మత్స్యకారులంతా అప్రమత్తంగా ఉండాలి

అధికారులతో మాట్లాడుతున్న ప్రత్యేక డిప్యూటీ కలెక్టర్‌ మహేష్‌

ఎస్‌.రాయవరం, న్యూస్‌టుడే: మిగ్‌జాం తుపాను తీవ్రత ఇంకా తగ్గని నేపథ్యంలో తీరప్రాంతాల్లో  మత్స్యకారులంతా అప్రమత్తంగా ఉండాలని ప్రత్యేక ఉప కలెక్టర్‌ మహేష్‌ సూచించారు. రేవుపోలవరం తీరాన్ని అధికారులతో కలిసి మంగళవారం ఆయన సందర్శించారు. పూరిళ్లు, గుడిసెల్లో ఎవరూ నివాసం ఉండకూడదని, తుపాను రక్షిత భవనానికి రావాలని సూచించారు. సమస్యలు ఏవైనా ఉంటే మండల స్థాయి అధికారుల దృష్టికి తీసుకురావాలని ప్రజాప్రతినిధులకు తెలిపారు. తుపాను తీవ్రత తగ్గేవరకు అధికారులు సైతం ప్రజలకు అందుబాటులో ఉండాలన్నారు. ఆయన వెంట తహసీల్దార్‌ విజయ్‌ కుమార్‌, ఎంపీడీఓ రామచంద్రమూర్తి, ఈఓఆర్డీ సత్యనారాయణ, కొత్త రేవుపోలవరం సర్పంచి మల్లే లోవరాజు, వీఆర్వోలు తదితరులు ఉన్నారు.