పోలవరం నిర్వాసితులకు న్యాయం చేస్తాం

చింతూరు, ఎటపాక న్యూస్‌టుడే: ఎన్నికల్లో తాము గెలుపొందితే పోలవరం నిర్వాసితులకు న్యాయం చేస్తామని అరకు లోక్‌సభ, రంపచోడవరం అసెంబ్లీ కూటమి అభ్యర్థులు కొత్తపల్లి గీత, మిరియాల శిరీషాదేవి హామీ ఇచ్చారు. శుక్రవారం వీరిద్దరు చింతూరులో రోడ్‌షో నిర్వహించారు. ఈ సందర్భంగా మాట్లాడుతూ రాష్ట్రంలో సైకో పాలన నడుస్తోందని, పోలవరం నిర్వాసితులను ప్రభుత్వం నిలువునా ముంచేసిందని ఆరోపించారు. వీరికి పునరావాసం, ప్యాకేజీ ఇవ్వడంలో ప్రభుత్వం విఫలమైందని మండిపడ్డారు. ఇప్పటికే పరిహారం పొందిన రైతులకు ఎకరాకు రూ.5 లక్షలు అదనంగా ఇస్తామని ఎన్నికల్లో చెప్పిన జగన్‌మోహన్‌రెడ్డి మళ్లీ ఎన్నికలు వచ్చినా హామీ  నెరవేర్చలేకపోయారని పేర్కొన్నారు. భాజపా జిల్లా కార్యదర్శి పాయం వెంకయ్య, తెదేపా మండల అధ్యక్షుడు ఇల్లా చిన్నారెడ్డి, జనసేన మండల అధ్యక్షుడు మడివి రాజు తదితరులు పాల్గొన్నారు. అనంతరం చింతూరు - మారేడుమిల్లి ఘాట్‌రోడ్‌లో కొలువైన అమ్మవారికి గీత, శిరీషాదేవి ప్రత్యేక పూజలు నిర్వహించారు. తెదేపా సీనియర్‌ నాయకులు పాటి చలపతిరావు, కిలారు వెంకటేశ్వర్లు, రావి మాధవరావు, వైస్‌ ఎంపీపీ దొంతు మంగేశ్వరరావు, నలజాల శ్రీకాంత్‌, ఏలూరి వెంకన్న తదితరులు పాల్గొన్నారు.