100లో ఒకడు - ONE IN HUNDRED

స్పోర్ట్స్‌ స్టార్‌

100లో ఒకడు

1988 సియోల్‌ ఒలింపిక్స్‌.. 100 మీ రేసు.. అతడి పరుగుకి ప్రపంచం నివ్వెరపోయింది.. స్టేడియంలో అభిమానులు ఆ వేగాన్ని నమ్మలేకపోయారు.. ప్రత్యర్థులు అతణ్ని అందుకోలేకపోయారు.. సెకన్లలో ప్రపంచ రికార్డు అతని పాదాక్రాంతమైంది! ప్రపంచ ట్రాక్‌ చరిత్రలోనే గొప్ప రేసుల్లో ఒకటిగా నిలిచిన ఆ పరుగులో విజేతగా నిలిచి ప్రకంపనలు సృష్టించిన ఆ అథ్లెటే బెన్‌ జాన్సన్‌.. కార్ల్‌ లూయిస్‌ లాంటి దిగ్గజ స్ప్రింటర్‌ బరిలో ఉన్నా అతణ్ని కాదని స్వర్ణ పతకం వేరే అథ్లెట్‌ మెడలో పడటాన్ని అభిమానులు అస్సలు ఊహించలేకపోయారు. కానీ అతడి మురిపెం కొన్ని రోజులే! అభిమానులకు షాకిస్తూ డోపింగ్‌లో పట్టుబడి స్వర్ణ పతకాన్ని, రికార్డునూ పోగొట్టుకున్నాడు జాన్సన్‌. రాత్రికి రాత్రే పెద్ద స్టార్‌గా మారిన ఈ కెనడా స్ప్రింటర్‌... ఉవ్వెత్తున ఎగసి చప్పున పడిపోయాడు.. అతడిపై మచ్చపడి 30 ఏళ్లు గడిచాయి.. ఇప్పుడు జాన్సన్‌ ఏం చేస్తున్నాడు.. ఒకప్పుడు మెరుపు వేగానికి చిరునామాగా మారిన అతను ఇప్పుడెలా ఉన్నాడు..?
1988.. 9.79 సెకన్లు.. బెన్‌ జాన్సన్‌ సంతకం ఇప్పటికీ ఇలాగే ఉంటుంది.. అంతేకాదు అతని ట్విటర్‌ ఖాతా హోమ్‌ పేజీలో బెన్‌ 9.79 అనే ఉంటుంది. అంతేకాదు అతని వెబ్‌సెట్‌ పేరు కూడా బెన్‌979.కామ్‌.. ఇవి చాలు ఆనాటి రికార్డుతో అతనెంత మమేకైపోయాడో.. అతని జీవితాన్ని ఆనాటి రేసు ఎంతగా ప్రభావితం చేసిందో చెప్పడానికి!. ఇప్పటికీ నమ్ముతాడు జాన్సన్‌ తాను నిర్దోషినని.. తాను కెరీర్‌లో డ్రగ్స్‌ వాడిన సంగతి నిజమేకానీ..ఆనాటి రేసులో, ఆ రికార్డులో డ్రగ్స్‌ పాత్ర ఏమాత్రం లేదనేది జాన్సన్‌ వాదన. తాను దోషినని తనపై ఇచ్చిన డోపింగ్‌ నివేదిక తప్పుల తడకగా ఉందని.. ఆ రోజు రేసును ఫిక్స్‌ చేసి తనను ఇరికించారని త్వరలోనే నిజం తేలుతుందని అంటున్నాడు జాన్సన్‌. తనపై నిషేధం విధించిన తర్వాత జాన్సన్‌ మళ్లీ పోటీపడలేదు. డోపింగ్‌లో పట్టుబడి తిరిగి ట్రాక్‌లోకి వచ్చి పతకాలు గెలిచిన గాట్లిన్‌ లాంటి వాళ్లు ఉన్నా.. జాన్సన్‌ మాత్రం ట్రాక్‌ ఎక్కలేదు. మరి ఏం చేశాడు..?
కోచ్‌గా మారి..
ట్రాక్‌లో పోటీపడకపోయినా.. పరోక్షంగా అథ్లెట్లను పరుగులు పెట్టించాడు జాన్సన్‌. డోపింగ్‌ వివాదం అనంతరం కొన్నాళ్లు కెనడాలో యువ అథ్లెట్లకు శిక్షణ ఇచ్చిన అతను.. ఆ తర్వాత లిబియా వెళ్లి గడాఫీ కుమారుడు అల్‌ సాదికి ఫిట్‌నెస్‌ కోచ్‌గా పని చేశాడు. ఆ తర్వాత జపాన్‌లో స్విమ్మర్లకు శిక్షణ ఇచ్చాడు. టొరంటోలో తన స్నేహితుడు డిగో మారడోనాతో కలిసి కూడా పని చేశాడు. 1998లో గుర్రం, రేసింగ్‌ కారుతో పోటీపడ్డాడు. ఈ రేసు గురించి అప్పట్లో ప్రముఖంగా చెప్పుకున్నారు. 2006లో చీతా పవర్‌ లాంటి టీవీ వాణిజ్య ప్రకటనల్లోనూ నటించాడు. జాన్సన్‌కు ఇప్పుడు ఒక్కటే ఒక్క కోరిక ఆ నాటి రేసులో తనపై పడిన మచ్చ తొలగాలని.. భవిష్యత్‌లో యువ అథ్లెట్లను తీర్చిదిద్దాలని! జమైకాలో పుట్టినా.. 15 ఏళ్లకే కెనడా వచ్చేసిన జాన్సన్‌.. ఇప్పుడు అదే జమైకాలో యువతరానికి కోచింగ్‌ ఇవ్వాలనే అభిలాషతో ఉన్నాడు. కెనడా వాడిని కావడంతోనే ఇన్నాళ్లూ తనపై వివక్ష చూపించారని.. అదే అమెరికా అథ్లెట్‌ అయి ఉంటే వేరేలా ఉండేదని అతనంటాడు. జాన్సన్‌ పట్టుబడిన ఆ రేసులోనే లూయిస్‌తో పాటు మరో నలుగురు కూడా డోపింగ్‌లో దొరికినట్లు మొదట నివేదికలు వచ్చాయి. కానీ ఆ తర్వాత వాళ్లను నిర్దోషులుగా తేల్చారు. జాన్సన్‌ను డోపీ అని తేల్చిన నివేదిక మీదా అనుమానాలున్నట్లు టొరంటో స్టార్‌ పత్రిక కథనం ప్రచురించింది. సియోల్‌ రక్త పరీక్ష కేంద్రం ఇచ్చిన ఈ నివేదికలో ఎన్నో దిద్దుబాట్లు ఉన్నాయని.. కొన్ని గణాంకాలు తీసేశారని.. అసలు జాన్సన్‌ ఏ మాదకద్రవ్యం వాడాడో అనే దాని మీదే గందరగోళం ఉండటంతో.. డోపింగ్‌పై అనుమానం కలుగుతోందని ఆ పత్రిక చెబుతోంది.
‘‘క్రీడలో రాజకీయాలు ఉండడం దురదృష్టకరం. ఆరోజు సియోల్‌లో నాపై డోపింగ్‌ నేరం మోపి పతకం వెనక్కి తీసుకున్నందుకు ఇప్పుడేమి బాధపడట్లేదు. 30 ఏళ్లు గడిపోయాయి. కానీ ఒకటే బాధ. చేయని నేరానికి నన్ను బలి చేశారని! అమెరికా అథ్లెట్లకు పతకం దక్కాలనే ఈ కుట్ర చేశారని అనుకుంటున్నా. ఒక్క మాటలో చెప్పాలంటే ఆ రేసు ముందుగానే ఫిక్స్‌ అయింది. నాకూ గాట్లిన్‌కు ఉన్న తేడా అతను అమెరికా అథ్లెట్‌ కావడం. అమెరికా వాళ్లు అథ్లెట్లను చాలా జాగ్రత్తగా కాపాడుకుంటారు అందుకే అతను ఇంకా పోటీపడుతున్నాడు. నాపై పడిన మచ్చ చెరిగిపోవాలని 30 ఏళ్లు ఎదురు చూశాను. త్వరలోనే అధికారికంగా ప్రకటన రానుంది. నిజంగా నా పతకం మళ్లీ తిరిగొస్తే దాన్ని వేలం వేసి ఆ వచ్చిన డబ్బుతో జమైకాలో ట్రాక్‌ నిర్మించి చిన్నారులకు శిక్షణ ఇస్తా’’
- బెన్‌ జాన్సన్‌

Tags :

ONE IN HUNDRED

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి