దక్షిణ కోస్తా, సీమలపై భారీ ప్రభావం

ఈనాడు, అమరావతి: మొంథా తుపాను ప్రభావంతో మంగళవారం నెల్లూరు, తిరుపతి, ప్రకాశం, బాపట్ల, పల్నాడు జిల్లాల్లో అధికంగా వర్షాలు పడే అవకాశం ఉందని హైదరాబాద్‌కు చెందిన స్టార్టప్‌ సంస్థ ఫ్లడ్‌గార్డ్‌ డైరెక్టర్‌ ధన్య తెలిపారు. ‘తుపాను వేగంగా కదులుతోంది. మంగళవారం అర్ధరాత్రికి కాకినాడ సమీపంలో తీరం దాటుతుంది. దక్షిణ కోస్తా, ఆ పక్కనే ఉండే రాయలసీమ జిల్లాలపై అధిక ప్రభావం ఉంటుంది’ అని ఆమె వివరించారు. ‘నంద్యాల, ప్రకాశం, శ్రీపొట్టి శ్రీరాములు జిల్లాల్లో అతి భారీ వర్షాలు కురుస్తాయి. 150 మి.మీ. నుంచి 200 మి.మీ. వర్షపాతం నమోదయ్యే అవకాశం ఉంది. బాపట్ల, కర్నూలు, తిరుపతి, వైఎస్సార్‌ కడప జిల్లాల్లో 80 మి.మీ నుంచి 150 మి.మీ. వరకు నమోదు కావచ్చు. మిగిలిన కోస్తా జిల్లాల్లో 40 మి.మీ. నుంచి 80 మి.మీ. వరకు వర్షం కురిసే అవకాశం ఉంది. గాలుల ప్రభావం అధికంగా ఉంటుంది’ అని వివరించారు.