close

వార్తలు / కథనాలు

‘కునొ’.. గిర్‌ సింహాలకు రెండో ఇల్లు?

ఆసియాటిక్‌ సింహం.. గుజరాత్‌లోని గిర్‌ ప్రాంతానికే పరిమితమైన ఈ సింహాలు త్వరలోనే మధ్యప్రదేశ్‌లోని షయోపూర్‌ జిల్లా కునొ అభయారణ్యంలో దర్శనమివ్వనున్నాయి. ఈ మేరకు కునొ అభయారణ్యాన్ని తీర్చిదిద్దుతున్నారు..ఆసియాటిక్‌ సింహాలుగా ప్రఖ్యాతి చెందిన ఈ సింహాలు గుజరాత్‌లోని గిర్‌ అటవీప్రాంతంలో ఉన్నాయి. ఇక్కడ తప్ప ప్రపంచంలో ఎక్కడా దీని ఉనికి లేకపోవడంతో గిర్‌ ప్రత్యేకత సంతరించుకుంది. కథియావాడ్‌ ద్వీపకల్పంలో ఉన్న గిర్‌లో ఆసియాటిక్‌ జాతికి చెందిన కొన్ని సింహాలను ఇతర చోట్లకు తరలించాలని వన్యప్రాణి నిపుణుల కమిటీ సూచించింది. అయితే గుజరాత్‌ సర్కార్‌ ఈ ప్రతిపాదనను అంగీకరించడం లేదు.

మన దగ్గరే ఉన్నాయి..

గిర్‌లోని  జాతీయ అభయారణ్యంలో ఆసియాటిక్‌ సింహాలు దాదాపు 600 వరకు ఉన్నాయి.  19వ శతాబ్ధం వరకు ఇవి సౌదీ అరేబియా, ఇరాన్‌, ఇరాక్‌, మన దేశంలోని నర్మదా నదీ పరివాహకప్రాంతాల్లో విరివిగా కనిపించేవి. అనంతరం వీటిని వేటగాళ్లు చంపివేయడంతో ఇవి అంతరించేదశకు చేరుకున్నాయి. చివరకు మన దేశంలోని గుజరాత్‌లోని గిర్‌ అభయారణ్యానికే పరిమితమయ్యాయి. అటవీ  అధికారులతో పాటు సమీప గ్రామాల ప్రజలు, కేంద్ర, రాష్ట్ర ప్రభుత్వాలు వీటి సంరక్షణకు పలు చర్యలు తీసుకోవడంతో గిర్‌లో వీటి సంఖ్య పెరిగింది. ప్రపంచంలో అన్ని చోట్లా ఈ సింహాలు అంతరించిపోయినా గిర్‌లో మాత్రం ఉండటం విశేషం. ఇక్కడి వాతావరణం, ఆహారం, అటవీప్రాంత విస్తీర్ణం.. ఆసియాటిక్‌ సింహాల జనాభా పెరుగుదలకు దోహదం చేశాయి. ఇవి ఆఫ్రికా సింహాల కంటే తక్కువగా బరువు ఉంటాయి.  జింకలు, పశువులు వీటి ఆహారం.

కునొను ఎందుకు ఎంచుకున్నారు..
ఇవి ప్రపంచంలోనే అరుదైన సింహాలు కావడంతో వీటి పరిరక్షణకు పలు చర్యలు తీసుకుంటున్నారు. అయితే 2018లో వచ్చిన వ్యాధి కారణంగా దాదాపు 20 సింహాల వరకు మృత్యువాత పడ్డాయి. ఒకే ప్రాంతంలో నివసించే సింహాలకు ఏదైనా అంటువ్యాధి వస్తే వాటి ఉనికికే ప్రమాదమయ్యే అవకాశముంది. దీంతో వన్యప్రాణి నిపుణుల కమిటీ  కొన్ని సింహాలను మధ్యప్రదేశ్‌లోని షయోపూర్‌ జిల్లాలోని కునొ అభయరణ్యానికి తరలించాలని సూచించింది. ఈ మేరకు కునొలో ఉన్న కొన్ని గ్రామాలను బయటకు తరలించారు. ఈ ప్రాంతం గిర్‌లాగే ఉండటంతో ఇక్కడ సింహాలు జీవించేందుకు ఎలాంటి అడ్డంకులు ఉండవని మధ్యప్రదేశ్‌ ప్రభుత్వం హామీ ఇస్తోంది. అభయారణ్యంలో కునొ నది ప్రవహిస్తుండటంతో సింహాలకు దప్పిక సమస్య కూడా ఉండదని మధ్యప్రదేశ్‌ అటవీశాఖ వర్గాలు తెలిపాయి. కునొకు రెండు మగ, నాలుగు  సింహాలను తరలిస్తే 30 ఏళ్లలో వీటి జనాభా 80కు చేరే అవకాశముంది.

అంగీకరించని గుజరాత్‌..
అయితే గిర్‌ ప్రాంతంలోని సింహాలలో కొన్నింటిని కునొకు తరలించేందుకు గుజరాత్‌ అంగీకరించడం లేదు మధ్యప్రదేశ్‌లో గతంలో పులుల వేటను అడ్డుకోలేకపోయారని మరి అరుదైన సింహాల అంశంలోనూ ఇలాంటి సవాల్‌ ఎదురైతే వాటి జీవితాలకు ఎవరు భరోసా అని ప్రశ్నిస్తోంది. 1957లో ఉత్తర్‌ప్రదేశ్‌లోని చంద్రప్రభ వన్యప్రాణి సంరక్షణకేంద్రానికి ఒక మగ, రెండు ఆడ గిర్‌ సింహాలను తరలించారు. అయితే 1965 తరువాత వాటి జాడ తెలియరాలేదు. ఇలాంటి అంశాలను గుజరాత్‌ ఉదహరిస్తోంది. దీంతో రెండు రాష్ట్రాల మధ్య నలుగుతున్న సమస్య పరిష్కారానికి వన్యప్రాణి నిపుణుల కమిటీ కృషిచేస్తోంది. వీరి కృషి ఫలిస్తే త్వరలోనే కునొలో ఆసియాటిక్‌ మృగరాజుల గర్జనలు వినవచ్చు..

మరిన్ని విశేషాలు..

* ఆసియాటిక్‌ సింహాలు సమూహాలుగా నివసిస్తాయి.

* వీటి గర్జన దాదాపు 5 కి.మీ.వరకు వినిపిస్తుంది.

* ఇవి అంతరించిపోయే దశలో ఉండటంతో వీటి పరిరక్షణకు గుజరాత్‌ ప్రభుత్వం అనేక చర్యలు చేపట్టింది.

* ఆఫ్రికా సింహాల నుంచి లక్ష సంవత్సరాలకు పూర్వమే ఆసియాటిక్‌ సింహాలు వేరుపడ్డాయి.

- ఇంటర్నెట్‌డెస్క్‌ ప్రత్యేకం


Tags :

మరిన్ని