కసితో నాస్తి దుర్భిక్షం

స్పోర్ట్స్‌ స్టార్‌

రెక్కాడితే కానీ డొక్కాడని నిరుపేద కుటుంబం.. అయిదేళ్ల వయసులోనే ప్రమాదంలో కుడిచేతిని కోల్పోయాడు... ఆటకెళ్తే చెయ్యి లేని వాడని పక్కన కూర్చోపెట్టేవారు.. ఆరుబయట సాగే సరదా ఆటల్లోనే స్థానంలేని ఆ యువకుడు నేడు అంతర్జాతీయ స్థాయిలో తన ప్రతిభ చాటేందుకు సిద్ధమయ్యాడు. తన బలహీనతనే బలంగా మార్చుకొని భారత దివ్యాంగ క్రికెట్‌ జట్టుకు ఎంపికయ్యాడు.

కసితో నాస్తి దుర్భిక్షం

ధీరావత్‌ మహేష్‌ది మేడ్చల్‌ జిల్లా షామీర్‌పేటలోని లింగాపూర్‌ తండా గ్రామం. మహేష్‌ది నిరుపేద గిరిజన కుటుంబం. తల్లి బుజ్జి కట్టెలు కొడుతుంది, తండ్రి రాంచందర్‌ మేకలు కాస్తాడు. వారికి ముగ్గురు సంతానం. పెద్దవాడైన మహేష్‌ అయిదేళ్ల వయస్సులో ప్రమాదంలో చేతిని కోల్పోయాడు.
మహేష్‌కు చిన్నప్పటి నుంచీ క్రికెట్‌ అంటే చాలా ఇష్టం. మూడుచింతల గ్రామంలోని పాఠశాలలో చదివేటప్పుడు మహేష్‌ క్రికెట్‌ మీదే ఎక్కువ ఆసక్తి చూపేవాడు. కానీ చెయ్యి లేని వాడని తోటి పిల్లలే ఆడనిచ్చేవారు కాదు. ‘నీకెందుకురా ఆటలు, ఏదో పని చేసుకోక’ అనే వారు. అందుకు మహేష్‌ కుంగిపోలేదు. మరింత పట్టుదలతో, కసితో కృషి చేశాడు. కొందరు స్నేహితుల సాయంతో నిరంతరం శ్రమించి క్రికెట్లో మంచి నైపుణ్యం సంపాదించాడు. చెయ్యి లేకుండానే ఎన్నో క్రికెట్‌ టోర్నీల్లో సాధారణ ఆటగాళ్లతో పోటీ పడ్డాడు. ఆల్‌ రౌండర్‌ అయిన మహేష్‌ బ్యాటింగ్‌లో సత్తా చూపేవాడు. ఒంటి చేత్తో బౌండరీలు సాధించేవాడు. సాధారణ క్రికెటర్లతో ఆడిన మ్యాచ్‌ల్లోనూ ‘మ్యాన్‌ ఆఫ్‌ ద మ్యాచ్‌’ అవార్డులు అందుకున్నాడు.
దివ్యాంగుల క్రికెట్లో..
దివ్యాంగులకు ప్రత్యేకంగా నిర్వహించే క్రికెట్‌ పోటీల్లో పాల్గొనేందుకు 2010నుంచి మహేష్‌ ప్రయత్నాలు మొదలు పెట్టాడు. బోర్డ్‌ ఆఫ్‌ డిజేబుల్డ్‌ క్రికెట్‌ అసోసియేషన్‌ (బీడీసీఏ) తరఫున రంగారెడ్డి జిల్లాకు ఆడేందుకు 2013లో ఎంపికయ్యాడు. 2015లో తెలంగాణ క్రికెట్‌ జట్టుకు ఎంపికయ్యాడు. 2018 నుంచి బీడీసీఏ జాతీయ స్థాయి మ్యాచ్‌లు నిర్వహించడం మొదలుపెట్టింది. వచ్చిన ఏ అవకాశాన్నీ చేజార్చుకోని మహేష్‌ ప్రతిసారీ ప్రతిభ చూపించాడు. అక్టోబరులో బీడీసీఏ నిర్వహించిన సెలక్షన్స్‌లో సత్తా చాటి జాతీయ జట్టుకు ఎంపికయ్యాడు. 2019 ఫిబ్రవరిలో దివ్యాంగుల టీ20 ప్రపంచకప్‌కు మహేష్‌ సన్నద్ధమవుతున్నాడు. ఇరవై ఐదేళ్ల మహేష్‌ ఇంటర్‌ వరకు చదువుకున్నాడు. ప్రస్తుతం ఓ ప్రైవేటు కంపెనీలో ఉద్యోగం చేస్తున్నాడు. సాధారణ క్రికెటర్లకు తామేమీ తీసిపోమని, వారిని ఆదరించినట్లుగానే దివ్యాంగ క్రికెటర్లనూ ఆదరించాలని క్రికెట్‌ అభిమానులను కోరుతున్నాడు మహేష్‌.

- ముత్తోజు సాయిప్రసాద్‌, ఈనాడు జర్నలిజం స్కూలు.

Tags :