గంజాయి తరలిస్తున్న అయిదుగురి అరెస్టు

వివరాలు వెల్లడిస్తున్న ఉట్నూరు డీఎస్పీ నాగేందర్‌

ఉట్నూరు గ్రామీణం, న్యూస్‌టుడే : గంజాయిని తరలిస్తున్న అయిదుగురిని అరెస్టు చేశామని మరొకరు పరారీలో ఉన్నారని ఉట్నూరు డీఎస్పీ నాగేందర్‌ తెలిపారు. స్థానిక డీఎస్పీ కార్యాలయంలో శనివారం ఏర్పాటు చేసిన విలేకరుల సమావేశంలో ఆయన వివరాలు వెల్లడించారు. ఇంద్రవెల్లి మండలం ముత్నూరు సమీపంలో 510 గ్రాముల గంజాయి తరలిస్తున్న దూంపేట రాకేశ్‌, ముద్దం రాంచరణ్‌లను పక్కా సమాచారం మేరకు పట్టుకున్నారు. జగిత్యాల జిల్లాకు చెందిన వీరిద్దరికి ముత్నూరుకు చెందిన మెస్రం శేఖర్‌, అసోడాకు చెందిన కుంర రాంజీ, బొప్పపూర్‌కు చెందిన మెస్రం రవీందర్‌ గంజాయి సరఫరా చేసినట్లుగా తెలపడంతో ఆ ముగ్గురిని కూడా అదుపులోకి తీసుకున్నామని.. తోయగూడకు చెందిన మరో వ్యక్తి జుగ్నాక భీంరావు పరారీలో ఉన్నట్లు తెలిపారు. సీఐ మొగిలి, ఉట్నూరు, ఇంద్రవెల్లి ఎస్సైలు మనోహర్‌, సునీల్‌ పాల్గొన్నారు.