నకిలీ మద్యం కేసులో మరో నలుగురు నిందితులు

ఈనాడు, అమరావతి: నకిలీ మద్యం కేసులో దర్యాప్తులో పలువురి పాత్రపై ఆధారాలు వెలుగులోకి వస్తున్నాయి. దీంతో నిందితుల జాబితా పెరుగుతోంది. ప్రస్తుతం నిందితుల సంఖ్య 23కు చేరింది. వీరిని విచారించి, అరెస్టు చేసేందుకు ఎక్సైజ్, సిట్‌ అధికారులు చర్యలు చేపట్టారు. అద్దేపల్లి జనార్దన్‌రావు, జగన్మోహన్‌రావులకు వీరు పలురకాలుగా సాయం చేసినట్లు దర్యాప్తులో గుర్తించారు. 

• విజయవాడకు చెందిన వ్యాపారి మనోజ్‌కుమార్‌ను ఏ20గా చేర్చారు. ఆయన జనార్దన్‌రావుకు మూతలు, సీసాలు సరఫరా చేశారు. నిందితుడికి ఎక్సైజ్‌ పోలీసులు 41ఏ నోటీసిచ్చి సోమవారం పిలిపించారు. విచారణ మధ్యలో ఉండగా తనకు అస్వస్థతగా ఉందని చెప్పడంతో ఆయన్ను చికిత్స నిమిత్తం ఆసుపత్రికి తరలించారు. 
• గోవా నుంచి స్పిరిట్‌ తెచ్చి సరఫరా చేసిన బాలాజీ కుమారుడు సుదర్శన్‌ను ఏ21గా చేర్చారు.  
• కోయంబత్తూరుకు చెందిన సెంథిల్‌తో కొన్ని రకాల సీసాలు తయారు చేయించుకున్నారు. దీంతో అతడిని ఏ22గా చేర్చారు. 
• హైదరాబాద్‌కు చెందిన దారబోయిన ప్రసాద్‌ను ఏ23గా చేర్చారు. ఆయన సీసాల మూతలపై బ్రాండ్‌ పేరు వచ్చేలా ముద్రించి, ఇబ్రహీంపట్నానికి చేర్చారు.