జోగి పాత్ర తేలడంతోనే అరెస్టు: ఎక్సైజ్‌ మంత్రి రవీంద్ర

భోగాపురంలో మహిళా రైతులతో మాట్లాడుతున్న మంత్రి కొల్లు రవీంద్ర. చిత్రంలో ఎమ్మెల్యే రాజు

చోడవరం, న్యూస్‌టుడే: నకిలీ మద్యం కేసులో జోగి రమేష్‌ పాత్ర ఉన్నట్లు విచారణలో తేలడంతో అరెస్టయ్యారని ఎక్సైజ్‌ శాఖ మంత్రి కొల్లు రవీంద్ర తెలిపారు. ఆదివారం అనకాపల్లి జిల్లా చోడవరం మండలంలోని భోగాపురం, రాయపురాజుపేట గ్రామాల్లో ఎమ్మెల్యే కె.ఎస్‌.ఎన్‌.ఎస్‌.రాజుతో కలిసి తుపాను ప్రభావిత ప్రాంతాలను పరిశీలించారు. మహిళా రైతుల ఇబ్బందులను తెలుసుకున్నారు. అనంతరం మంత్రి విలేకర్లతో మాట్లాడుతూ.. ‘నకిలీ మద్యం కేసులో అనుమానాలు సృష్టించి కూటమి ప్రభుత్వాన్ని అప్రతిష్ఠ పాల్జేయాలని జరుగుతున్న కుట్ర బహిర్గతమైంది. జనార్దన్‌రావు విదేశీ పర్యటనకు వెళ్లేటప్పుడు రమేష్‌ కలిసినట్లు పక్కా సమాచారం ఉంది. ఇదంతా చేసేందుకు రూ.3 కోట్లు ఇచ్చేందుకు సమ్మతించినట్లు విచారణలో తేలింది’ అని వివరించారు.