అరకు ఘాట్‌రోడ్డులో రాకపోకలు బంద్‌

అనంతగిరి/గ్రామీణం, న్యూస్‌టుడే: అనంతగిరి ఘాట్‌రోడ్డులో బుధవారం వాహనాల రాకపోకలు నిలిచిపోయాయి. మిగ్‌జాం తుపాను కారణంగా మంగళవారం రహదారిపై పడిన కొండచరియలను తొలగిస్తుండగా బుధవారం అనంతగిరి- బొర్రా జంక్షన్‌ మధ్య బొడగుడ సమీపంలో మరో కొండచరియ జారి రహదారిపై పడింది. దీంతో ఎక్కడి వాహనాలు అక్కడే నిలిచిపోయాయి. పోలీసు సిబ్బంది అక్కడకు చేరుకుని స్థానికుల సహయంతో వాటిని తొలగించేందుకు చర్యలు చేపట్టారు. కొండల పైనుంచి వర్షపు నీరు రహదారిపైకి ప్రవహిస్తుండటంతో మళ్లీ కొండచరియలు జారిపడేందుకు అవకాశం ఉన్న నేపథ్యంలో బొడ్డవర చెక్‌పోస్టు వద్ద పోలీసులు వాహనాలు నిలిపివేశారు. కొండచరియలు పడిన ప్రాంతాలను జడ్పీటీసీ సభ్యుడు గంగరాజు, నాయకులు పరిశీలించారు.

పెదకోట, జీనబాడు, మేడపర్తి తదితర ప్రాంతాల్లో పంట పొలాలు తడిచిముద్దయ్యాయి. జీనబాడు ప్రాంతంలో పంట పొలాలను ఎంపీపీ నీలవేణి, కో ఆప్షన్‌ సభ్యుడు మదీనా పరిశీలించారు. అనంతగిరి వైయస్‌ఆర్‌ కాలనీకి చెందిన ధనలక్ష్మి ఇంటి పైకప్పు కూలిపోయి వర్షపు నీరు ఇంట్లోకి చేరింది.