సీలేరు కాంప్లెక్స్‌లో విద్యుదుత్పత్తి నిలిపివేత

మాచ్‌ఖండ్‌లో అంతంతమాత్రం

డొంకరాయి జలాశయం

సీలేరు, న్యూస్‌టుడే: సీలేరు కాంప్లెక్స్‌లో మాచ్‌ఖండ్‌ జలవిద్యుత్కేంద్రంలో మినహా మిగిలిన అన్ని జలవిద్యుత్కేంద్రాల్లో విద్యుదుత్పత్తి జరగడం లేదు. ఎగువ ప్రాంతాల నుంచి వస్తున్న నీటిని సీలేరు, డొంకరాయి జలాశయాల్లో నిల్వ చేస్తున్నారు. పక్షం రోజులుగా సీలేరు కాంప్లెక్స్‌లోని జలవిద్యుత్కేంద్రాల్లో ఉత్పత్తి నిలిపివేసి వేసవిలో ఉత్పత్తికి అంతరాయం తలెత్తకుండా చర్యలు తీసుకుంటున్నారు. బలిమెల జలాశయం నుంచి నీటి వాడకం ఆపేశారు. ఈ జలాశయంలో ఏపీ వాటా, డొంకరాయిలో ఉన్న నీటి నిల్వలు కలిపి ప్రస్తుతం 32.52 టీఎంసీల నీటి నిల్వలు ఉన్నాయి. మార్చి వరకు వీటిని నిల్వ చేసేలా జెన్‌కో అధికారులు ప్రణాళిక సిద్ధం చేస్తున్నారు. మాచ్‌ఖండ్‌లో అంతంతమాత్రంగా ఉత్పత్తి జరుగుతోంది. 120 మెగావాట్ల సామర్థ్యం గల ఈ జలవిద్యుత్కేంద్రంలో రోజుకు ఒక మిలియన్‌ యూనిట్‌ పైచిలుకు ఉత్పత్తి చేస్తున్నారు. జలవిద్యుత్కేంద్రంలో రెండు, అయిదు, నాలుగు యూనిట్ల నుంచి ఉత్పత్తి నిలిపివేయగా.. గురువారం నుంచి ఆరో యూనిట్‌నూ సాంకేతిక మరమ్మతులతో ఆపేశారు.