Crime News: రోడ్డు పక్కన నిల్చున్నా.. దూసుకొచ్చిన మృత్యువు

దంపతుల మృతి.. ముగ్గురు యువకులకు తీవ్రగాయాలు

బీబీనగర్, న్యూస్‌టుడే: ఫోన్‌ రావడంతో రోడ్డు పక్కన ఆగిన దంపతులను.. అతివేగంగా దూసుకొచ్చిన కారు ఢీకొనడంతో అక్కడికక్కడే మృతిచెందిన విషాదకర ఘటన యాదాద్రి భువనగిరి జిల్లా బీబీనగర్‌ మండల కేంద్రంలో ఆదివారం ఉదయం చోటు చేసుకుంది. బీబీనగర్‌ సీఐ ప్రభాకర్‌రెడ్డి తెలిపిన వివరాల ప్రకారం.. రాజపేట మండల కేంద్రానికి చెందిన గర్ధాసు ప్రశాంత్‌(32), భార్య ప్రసూన(28)తో కలిసి ద్విచక్రవాహనంపై హైదరాబాద్‌ నుంచి వరంగల్‌ వైపు వెళ్తుండగా ఫోన్‌ రావడంతో జాతీయ రహదారి 163పై బీబీనగర్‌ పెద్దచెరువు సమీపంలో రోడ్డు పక్కన నిలిపి మాట్లాడుతున్నారు. అదే మార్గంలో హైదరాబాద్‌ నుంచి యాదగిరిగుట్టకు కారులో వెళ్తున్న ముగ్గురు యువకులు నిర్లక్ష్యంగా డ్రైవింగ్‌ చేస్తూ దంపతులను బలంగా ఢీకొట్టారు. ఈ ప్రమాదంలో తీవ్రగాయాలై ప్రశాంత్‌.. పక్కనున్న చెరువులోకి ఎగిరిపడి ప్రసూన అక్కడికక్కడే మృతిచెందారు.

దంపతులను ఢీకొట్టిన అనంతరం వాహనం ఎగిరి సర్వీసు రోడ్డుపై పడటంతో అందులో ప్రయాణిస్తున్న ముగ్గురు యువకులకు సైతం తీవ్ర గాయాలయ్యాయి. వీరు హైదరాబాద్‌లోని ఎల్బీనగర్‌కు చెందిన తంగళ్లపల్లి షణ్ముఖ్‌(20), చైతన్యపురికి చెందిన దోర్నాల భార్గవ్‌(18), పద్మానగర్‌కు చెందిన కొండా సాయిరిత్‌(18)గా గుర్తించారు. వరంగల్‌ వాసులైన వీరు హైదరాబాద్‌లో ఉంటూ చదువుకుంటున్నారు. ఆదివారం సెలవురోజు కావడంతో యాదగిరిగుట్టకు వెళ్లేందుకు ఎల్బీనగర్‌ సమీపంలో థార్‌ వాహనాన్ని అద్దెకు తీసుకొని బయలుదేరారు. వారిని చికిత్స నిమిత్తం భువనగిరి ఏరియా ఆసుపత్రికి, అక్కడి నుంచి హైదరాబాద్‌కు తరలించారు. ఇందులో సాయిరిత్‌ పరిస్థితి విషమంగా ఉంది. కేసు నమోదు చేసి దర్యాప్తు చేస్తున్నట్లు పోలీసులు తెలిపారు.