వైభవంగా నృసింహ జయంతి

 ఊరేగుతున్న స్వామి, అమ్మవార్లు, చక్రపెరుమాళ్‌ స్వామి

సింహాచలం, న్యూస్‌టుడే: వైశాఖ శుద్ధ చతుర్దశి, స్వాతి నక్షత్రాన్ని పురస్కరించుకుని సింహాద్రి అప్పన్న స్వామి క్షేత్రంలో బుధవారం శ్రీనృసింహ జయంతి వైభవోపేతంగా జరిగింది. అర్చకులు వేకుజామున స్వామిని సుప్రభాత సేవతో మేల్కొలిపి ఆరాధన, బాలభోగం జరిపారు. స్వామివారి ఉత్సవమూర్తి గోవిందరాజ స్వామి, దేవేరులను సర్వాంగ సుందరంగా అలంకరించి శేషవాహనంపై కొలువుదీర్చారు. మరో పల్లకీలో సుదర్శనమూర్తిని అధిష్ఠింపజేసి నాదస్వర మంగళవాయిద్యాలు, భక్తుల గోవింద నామస్మరణల నడుమ సింహగిరి మాడవీధుల్లో ఊరేగించారు. తిరువీధిగా తరలివచ్చిన స్వామి, అమ్మవార్లను యాగశాల ఆవరణలోని ఉత్సవ వేదికపై ఆశీనులను చేశారు.