గుంటూరులో బయటపడ్డ కుళ్లిన మాంసం

తనిఖీల్లో 40 కేజీల పట్టివేత

నాణ్యత లేని మాంసాన్ని బయటకు తీయిస్తున్న ప్రకాష్‌నాయుడు తదితరులు

గుంటూరు (నగరపాలకసంస్థ), న్యూస్‌టుడే: గుంటూరులో కుళ్లిన, నిల్వ ఉంచిన మాంసం భారీగా బయటపడింది. నగరంలోని పొన్నూరు రోడ్డు, నందివెలుగు రోడ్డు, డొంక రోడ్డు, అమరావతి రోడ్డు, పాతమటన్‌ మార్కెట్‌ తదితర ప్రాంతాల్లోని మాంసం విక్రయ దుకాణాల్లో మాంసం అభివృద్ధి కార్పొరేషన్‌ ఛైర్మన్‌ ప్రకాశ్‌నాయుడు, జీఎంసీ ప్రజారోగ్య విభాగం అధికారులు ఆదివారం ఆకస్మికంగా తనిఖీలు చేశారు. 6 దుకాణాల్లో ఫ్రిజ్‌లలో నిల్వ ఉంచిన, కుళ్లిన 40 కేజీల మాంసం పట్టుబడింది. ఈ సందర్భంగా విక్రయదారులపై ప్రకాశ్‌నాయుడు ఆగ్రహం వ్యక్తం చేశారు. నాణ్యత లోపించిన మాంసం విక్రయాలు చేసేవారిపై కఠిన చర్యలు తీసుకుంటామని హెచ్చరించారు. ప్రజారోగ్య విభాగం అధికారులు నిరంతరం తనిఖీలు చేసి, మాంసం నాణ్యతపై రాజీలేకుండా చర్యలు తీసుకోవాలని ఆదేశించారు. కార్యక్రమంలో మాంసం అభివృద్ధి కార్పొరేషన్‌ డైరెక్టర్‌ ప్రవీణ, మీట్‌ కార్పొరేషన్‌ ఎండీ సుబ్బరత్నమ్మ, అధికారులు పాల్గొన్నారు.