Breaking | Feedback | ePratibha | E-PAPER | Pratibha

News in pics : చిత్రం చెప్పే విశేషాలు (19-05-2024)

నిత్యం మన చుట్టూ ఎన్నో సంఘటనలు జరుగుతూ ఉంటాయి. అందులోని కొన్ని ఆసక్తికరమైనవి మీకోసం..

Updated : 19 May 2024 10:20 IST

1/20

ఆధునిక ప్రపంచంలో ఆలోచనలూ మారాయి. కృష్ణా జిల్లా పమిడిముక్కలలో తాటి చెట్టు ఎక్కలేక జేసీబీని తీసుకొచ్చి.. దానికి ఊయల కట్టి అందులో కూర్చొని ఓ యువకుడు తాటికాయలు కోస్తున్న దృశ్యం ‘న్యూస్‌టుడే’ కెమెరాకు చిక్కింది.

2/20

అమ్మో బాపు గారి బొమ్మో... ఓలమ్మో మల్లెపూల కొమ్మో... అని యువత మదిలో గిలిగింతలు రేపిన... ప్రముఖ నటి ప్రణీత విజయవాడలో సందడి చేసింది. ఓ ప్రైవేటు కార్యక్రమంలో పాల్గొనేందుకు వచ్చిన ఆమె చిరునవ్వులతో.. చూపరులను కట్టిపడేసింది.

3/20

వరంగల్‌ జిల్లా ఖానాపురం శివారులోని పాత వంతెన సమీపంలోని మిషన్‌ భగీరథ పైపులైన్‌ పగిలిపోవడంతో నీరు ఉవ్వెత్తున పైకి లేచింది. ఆకాశాన్ని తాకుతున్నట్లుగా తెల్లని నురగలతో ఉప్పొంగడంతో స్థానిక యువకులు స్వీయ చిత్రాలు తీసుకుంటూ సందడి చేశారు.

4/20

అందాల తార రాశీఖన్నా హైదరాబాద్‌ నగరంలో సందడి చేసింది. బంజారాహిల్స్‌లోని ఓ నగల దుకాణానికి విచ్చేసిన ఆమె విభిన్న రకాల డిజైన్ల ఆభరణాలను ధరించి హొయలు పోయింది.

5/20

ఒడిశాలోని పర్లాఖెముండి పట్టణంలోని గజపతి క్రీడామైదానం ప్రాంతంలో గల దామోదర్‌ బిహార్‌ కాలనీలో నివసిస్తున్న సిగ్మా మిశ్రా ఇంట్లో మే పుష్పం వికసించింది. కాలనీవాసులు ప్రజలు వాటిని చూసేందుకు ఆసక్తి కనబరిచారు.

6/20

మదురై జిల్లా తిరుమంగళం సమీపం పెరుమాళ్‌ కోవిల్పట్టి గ్రామంలోని కరుంపారై ముత్తయ్య ఆలయంలో పురుషులు మాత్రమే పాల్గొనే తిరునాల వైభవంగా జరిగింది. ఈ సందర్భంగా స్వామివారికి పొంగలి నైవేద్యంగా పెట్టి ఆరాధించారు.

7/20

వేసవి శిక్షణ శిబిరాల్లో చిన్నారులు ఆటల్లో ఆరితేరారు. ప్రస్తుతం ఐపీఎల్‌ సీజన్‌ కొనసాగుతుండటంతో చిన్నారులు క్రికెట్‌ శిక్షణపై మక్కువ చూపుతున్నారు. హైదరాబాద్‌లోని సరూర్‌నగర్‌ స్టేడియంలో బ్యాటింగ్‌లో శిక్షణ తీసుకుంటూ కనిపించారిలా..

8/20

కాళేశ్వరం పథకంలో భాగంగా పెద్దపల్లి జిల్లా మంథని మండలం సిరిపురం వద్ద నిర్మించిన పార్వతి(సుందిళ్ల) బ్యారేజీ నుంచి నీటిని దిగువన గోదావరిలోకి వదలడంతో జలాశయం వెలవెలబోతోంది. ప్రస్తుతం ఇసుక, మట్టిదిబ్బలతో దర్శనమిస్తోంది.

9/20

మల్కాజిగిరి, తూర్పుఆనంద్‌బాగ్‌ డివిజన్ల పరిధిలో వర్షం కురిసింది. కాలనీల్లోని రహదారులు జలమయం అయ్యాయి. కార్యాలయాల నుంచి ఇళ్లకు వెళ్లేవారు వానలో తడిసిపోయారు. రహదారి పక్కన చిరువ్యాపారులకు రక్షణ లేక ఇబ్బందిపడ్డారు.

10/20

చుట్టూ ట్యాంక్‌బండ్‌.. మధ్యన జలాశయంలో బోటింగ్‌.. పైన తీగల వంతెనపై విహారం.. వెరసి ఖమ్మంలోని లకారం చెరువు పర్యాటకులకు ఉల్లాసాన్ని.. ఆహ్లాదాన్ని పంచుతోంది.

11/20

మెదక్‌: పట్టణంలో శనివారం వాసవీ కన్యకా పరమేశ్వరి జయంతి వేడుకలను ఘనంగా నిర్వహించారు. అమ్మవారి పల్లకీ ఊరేగింపులో కేరళ నృత్య కళాకారిణులు ఆటపాటలతో అలరించారు.

12/20

సిద్దిపేట అర్బన్‌ మండలం ఎన్సాన్‌పల్లిలో తల్లిదండ్రులు తాము పొలంలో పనులు చేస్తూనే వాటిని ఎలా చేయాలో పిల్లలకు నేర్పిస్తున్నారు. ఒకరు నాగలి పట్టి దున్నడం.. మరో ఇద్దరు కలుపు తీస్తూ కనిపించారిలా..

13/20

విశాఖపట్నం: పాండురంగాపురంలో ఒకరు తన ఆటోను ఇలా పచ్చదనంతో చూడచక్కగా మార్చారు. ఆటో చుట్టూ, పైన పచ్చదనం నిండేలా ప్రత్యేక మ్యాట్‌ కుట్టించారు. సాధారణ ఆటోలకన్నా భిన్నంగా..ప్రయాణికులను ఆకర్షించేలా ఉంది కదూ ఈ ఆటో.

14/20

హైదరాబాద్‌: సాత్విక స్కూల్‌ ఆఫ్‌ భరతనాట్యం, కర్ణాటిక్‌ మ్యూజిక్‌ (హైదరాబాద్‌) ఆధ్వర్యంలో శనివారం రవీంద్రభారతిలో సాంస్కృతికోత్సవం నిర్వహించారు. నాట్యగురువులు కమలా నేమాని, డా.ఎస్‌.ఎస్‌ సత్యల శిష్యులు భరతనాట్యంలో విభిన్న అంశాలను ప్రదర్శించి మెప్పించారు.

15/20

అనంతపురం: సత్యసాయి జీవిత ఘట్టాలను చిన్నారులు నృత్యరూపంలో కళ్లకు కట్టినట్లు ప్రదర్శించారు. సాయికుల్వంత్‌ మందిరంలో చైన్నె బాలవికాస్‌ చిన్నారులు ‘సత్యసాయి లీలామృతం’’ నృత్య నాటికను అద్భుతంగా ప్రదిర్శంచారు.

16/20

అనంతపురం: పట్టాలపై నడవాల్సిన రైలు బండి రోడ్డుపై వెళ్తూ చూపరులను ఆకట్టుకుంది. శనివారం బెంగళూరు నుంచి హైదరాబాద్‌కు వెళ్తూ రాప్తాడు మండలం రామినేపల్లి వద్ద రోడ్డుపై వెళ్తోన్న టైర్ల రైలును వాహనదారులు ఆసక్తిగా గమనించారు.

17/20

హైదరాబాద్‌: బోడుప్పల్‌ పెంటారెడ్డికాలనీలోని మాతా నిమిషాంబికాదేవి అమ్మవారి అవతరణ వేడుక శనివారం ఆలయంలో వైభవంగా నిర్వహించారు.అమ్మవారిని బంగారుతాపడంతో రజిత చీర, కిరీటం, హస్తాలు అలంకరించారు.

18/20

అనంతపురం జిల్లాలోని పలు ఆలయాల్లో శనివారం వాసవీమాత జయంతి ఉత్సవాన్ని భక్తిశ్రద్ధలతో నిర్వహించారు. ధర్మవరంలోని కన్యకాపరమేశ్వరి ఆలయంలో బంగారు చీరతో వాసవీమాతను కొలువుదీర్చారు.

19/20

విశాఖపట్నం: అల్లు అర్జున్‌ హీరోగా సుకుమార్‌ దర్శకత్వం వహిస్తున్న పుష్ప-2 సినిమాను శనివారం రంపచోడవరం మార్కెట్‌లో చిత్రీకరించారు. పెద్దఎత్తున చుట్టుపక్కల వారు రావడంతో సందడి నెలకొంది.

20/20

నిజామాబాద్‌ గ్రామీణ మండలంలోని ఆకుల కొండూర్‌ శివారులో తీసిన చిత్రమిది. వాగుపై చెక్‌డ్యామ్‌ నిర్మించారు. ప్రస్తుతం వాగులో నీరు కనబడకుండా మొత్తం గుర్రపుడెక్కతో నిండిపోయింది.

Tags :