Adilabad: అసత్య వార్తలు ప్రసారం చేస్తే చర్యలు తప్పవు

ఎదులాపురం: అసత్య వార్తలు ప్రసారం చేసినా, ప్రచారం చేసినా చట్టపరమైన చర్యలు తీసుకోవడానికి వెనుకాడమని జిల్లా ఎస్పీ గౌష్ ఆలం హెచ్చరించారు. విత్తనాల కోసం బారులు తీరిన రైతులపై పోలీసులు లాఠీచార్జీ చేశారని కొన్ని మాధ్యమాల్లో వార్తలు వెలవడ్డ నేపథ్యంలో ఆయన వివరణ ఇస్తూ అవాంఛనీయ సంఘటనలు చోటు చేసుకోకుండా పోలీసులు కేవలం బందోబస్తు ఏర్పాటు చేశారని, రైతులెవరిపై లాఠీచార్జి చేయలేదన్నారు. విత్తనాలను కొనుగోలు చేయడానికి భారీ సంఖ్యలో వచ్చిన రైతులు దుకాణాల్లోకి దూసుకెల్లకుండా క్రమబద్ధీకరిస్తూ వారికి ఇబ్బందులు కలగకుండా పోలీసులు చర్యలు తీసుకున్నారని పేర్కొన్నారు. రైతులతో పోలీసులు వాగ్వాదం చేసుకోవటం గాని తోపులాట ఘటన సైతం జరగలేదన్నారు. తప్పుడు వార్తలు ఇచ్చి రైతులకు ఇబ్బందికర పరిస్థితులు తీసుకురావద్దన్నారు.