వన్డేల సిరీస్‌ తొలి మ్యాచ్‌లో ఆ జట్టే గెలిచింది. ఐతే ఆ మ్యాచ్‌లో ప్రత్యర్థి ఆటగాళ్లు మన కుర్రాళ్లను మాటలతో కవ్వించారు. మ్యాచ్‌ అనంతరం కూడా మనోళ్లను వెక్కిరిస్తూ సంబరాలు చేసుకున్నారు. ఐతే మన కుర్రాళ్లు ఏమీ స్పందించలేదు. మైదానంలో ఎప్పుడూ హద్దులు దాటొద్దని.. ఆట మీదే దృష్టిపెట్టమని ద్రవిడ్‌ మాటల్ని అనుసరిస్తూ కుర్రాళ్లు సంయమనం పాటించారు. నిజానికి ఆ మ్యాచ్‌లో భారత కుర్రాళ్లు ఆట మీద దృష్టిపెట్టే స్థితిలో లేరు. ముందు రోజు రాత్రి జట్టు ట్రైనర్‌ రాజేశ్‌ సావంత్‌ హఠాత్తుగా చనిపోయాడు. ఆ బాధలోనే మ్యాచ్‌ ఆడారు. ఐతే ఇంగ్లిష్‌ కుర్రాళ్ల తీరు బాధించి.. ఈ విషయాన్ని కోచ్‌ ద్రవిడ్‌కు చెప్పారు. ఐతే రాహుల్‌ తన శైలికి భిన్నంగా స్పందించాడు. ప్రత్యర్థులు తిడుతుంటే ఊరుకోవద్దని.. ఆటతోనే కాక, అవసరమైతే మాటలతో దీటుగా బదులివ్వమని.. కానీ అసభ్య పదజాలం మాత్రం వాడొద్దని చెప్పాడు. దీంతో కుర్రాళ్లు మైదానంలో దూకుడుగా వ్యవహరించారు. తర్వాతి మూడు మ్యాచ్‌ల్లోనూ భారత్‌దే విజయం. చివరి మ్యాచ్‌ టై అయింది. సిరీస్‌ 3-1తో భారత్‌ సొంతమైంది. ఇంగ్లిష్‌ జట్టు గర్వమణిగింది.

నేను భారత జట్టులోకి రావడం వెనుక ద్రవిడ్‌ ఘనత చాలా ఉంది. ద్రవిడ్‌ శిక్షణలో భారత్‌-ఎ జట్టు పర్యటనకు వెళ్లడం నా కెరీర్లో అత్యంత కీలకమైన విషయం. ద్రవిడ్‌ సలహాలు నన్ను మెరుగైన ఆటగాడిగా తీర్చిదిద్దాయి. ఇంగ్లాండ్‌తో నా తొలి టెస్టు ముందు రోజు కూడా ద్రవిడ్‌తో మాట్లాడా. నాలో ఒత్తిడి తగ్గించడంతో పాటు ఆత్మవిశ్వాసం నింపింది అతనే

- విహారి

వాల్‌ ఉనికే స్ఫూర్తి

ఆటగాడిగా ద్రవిడ్‌ ఘనతలు, అతడి నిబద్ధత గురించి అందరికీ తెలిసిందే. అతడి ఆట, వ్యక్తిత్వం మిగతా సహచరులకు, కుర్రాళ్లకు ప్రేరణగా నిలిచేవి. ఆటగాడిగానే అంత స్ఫూర్తినిచ్చిన రాహుల్‌.. కోచ్‌గా కుర్రాళ్లను ఎంత ప్రభావితం చేస్తాడో చెప్పేదేముంది? అతను కుర్రాళ్లకు శిక్షణ ఇచ్చే బాధ్యతను ఎంతో ఇష్టంతో చేపట్టాడు. ఆటగాడిగా 16 ఏళ్లు అంకితభావం చూపించిన రాహుల్‌.. ఇప్పుడు కోచ్‌గానూ అంతే నిబద్ధతతో పని చేస్తున్నాడు. ప్రచార ఆర్భాటానికి దూరంగా తన బాధ్యతల్ని నిర్వర్తిస్తున్నాడు. ఈ ఏడాది ఆరంభంలో అండర్‌-19 ప్రపంచకప్‌ గెలిచిన భారత కుర్రాళ్లలో కనిపించిన సమతూకం, పరిణతి చూసి చాలామంది ఆశ్చర్యపోయారు. అందులో ద్రవిడ్‌ పాత్ర ఉంది. రాహుల్‌ లాంటి దిగ్గజం ఉనికే కుర్రాళ్లకు కొండంత స్ఫూర్తినిస్తుంది. ఇక తన సుదీర్ఘ అనుభవంతో, ఆటపై తనకున్న అవగాహనతో అతడిచ్చే విలువైన సలహాలు, సూచనలు వారికి మరింతగా ఉపయోగపడుతున్నాయి. నిజానికి రాహుల్‌ తమ ఆటను పెద్దగా మార్చే ప్రయత్నం చేయడని, మానసికమైన విషయాల్లోనే ఎక్కువగా అతడి శిక్షణ ఉంటుందని అంటారు కుర్రాళ్లు. ఇప్పటి కుర్రాళ్లపై టీ20 ప్రభావం ఎలాంటిదో ప్రత్యేకంగా చెప్పాల్సిన పని లేదు. ఐతే కుర్రాళ్లు ఆ మాయలో పడి కొట్టుకుపోకుండా, టెక్నిక్‌ ప్రాధాన్యాన్ని వివరిస్తూ వారిని సరైన దారిలో నడిపిస్తున్నది ద్రవిడే. ఐతే ఇంత చేస్తున్నా.. కుర్రాళ్ల విజయాల తాలూకు ఘనత తీసుకోవడానికి ద్రవిడ్‌ ఇష్టపడడు. ఈ ఏడాది అండర్‌-19 ప్రపంచకప్‌ విజయానంతరం అందరూ తనను పొగుడుతుంటే.. ‘‘ఈ విజయంలో ఎక్కువ ఘనత, పేరు నాకే కట్టబెడుతుండటం దురదృష్టకరం. ఇది ఆటగాళ్లు, సహాయ సిబ్బంది ఘనత’’ అన్నాడతను. ద్రవిడ్‌ ఏంటో చెప్పడానికి ఇంతకంటే రుజువేం కావాలి?

- తిమ్మాపురం చంద్రశేఖర్‌రెడ్డి

భారీ స్కోర్లు చేయాలంటే, నిలకడగా రాణించాలంటే ఎలాంటి మానసిక స్థితి ఉండాలో ద్రవిడ్‌ సర్‌ చెప్పారు. నేనెప్పుడూ ఆయన సలహాల్ని పాటించేందుకు ప్రయత్నిస్తుంటా. నేను ఒక సందర్భంలో బ్యాక్‌ ఫుట్‌ ఆడేటపుడు నా టెక్నిక్‌ మార్చుకోవడానికి ప్రయత్నించి విఫలమయ్యా. అప్పుడు ద్రవిడ్‌ నా దగ్గరికి వచ్చి నాకెలా సౌకర్యంగా అలాగే కొనసాగమని.. టెక్నిక్‌ మార్చుకోవద్దని చెప్పాడు. ఆయన మాటను అనుసరిస్తున్నా

- పృథ్వీ షా

Tags :

sports star

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి