బూట్లు అరువు తెచ్చుకున్నవాడే..

స్పోర్ట్స్‌ స్టార్‌

నిరుపేద కుటుంబంలో పుట్టాడతను.. ఉండటానికి ఇల్లు లేదు.. సరైన సౌకర్యాలు లేవు.. కానీ అతనికి ‘వేగం’ అంటే ఇష్టం. రోడ్డు మీద కార్లు రయ్‌ రయ్‌మంటూ దూసుకెళ్తుంటే ఆసక్తిగా చూసేవాడు. తనకు రేసింగ్‌ చేయాలన్న కోరిక ఉన్నా. అది ఖరీదైన వ్యవహారం కావడంతో మిన్నకుండిపోయేవాడు. కానీ అతని నాన్న మాత్రం ఆ కుర్రాడి ఆలోచనలను గ్రహించి.. అతడి కలను నెరవేర్చడానికి శ్రమించాడు.. అప్పుడు అలాంటి స్థితిలో ఉన్న ఆ కుర్రాడే ఇప్పుడు ఫార్ములావన్‌ రేసింగ్‌ చరిత్రలోనే గొప్ప క్రీడాకారుల్లో ఒకడయ్యాడు. ఆ కుర్రాడి పేరు లూయిస్‌ హామిల్టన్‌.. ఐదుసార్లు ఫార్ములావన్‌ ప్రపంచ ఛాంపియన్‌!
ఫార్ములావన్‌ అనగానే ఠక్కున గుర్తొచ్చే పేరు షుమాకర్‌.. 91 రేసుల్లో విజయాలు.. ఏడు ప్రపంచ టైటిళ్లు.. ఇలా చెప్పుకుంటూ పోతే షుమాకర్‌ ఘనతలు ఎన్నెన్నో. అలాంటి దిగ్గజం దరిదాపుల్లోకి రావాలంటే ఎంత సత్తా ఉండాలి..? ఆ సత్తా హామిల్టన్‌లో ఉంది కాబట్టే ఇప్పుడు షుమాకర్‌ను మరిపిస్తున్నాడు. ఇటీవలే ఐదోసారి ఫార్ములావన్‌ ప్రపంచ టైటిల్‌ గెలిచి అరుదైన జాబితాలో చోటు సంపాదించాడు ఈ బ్రిటన్‌ వీరుడు. నిజానికి లూయిస్‌ ఈ స్థాయికి రావడం ఆశ్చర్యమే. ఎందుకంటే ఒకప్పుడు అతడి కుటుంబం తిండికి కూడా ఇబ్బందులు పడింది. లూయిస్‌ నాన్న ఆంటోనీ కుటుంబాన్ని పోషించడానికి మూడు ఉద్యోగాలు చేసేవాడు. రేసింగ్‌లోకి రావాలన్న తన కలను హామిల్టన్‌ పక్కన పెట్టినా అతను మాత్రం కొడుకు కెరీర్‌ అదే అని నిర్ణయించుకున్నాడు. అతడిని ముందుగా కార్టింగ్‌లోకి తెచ్చాడు. అక్కడ తన వేగంతో అందరి దృష్టినీ ఆకర్షించాడు లూయిస్‌. 1995లో 10 ఏళ్ల వయసులో బ్రిటిష్‌ ఫార్ములా క్యాడెట్‌ కార్టింగ్‌ ఛాంపియన్‌గా నిలిచి సత్తా చాటాడు. ఈ రేసులో పాల్గొనేందుకు బూట్లను, జాకెట్‌ను వేరే వాళ్ల నుంచి అరువు తెచ్చుకున్నాడు హమిల్టన్‌. అవార్డుల కార్యక్రమానికి వచ్చిన మెక్‌లారెన్‌ అధిపతి రాన్‌ డెన్నిస్‌ను హమిల్టన్‌ ఆకట్టుకున్నాడు. ‘‘ఏదో ఒక రోజు మీ సంస్థ తరఫున రేసులో పాల్గొంటా’’ అని డెన్నిస్‌తో హామిల్టన్‌ అన్నాడు. ‘‘తొమ్మిదేళ్ల తర్వాత నాకు ఫోన్‌ చెయ్యి.. ఒప్పందం చేసుకుందాం’’ అన్నాడు డెన్నిస్‌. కానీ మూడేళ్లలోనే గొప్ప రేసర్‌గా గుర్తింపు తెచ్చుకున్న హామిల్టన్‌.. మెక్‌లారెన్‌తో ఒప్పందం చేసుకున్నాడు. 2007లో మెక్‌లారెన్‌ తరఫున తొలిసారి ఫార్ములావన్‌ అరంగేట్రం చేసిన లూయిస్‌.. తర్వాత మెర్సీడెజ్‌కు మారి ట్రాక్‌లో దూసుకుపోతున్నాడు.

బూట్లు అరువు తెచ్చుకున్నవాడే..

ఏంటి ఇతని గొప్ప!
అరంగేట్రం తర్వాత హామిల్టన్‌ ఎక్కడా ఆగలేదు. ఇప్పటిదాకా 71 టైటిళ్లు ఖాతాలో వేసుకున్నాడు. ఐదోసారి ప్రపంచ ఛాంపియన్‌ కూడా అయ్యాడు. 2008లో తొలిసారి ప్రపంచ డ్రైవర్‌ ఛాంపియన్‌షిప్‌ గెలిచి.. ఈ ఘనత సాధించిన పిన్న వయస్కుడిగా (23 ఏళ్లు) లూయిస్‌ రికార్డు నెలకొల్పాడు. మెర్సిడెజ్‌కు మారిన తర్వాత 2014, 15 సంవత్సరాల్లో వరుసగా ప్రపంచ టైటిళ్లు ఖాతాలో వేసుకున్న హమిల్టన్‌...2017, 2018లో మరోసారి వరుసగా ఈ మెగా టైటిల్‌ గెలిచాడు. అయితే షుమాకర్‌ రికార్డు స్థాయిలో ఏడుసార్లు ప్రపంచ ఛాంపియన్‌ అయ్యాడు. షుమాకర్‌ రోజుల్లో అతనికి దీటుగా, నిలకడగా విజయాలు సాధించిన ప్రత్యర్థుల్లేరు. కానీ హమిల్టన్‌ తీవ్రమైన పోటీ ఎదుర్కొన్నాడు. చాలామంది రేసర్లు అతనికి గట్టిపోటీ ఇచ్చారు. ముఖ్యంగా వెటెల్‌ (51 టైటిళ్లు) లాంటి అగ్రశ్రేణి రేసర్లను ఢీకొట్టి గెలవడమంటే మాటలు కాదు. వెటెల్‌ నాలుగుసార్లు ప్రపంచ ఛాంపియనయ్యాడు. ఓ దశలో వెటెల్‌కు తిరుగులేదనుకున్నారు. అతడి ముందు హామిల్టన్‌ నిలవలేడన్నారు. కానీ మధ్యలో కొంచెం నెమ్మదించినా.. అతను మళ్లీ పుంజుకున్న లూయిస్‌ వెటెల్‌ను దాటిపోయాడు. త్వరలోనే షుమాకర్‌ సాధించిన ఏడు ప్రపంచ టైటిళ్ల రికార్డును లూయిస్‌ సమం చేసి, తర్వాత కొత్త రికార్డు తిరగరాయడం ఖాయమని ఎఫ్‌-1 విశ్లేషకులు చెబుతున్నారు. అయితే టైటిళ్లు కొట్టినంత మాత్రాన ఆల్‌టైమ్‌ గ్రేట్‌గా కీర్తిస్తారా అనేదే ఇప్పుడు నడుస్తున్న చర్చ. ఫార్ములావన్‌ పితామహుడిగా పేరొందిన జువాన్‌ ఫాంగియోతో పాటు షుమాకర్‌ అతనికి అడ్డుగా ఉన్నారు. ఎఫ్‌-1 రేసులకు ప్రాచుర్యం తెచ్చి.. ఐదుసార్లు ప్రపంచ టైటిళ్లు గెలిచిన వీరుడు ఫాంగియో. ఇక ఫార్ములావన్‌కే పర్యాయపదం షుమాకర్‌.. వీరిని దాటి ఆల్‌ టైమ్‌ గ్రేట్‌ అనిపించుకోవాలంటే హామిల్టన్‌ సాధించాల్సింది ఇంకా చాలా ఉంది.

Tags :