పాము కాటుకు పాములు పట్టే వ్యక్తి మృతి

మల్యాల, న్యూస్‌టుడే: పాములు పట్టే వ్యక్తి పాముకాటుతోనే మృతిచెందిన ఘటన జగిత్యాల జిల్లా మల్యాలలో చోటుచేసుకుంది. పోలీసుల వివరాల ప్రకారం... స్థానిక బీసీ కాలనీకి చెందిన ఎడపల్లి రాములు(55) పాములు పడుతూ జీవనం సాగిస్తున్నారు. పది రోజుల క్రితం గ్రామంలోని ఓ ఇంట్లో పట్టిన పామును సంచిలో వేసుకొని తన ఇంటికి తీసుకొచ్చారు. బయట వదిలిపెట్టడానికి తీసుకెళ్లే క్రమంలో రాములు కుడి చేతి మధ్య వేలిపై పాము కాటు వేసింది. వెంటనే ఆయన్ని జగిత్యాల ప్రభుత్వ ఆసుపత్రికి తరలించారు. పరిస్థితి విషమించడంతో వరంగల్‌ ఎంజీఎంకు తీసుకెళ్లగా... చికిత్స పొందుతూ శుక్రవారం మృతి చెందారు.