డ్రగ్స్‌తో పట్టుబడిన వైకాపా విద్యార్థి సంఘం నేత

విశాఖపట్నం (పెదవాల్తేరు), న్యూస్‌టుడే: విశాఖలో వైకాపా విద్యార్థి విభాగం నేత డ్రగ్స్‌ తరలిస్తూ పట్టుబడ్డారు. తమకు అందిన సమాచారంతో విశాఖలోని టాస్క్‌ఫోర్స్, నాలుగో పట్టణ పోలీసులు సంయుక్తంగా ఆదివారం దాడులు నిర్వహించారు. రైల్వేస్టేషన్‌కు సమీప శ్రీనివాస కల్యాణ మండపం వద్ద ఐదుగురు వ్యక్తులు ఎల్‌.ఎస్‌.డి. స్ట్రిప్స్‌ నగరానికి తరలిస్తున్నారనే సమాచారంతో దాడులు చేపట్టి వారినుంచి 48 స్ట్రిప్స్‌ స్వాధీనం చేసుకున్నారు. వాటి విలువ సుమారు రూ.50 వేల వరకు ఉంటుందని టాస్క్‌ఫోర్స్‌ సీఐ భాస్కరరావు తెలిపారు. డ్రగ్స్‌ తరలిస్తున్న వారిలో వైకాపా విద్యార్థి విభాగం నేత మద్దిలపాలేనికి చెందిన కొండారెడ్డి ఉన్నారు. ఆయనతో పాటు విజయవాడకు చెందిన చరణ్, శ్రీకాకుళానికి చెందిన హర్షవర్ధన్, శరత్‌లను అదుపులోకి తీసుకున్నారు. హైదరాబాద్‌కు చెందిన మరో వ్యక్తి సంతానం పరారీలో ఉన్నట్లు పోలీసులు పేర్కొన్నారు. వీరంతా దురంతో ఎక్స్‌ప్రెస్‌లో బెంగళూరు నుంచి వాటిని విశాఖ తరలించినట్లు గుర్తించారు. పట్టుబడిన వారిని నాలుగో పట్టణ పోలీసుస్టేషన్‌కు అప్పగించారు.