పోలవరం-బనకచర్ల డీపీఆర్‌ తయారీకి నోటిఫికేషన్‌

ఈనాడు, అమరావతి: పోలవరం-బనకచర్ల అనుసంధానం ప్రాజెక్టుకు సంబంధించి డీపీఆర్‌ తయారు చేసేందుకు కన్సల్టెన్సీ నియామకం కోసం జలవనరులశాఖ టెండర్లు ఆహ్వానించింది. కేంద్ర జలసంఘం మార్గదర్శకాల ప్రకారం పూర్తి స్థాయి నివేదికను సిద్ధం చేయాల్సి ఉంటుంది. దీంతో పాటు కేంద్ర ప్రభుత్వ సంస్థల నుంచి ఈ ప్రాజెక్టుకు అవసరమైన అనుమతులు తీసుకురావాల్సిన బాధ్యత కూడా ఆ కన్సల్టెన్సీకే అప్పచెబుతారు. ఈ అంశంలో అనుభవజ్ఞులైన కన్సల్టెన్సీని నియమించేందుకు పని విలువను రూ.9.20 కోట్లుగా పేర్కొంటూ టెండర్లు పిలిచారు. ఈ నెల 8 నుంచి అక్టోబరు 22 వరకు బిడ్‌లో పాల్గొనేందుకు వీలుగా టెండర్లు దాఖలు చేయవచ్చు.